Revelation 21

¹Numala, kaahoona erimu esya n'ilapo esya. Erimu ya khalayi n'ilapo ya khalayi saahilakaseya: Hata ephareya khiyaakhanle-tho.

²Vano, kaahoona muttetthe wooreera omalela, oYerusalemu wa naanaano, waakhuruwa wirimu, okhumaka waary'awe Muluku, woophapiweene ntoko muthiyana onwarenle i'y'awe.

³Vano, kaahiiwa nsu nuulupale nikhumaka veehiceni, nihimyaka wira: Emp'ela, empa ya Muluku variyari v'atthu, Muluku onookhala ni yaawo: Awo anrowa okhala atthu awe. Muluku onrowa okhalaka ?Muluku vamosa ni yaawo.?

⁴Owo onoopuputtha maithoni aya othene: Khunrowa okhala-tho okhwa, nnakhala oripiwa murima, wala ikuttho nnakhala ohaawa. Tthiri olumwenku wa khalayi woovira.

⁵Vano, Muluku akilanthe veehiceni aahira: Moone: Itthu sothene miyo kookhaliha isya! Siiso-tho aahikihimeerya wira: Mulepe etthu ila, okhala wira moolumo aka t'ororomeleya ni t'ekeekhayi.

⁶Khuhimya-tho wira: Sothene somaliheriwa! Miyo ki oopacerya ni ki ookiserya; miyo k'ephattu n'imalelo. Ale avoliwe ntthona kinimwaavaha mahala, maasi eehime ya maasi a ekumi.

⁷Ale anrowa oxintta, kinimwaavaha sooreera iya; miyo kinrowa okhalaka Muluku aya, vano awo antthuna okhalaka an'aka.

⁸Nto ale oowooceya n'ale ahinaamini n'atakhali n'alipa-oowiiva n'anamuttompe n'anamirette n'ale ankokhorela ilatarato sa itthu sihikhanle Muluku n'anawoothe othene, opuro aya ephareya ya mooro ni ya soofiri: Nno t'okhwa wa nenli.

⁹Munkelo mmosa aale athanu na miili yaarina mihasa mithanu na miili sisareiyeene ihukhumu sookiserya thanu na piili, aahikirwela, khukihimeerya: Murwe, kiwooniheryeni muthiyana oowaakameliwa, mwar'awe mwaapwittipwitthi.

¹⁰Voohilekela, munkelo aahikikuxa mmunepani, khukirowana vasulu va mwaako muulupale ni woorekama. Weiwo, aahikithoonyerya oYerusalemu, muttetthe woothanliwa, waakhuruwa wirimu, okhumaka wary'awe Muluku.

¹¹Muttetthe owo wookaweliwa ottittimihiwa wa Muluku: Waarya waya wamulikana ni waarya wa nluku nootutha ni nluku na ncano, noowaarya ntoko nipheru.

¹²Muttetthe owo wookhalana ixiiri sa maluku, suulupale ni soorekamexa, ni mikhora muloko ni miili, salipeleliwa ni ankelo muloko ni manli. Mmaseleni mwahilempwa-mo masina a mahimo muloko ni manli, a atthu a Isarayeli.

¹³Saari mikhora miraru onikhuma nsuwa, miraru onikela pheyo.

¹⁴Ixiiri sa muttetthe owo satekiwe vasulu va miyala muloko ni miili: Vamiyalani vaavo vaahilempwa masina aarummwa muloko nanli a mwaapwittipwitthi.

¹⁵Munkelo yoowo aalavunle ni miyo aahikuxa ekopo ya eweero, yaari mphimelo, wira niphime muttetthe ni mikhora n'ixiiri suulupale.

¹⁶Muttetthe owo waahikhalana mipantte mixexe solikana: Erakamelo aya nikhuveelo aya yaari emosaru. Vano munkelo owo aahiphima muttetthe n'ikopo awe: Waarina miphimo emiya muloko ni piili. Orakama waya n'ukhuveya waya ni weemela waya waamulikana.

¹⁷Munkelo yowo-tho aahiphima ixiri, saarina miyoono miloko muloko ni mixexe ni miyoono mixexe, ntoko mphimo aaphiman'aya atthu.

¹⁸Ixi'iyo saatekiwe ni maluku a ncano: Vano muttetthe mmansaya waari wa eweero yooreera ni yoowaarya, enaarya ntoko eviituru

¹⁹Mathipelo a ixiri sa muttetthe yaahireerihiwa ni maluku oowaarya a mixovo sothene: Nluku na nthipelo noopacerya naari na ?jaspe?, nanenli naari n'exafira; naneeraru naari na ?akata?; naneexexe naari na ?esmeralta?;

²⁰naneethanu naari na ?onikisi?; naneethanu na mosa naari na sarsonia; naneethanu nanli naari ?krisolito? naneethanu neeraru naari na ?perilio? naneethanu na xexe naari na ?topasio?; nanamuloko naari na ?krisopraso?; nanamuloko na mosa naari na ?jasinto?; nanamuloko na manli naari na ?ametista.?

²¹Mikhora muloko ni miili saari sa perola: Khula nsele napakiwe ni nluku nimosaru. Ephiro ya mmuttettheni yaapakiwe n'iweero yooreera, yoowaarya ntoko eloola.

²²Nkaawen'he empa ya Muluku hata emosa mmuttettheni-mmo, okhala wira emp'aya t'Apwiya Muluku oowerya sothene, ni ti mwaapwittipwitthi.

²³Muttetthe owo khumphavela nsuwa wala mweeri wira omwaleliweke, okhala wira onnimwaaleliwa ninttittimiho na Muluku: Mwaapwittipwitthi ti muthuko aya.

²⁴Atthu a mulaponi mothene anrowa weettaka emwaleeliwaka ni muthuk'owo. Vano mamwene a mulaponi mothene anooruhela-mo mihakhu saya soottittimiha.

²⁵Mikhora sa muttetthe sinkhala sotthukuweene mahiku othene: Khasinrowa owaliwa, maana weiwo khuuvo ohiyu.

²⁶Amalapo anrowa oruuhela muttetthe owo wunnuwa waya ni mihakhu saya.

²⁷Nto khasinrowa okela memmo itthu soohireera, nnakhala mutthu oniira itthu sowuuluha muru wala mutthu oowootha. Anrowa okela-mo ti yale paahi alempwe masin'aya muliivuruni mw'ekumi, yeeyo eri ya mwaapwittipwitthi.