Revelation 22

¹Munkelo aahikithoonyerya-tho muro wa maasi a ekumi, woowaarya ntoko evituru, ophattunwe veehiceni ya Muluku ni ya mwaapwittipwitthi,

²ni onivira eriyari ya nipuwa na muttetthe. Khula mpantte wa muro wookhala mwiri w'ekumi, oniima mihokorokho imaara muloko ni piili khula eyaakha, eyo p'iyo, emaara emosa khula mweeri. Vano makukhu aya annaavoniha atthu a maloko othene.

³Muluku onoomaliha otakhaliwa wothene mmuttettheni-mmo. Ehice ya Muluku ni ya mwaapwittipwitthi enookhala mmuttettheni: Vano arumeyi a Muluku anoomukokhorelaka weiwo.

⁴Awo animoona owitho wawe: Vano nsina nawe nnolempwa vahuuci vaya:

⁵Iwo khunrowa-tho okhala ohiyu: Atthu khanrowa ophavelaka muthuko aya, vano awo animweettiha omwene mahiku othene vohimala-tho.

⁶Numala, munkelo aahikihimeerya wira: Moolumo ala t'ekeekhayi ni t'ororomeleya. Vano, Pwiya Muluku, yoowo onaavaha Erooho awe maprofeta, onruma munkelo awe wira nathonyerye arumeyi awe sinrowa wiraneya voohilekela.

⁷Yesu onnihimya wira: Mwiiwe: Miyo kinrwa naanaano! Ooreeriwa t'ale aniiwelela moolumo anrwa wa Muluku, alempwe muliivuruni-mu.

⁸Miyo, Yohani, kihiiwa itthu iya, kihoona. Vamanly'aka wiiwa n'uweha, kaahikokhora ohoolo wa munkelo aakithoonyenrye itthu iya, wira kimukokhorele.

⁹Nto owo aahikihimeerya wira: Muhiire siiso! Miyo ki murumeyi ntoko nyuwo ni ntoko axinn'inyu maprofeta ni ntoko othene ale aniiwelela moolumo alempwe muliivuruni-mu. Mmukokhoreleke Muluku paahi!

¹⁰Vano aahikihimeerya-tho wira: Muhivithavithe moolumo ala anrowa wa Muluku, alempwe muliivuruni-mu, okhala wira okathi aya ori vakhiviiru.

¹¹Atakhali yeetteleke nlelo otakhala waya murima; anamuttompe yeetteleke nlelo onanara waya murima. Nto atthu axariya yeetteleke nlelo exariy'eyo: Atthu ooreera murima etepeke oreera waya murima.

¹²Yesu onihimya wira: Mwiiwe: Miyo kinrwa naanaano. Kinimorwa kikunxeene otthuvela, wira kinvahe khula mutthu kittharihaka itthu siiraly'awe.

¹³Miyo ki Alfa ni Omega, ki Oopacerya ni ki Ookiserya, Ephattu n'Imalelo.

¹⁴Ooreeriwa t'ale ankattha ikuwo saya, wira ekhale ni mwiri w'ekumi, ni wira ewerye okela mmuttettheni eviraka mmikhorani mwaya.

¹⁵Nto ehikele atakhali n'anamirette n'anamuttompe n'anamwiive, n'ale anakokhorela amuluku a ethiru n'ale anotha ni moolumo ni soowira!

¹⁶Miyo Yesu, koomuruma munkelo aka wira oolaleeryeni mitthaka iya mwaha wa ikerexa sanyu. Miyo ki yoophuwa ya nloko na Tavit: Miyo ka nivoroxa noowaaryexa.

¹⁷Erooho ni mwar'awe mwaapwittipwitthi annihimya wira: Murwe! Ole oniiwa itthu iya, ahimyeke-tho wira Murwe! Ale avoliwe ntthona erweeke: Ale amphavela maasi a ekumi, evahiweke mahala.

¹⁸Miyo, Yohani, kinalopola ale othene aniiwa masu ala anrowa wa Muluku, alempwe muliivuruni-mu: Akhala mutthu ontthuna wuncererya yaawo n'itthu sikina, Muluku onimuncererya ihasara silempwe muliivuruni muumu.

¹⁹Vano, akhala mutthu ovukula moolumo makina anrwa wa Muluku, alempwe muliivuruni-mu, Muluku onookumiha mpantte awe wa mihokorokho sa mwiri w'ekumi; siiso-tho onoomoomola mmuttettheni mooreera omalela, ntoko silempw'aya muliivuruni muumu.

²⁰Yesu, Yoowo onkhalela onamoona itthu iya, onnihimya wira: Vakhale siiso! Rwaani, Pwiya Yesu!

²¹Mahala a Apwiya Yesu akhale ni nyuwo othene. Amen!