Revelation 20

¹Numala, kaahimoona munkelo aakhuruwa wirimu, akunxeene mmatatani mihulelo sa mweepiphini moowiixa n'ikwirinti yoolemelexa.

²Aahivara enow'ele yuulupale ya khalayi, eyop'iyo, Nwanani (oniihaniwa-tho Satana), khumutthukwa mpakha iyaakha emiya emosa.

³Munkelo owo aahimurihela Satana mowixani, aahitthuka ni muhulelo nipuro nlo n'epiphi, khuhela ekanyeryo wira ahiwootothe atthu, mpakha ovira iyaakha iyo emiya emosa. Savira iyaakha iyo, owo ohaana otaphuliwa okathi vakhaani.

⁴Numala, kaahoona ihice sinci-ene: Atthu yaakilathenle yaahivahiwa owerya w'olamula. Kaahona-tho minepa s'atthu ale aiviwe mwaha w'olaleya ekeekhayi ya Yesu ni masu a Muluku. Awo khinakokhorenle enama nnakhala elatarato aya, wala khinaheliwe ekanyeryo aya vayuuci wala muntatani. Awo yaahitthikela-tho ekumi, khukhalihiwa mamwene vamosa ni Kristu mpakha iyaakha emiya emosa.

⁵Anamukhwa akina khatthikenle-tho ekumi mpakha ovira iyaakha emiya emosa. Nno ohihimuwa woopacerya.

⁶Oottottopeliwa ni ooreeriwa t'ale anrowa ovahiwa ohihimuwa nno woopacerya. Okhwa wanenli khunrowa wawerya: Awo anrowa okhala anamukuttho a Muluku ni a Kristu, anookhalihiwa mamwene mpakha iyaakha iye emiya emosa.

⁷Savira iyaakha emiya emosa, Satana onrowa otaphuliwa: Akhumaka mukhatteya,

⁸onoovenya aoraka owoototha amalapo amwaramwareiye mulaponi mothene, eyo p'iyo, Kaki ni Makoki. Owo onimwaathukumanyerya owana ekhotto: Awo anrowa okhala oowaatta ntoko mihaava s'ophareya.

⁹Awo yaahimwareela elapo yothene, khurukurerya muttetthe w'atthu oreera murima ni muttetthe omphent'awe. Nto waahikhuruwa mooro wirimu, khwaamirya.

¹⁰Vano, Satan'owo aawootonthe aahiriheliwa mphareya mwa mooro ni soofiri, vano yaariheliwaya-vo-tho enam'ele yoowoopiha ni profet'ole oowootha. Weiwo anrowa ohaaxiwa mahiku othene, othana n'uhiyu, vohimala-tho.

¹¹Numala, miyo kaahoona ehice yuulupale yootteela n'ule aakilanthe-vo. Elapo n'erimu saahitthyawa ohoolo wawe, khuhihiya-tho iravula saya.

¹²Numala, kaahiwoona alipa-ookhwa, aalupale n'akhaani, yemenleene ohoolo w'ehice. Vano, saahitthukuliwa iliivuru: Nlelo yaahitthukuliwa eliivuru ekina, yaari eliivuru y'ekumi. Alipa-ookhwa yaahiphukiwa sitthariheliwaka miteko saavanryaya, ntoko saalempwaya muliivuruni.

¹³Ephareya yaahahokoloxa atthu ale yaakhwenle memmo. Okhwa n'ilapo y'alipa ookhwa waahaatthikiherya atthu yaakhwiye yaarin'aya. Vano othene yaahilamuliwa sitthariheliwaka miteko saavanry'aya.

¹⁴Okhwa n'ilapo y'alipa-ookhwa saahiriheliwa mphareya mwa mooro. Epharey'ela ya mooro, okhwa wanenli.

¹⁵Nave othene ale yahaalempwe masin'aya mulivuruni mw'ekumi yaahiriheliwa mphareya-mmo mwa mooro.