Matthew 8

¹Yesu n'ukuruwa vamwaako, waanimutthara muttitthi w'atthu.

²Nto namakuttula mmosa ahimwaattameela, khukokhora ohoolo wawe, khumwiirela wira: Pwiya, mwatthuna, munoowerya okireeriha.

³Yesu aahimookolela ntata namakuttul'owo, aahimukwannya khwiira: ?Kinnitthuna; mukhale ooreera. Naanaanoru makuttul'awe yaahimmalela.

⁴Nto Yesu aahimuhimeerya wira: ?Mwiiwe oratta-ene, muhimuleele mutthu etthu ila. Vano murowe mwaisooniherye wa namukuttho ni mwanvahe Muluku mukuttho yoowo Monse orummy'awe, wira vasuweliwe wira moovonihiwa.?

⁵Yesu akelaka okafarnawu, mukhulupale anakhotto a oRooma aahimwaattamela khunvekela wira:

⁶Pwiya, murumeyi aka ori owaani khareere owereiwa, hata khanwerya orukunuwa voolilini, owo onnihaawa vanci-ene.

⁷Yesu aahimuhimeerya wira: ?Miyo kinoorowa onvoniha.?

⁸Nto mukhulupale owo aahimwaakhula wira: Pwiya, miyo nkinphanela wira nyuwo mukele mpa mw'aka. Mulavule paahi. Murumeyi ak'owo onookhala mukumi.

⁹Maana kirokhalaru namurummwa, ni miyo kokhalana anakhotto anaarumaaka. Kamwiirela mmosa wira: ?Murowe!? Owo onnirowa. Kamwiirela mukina wira: Murwe! Owo onnirwa. Kamwiirela murumeyi aka wira: ?Mwiire etthu ila!? Owo onniira.

¹⁰Yesu aiwakaru siiso, aahitikinihiwa, khwaahimeerya atthu wira: Kinooleelani wira nnakhala mw'atthu a Isarayeli nkiphwannye waamini nno wuulupale.

¹¹Nto kinooleelani-tho wira: Atthu anci-ene animoorwa onikhuma ni onikhela nsuwa, olya vamosa n'Aparahaamu, n'Isake ni Yakope Moomweneni wa Wirimu.

¹²Nto anamwane a omwene owo anrowa woomoleliwa ota, mweepiphini, weiwo anrowa wunla n'okhuuriha maino.

¹³Numala Yesu aahimuhimeerya mukhulupale owo aanakhotto wira: Muroweke, yiiraneye ntoko sinaamini anyu. V'ekeekhayi, okathi ene yoowo murumeyi owo aahivona.

¹⁴Yesu aahirowa owanny'awe Petru. Weiwo aahaaphwanya amaathi awe Petru yimmathale-ene ewereiwaka ettekuxa.

¹⁵Nto Yesu aahaavara ntata, ettekuxa khwaahiya. Awo yaahivenya khupacerya waarumeela atthu.

¹⁶Makaarip'aya, Yesu aahiruuheliwa atthu anci-ene yavariwe ni minepa sootakhala. Ni nsu n'awe aahoomola minepa sootakhala iyo, ni khaavoniha atthu othene yaarina iretta.

¹⁷Wira amaliheriwe moolumo yaahimaly'awe profeta Yesaya wira: ?Owo ookuxa ohaawa wahu, ookapatta iretta s'ahu.?

¹⁸Yesu voonaly'awe muttitthi w'atthu wamurukurenrye, aahaaruma awiixutti awe olapuwela ekhopela ekina y'epharerya.

¹⁹Nto mwiixuttihi mmosa a ikano ahimwaattamela Yesu, kwira: ?Mwiixuttihi, miyo kinimoottharani nipuro ti nipuro ninrow'anyu.?

²⁰Yesu ahimwaakhula wira: ?Akhwatte aakhalana mittupha saya, ni axipalame aakhalana ipuro s'aya. Nto Mwaana a Mutthu khorina nipuro n'omumula.?

²¹Mwiixutti mukina a Yesu, aahimuhimeerya wira: Pwiya, mukihiye toko kirowe kaavithe atiithi.

²²Yesu aahimwaakhula wira: Mukitthare, mwaahiye alipa-okhwa, yaavitheke alipa-ookhw'aya.

²³Yesu aahikela mukalawani, ni awiixutti awe yaahimutthara.

²⁴Naanaanoru yaahikhumelela epheyo yuulupale varatta-ni mawimpi enahala osamiha ekalawa, nave Yesu iira arupaka.

²⁵Awiixutti awe yaahimwaattamela vaarup'awe, khunvenxa, emuhimeeryaka wira: ?Pwiya, munoopole! Nnimookhwa!?

²⁶Yesu aahiwaakhula wira: ?Munoovelani nyuwo, atthu oowaamini vakhaani? Nto aheemela, ahipwapwela epheyo eyo, ni mawimpi va ratta-ni, khumaaleleya.

²⁷Nto alopwan'awo yahitikinihiwa vanci-ene khwira: ?Mano mutth'ula t'ali? Eniira hata epheyo ni nratta sinimwiwelela yoola!?

²⁸Yesu vaphiyaly'awe ekhopela ekina, elapo y'oKatara, alopwana anli yaavariwe minepa sootakhala yahikhuma omahiye erwaaka okumana ni Yesu. Alopwan'awo yaari owoopihexa; khaavo aawerya ovira ephiro eyo.

²⁹Naanaanoru, awo yaahikhuwela, yiiraka: ?Nyuwo Yesu, Mwaana a Muluku, nrinani hiyo ni nyuwo? Murwenle onihaaxa nno okathi ohinatthi ophiya??

³⁰Vakhiviru va nipuro nenlo naahikhala-vo nikoto nuulupale na ikuluwe, s'alya malaxi.

³¹Nto minepa iyo saahinvekela Yesu siiraka: ?Mwaanoomolaka munihiye nivolowe nikotonle na ikuluwe.?

³²Yesu aahiirela: ?Muroweke?, nto minepa iyo sootakhala saahaakhuma alopwan'awo, khukela ikuluwe iye. Nto nikoto nlo na ikuluwe naahitthimaka okhuma omwaako mpakha otuphela varattani, khukhwela vaavo.

³³Alipa-oolyiha ikuluwe iyo yaahitthimakasa arowaka omuttettheni, weiwo yaahilaleya sothene siiraneiye, n'iye-tho saakhumelenle atthu ale yavariwe minepa sootakhala.

³⁴Nto atthu othene a muttetthe owo yaahirowa okumana ni Yesu. Vamonaly'aya, yaahinvekela wira akhume mmuttettheni mw'aya.