Revelation 19

¹Vasulu vaya, miyo kaahiiwa nsu noowituperya ntoko muttitthi muulupale wirimu, nihimyaka wira: ?Aleluya!? Woopowa n'uwerya ti wa Muluku ahu!

²Owo onnalamula atthu n'ikeekhayi n'ixariya! Tthiri uwo oomuhukhumu muthiyan'owo namararuwa muulupale, yoowo ahonona elapo mwaha wa soonanara siir'awe. Muluku oomunlela ikuhu mwaha w'ephome y'arumeyi awe.

³Muttitthi uwo waahikhuwela-tho wiiraka: ?Aleluya!? Mwiixi wa muttetthe owo onniwela mahiku othene.

⁴Vano mahumu miloko miili ni maxexe n'akumi awo axexe yaahuurama mpakha vathi, khumukokhorela Muluku, akilanthe veehiceni yiiraka: ?Amen! Aleluya!?

⁵Vano, naahiwanyeya nsu nikhumaka veehiveni, nahimya wira: Mmuttottopele Muluku ahu, nyuwo arumeyi awe othene, nyuwo minimoova Muluku, aluupale n'akhaani.

⁶Numala, kaahiiwa nsu naalikana n'unyakula wa muttitthi muulupale w'atthu n'uruma wa maasi manci-ene n'ukukutteya w'etari yuulupale. Nsu nlo naahimya wira: Aleluya! Pwiya Muluku ahu oowerya sothene, ooheliwa omwene!

⁷Nitteeliweke murima n'utthapa: Nimuttittimihe Muluku! Woophiya okathi wa niira n'thela wa mwaapwittipwitthi: Mulipa-ootheliwa ohilokiherya.

⁸Owo oovahiwa owara ekuwo yootteettheya ni yoowaarya ni yoorerexa, enthonyerya miteko sooreera s'atthu ooreera murima.

⁹Vano munkelo aahikihimeerya wira: Mulepeke. Ooreeriwa t'ale yiitthaneliwe yoolya ya niira n'othela wa mwaapwittipwitthi. Ni nlelo munkelo aahikihimeerya wira: T'ala masu a ekeekhayi a Muluku!

¹⁰Miyo kaahuuramela ohoolo wa munkelo owo, wira kimukokhorele: Nto owo aahikiirela: Muhiire siiso! Miyo ki murumeyi ntoko nyuwo ni ntoko axinn'inyu yaawo ankhapelela onamoona wa Yesu. Mmukokhoreleke Muluku paahi! V'ekeekhayi onamoona wa Yesu t'onavaha ikuru maprofeta.

¹¹Numala, kaahoona erimu ehuleiyeene: Khukhumelela ekhavalo yootteela. Nakhavalo ene oniihaniwa ororomela ni Mulipa-eekeekhayi. Owo onnilamula ni onniwana ekhotto n'ixariya.

¹²Maitho awe yaanaarya ntoko malumi a mooro. Mmuruni aahiwara ikhara sinci-ene. Owo aahilempwa nsina nihinsuweliwa ni mutthu: Owo paahi t'asuwela.

¹³Aahiwara nlaya noonaanihiwa n'iphome. Nsina nawe ti Nsu na Muluku.

¹⁴Mittitthi s'anakhotto a wirimu saanimutthara yoowo, settihaka ikhavalo sootteela, siwanreene ikuwo sootteela, sootteettheya ni sooreera.

¹⁵Mwaano mw'awe mwaanikhuma mwaalo woowiitha:: Ni mwaal'owo, onrowa waavulaliha amalapo. Onrowa oweettiha atthu n'ikopo ya yuuma: Onrowa owama eviinyu mweehimeni y'onanariwa wa Muluku oowerya sothene.

¹⁶Vanlayani vawe ni vamwettoni vawe vaalempwa wira: Mwene a mamwene ni Pwiya a mapwiya.

¹⁷Okathi yoowo, kaahimoona munkelo eemenle vansuwani. Owo aahakhuwelela axipalame othene yavava osulu ottaiwene, iiraka: Murwe, muthukumanele niira nuulupale na Muluku!

¹⁸Murwe, mukhuure enama ya mamwene ni ya makhulupale ni y'anakhotto ni ya ikhavalo ni y'anakhavalo: Mukhuureke enama y'atthu othene, ipottha n'alipa-ootaphuliwa, aalupale n'akhaani.

¹⁹Numala, kaahoona enama yoowoopiha ni mamwene a mulaponi n'anakhotto aya, ethukumanneene wira ewaneke ni nakhaval'owo n'anakhotto awe.

²⁰Enam'eyo yaahitthukweliwa vamosa ni profeta oowootha, yoowo iirale mitikiniho vamaithoni v'enama yeeyo. Mwaha wa mitikiniho seiyo, profet'owo aahiwoototha ale yaatthittiwe ekanyeryo y'enama ni yakokhorela elatarato aya. Enam'eyo ni profet'owo yaahiriheliwa, enari ekumi, eriyari ya phareya ya mooro, yeeyo empaha ni soofiri.

²¹Anakhotto aya yaahiiviwa ni mwaalo waakhuma mwaano mw'awe yole ettiha ekhavalo yootteela. Vano axipalame othene yaahinona n'irutthu saya.