Revelation 18

¹Numala itthu iya, kaahimoona munkelo mukina akhuruwaka wirimu. Owo aahikhalana owerya wuulupale: Warya wawe waahimwaleela elapo yothene.

²Vano aahikhuwela ni nsu nuulupale, iiraka: Woomora! Opapilooni wuulupale woomora! Vano iwo wothatuwa, khukhala empa y'arumeyi a Satana, nikhuku n'ankelo othene ootakhala, nthyawelo n'axinuni othene oonanara ni oophweeliha.

³V'ekeekhayi, ohawuriha atthu a maloko othene eviinyu y'oraruwa waya woohiphimeya. Mamwene a mulaponi yaahiraruwa ni muttetthe: Anamarotta a mulaponi yaahithaaciriha mmansaya ni mihakhu saya suulupalexa.

⁴Numala, kaahoona nsu nikina nikhumaka wirimu, niiraka: Nyuwo, atthu aka, mukhume muttetthe owo, wira muhaataane n'itampi saya, ehukhumu aya ehoophwanyeni-tho.

⁵Itampi saya sookoma wirimu: Muluku ohuupuwela sootakhala saya.

⁶Mmwiriheke yoowo ntoko sirihihalyayani: Musarihe ekahi aya otheeka wootepexa ananara ovikana vanli ole woovahalyayani.

⁷Mmuphwanyihe yoowo oohaawa n'utakhaliwa wuunci-ene, onlikana n'uvuwa n'upuha waya. Tthiri uwo onniihimeerya mmansaya wira: ?Kikilanthe va, ntoko pwiyamwene: Miyo nkihiyo namukhweli, nkinrowa-tho ohaawa!?

⁸Tivo, wa nihiku nimosa paahi, sinimoorwa ihasara simphwanel'awe: Okhala n'ikuttho n'itala. Onrowa opahiwa ni mooro. Maana Pwiya Muluku, yoowo onrowa olamula, t'owerya.

⁹Okathi yoowo mamwene a mulaponi, yentte n'unamuttompe n'uraruwa, anrowa okhuwela ni wunla mwaha wa muttetthe owo, yoonakaru mwiixi onrowa owela, okhumaka muttetthe woopahiwa.

¹⁰Awo anrowa okhala ottaiwene, yoovaka ehukhumu aya, ehimyaka wira: ?Mai! Mai! Mootakhaliwa nyuwo, oPapilooni, muttetthe muulupale, muttetthe wooreera omalela. Ehukhumu anyu yoophiya naanaanoru!?

¹¹Vano, anamarotta a mulaponi animunla ni wikhupanyerya mwaha wa nyuwo, okhala wira khaavo-tho onrowa othuma itthu satumihaya:

¹²Eweero n'iparatha ni maluku oowaarya ni oorikexa; ikuwo soteetheya, ikuwo sooxerya n'ikuwo sothererya: Nnakhala mixovo sothene sa miri soolipa, nnakhala itthu sipakiwe ni maino eetthepo wala ni miri soorika, wala n'iyuuma hata ni mwala woowaarya.

¹³Awo khanwerya-tho otumiha itthu soowunkhela, sinsiveha soolya, n'ixeero ni miira n'irupani, nnakhala eviinyu ni makhura, n'iphepa n'etriku, nnakhala inyompe n'ipuri nnakhala ikhavalo n'ikaaro, nnakhala ipottha wala atthu akumi.

¹⁴?Soolya saatepa wosivelani sihoomalelani: Muhakhu anyu wothene n'uthaciri wanyu ohoorimeelani: Khamumphwanya-tho seiyo!?

¹⁵Vano anamarotta aphwannye othaaciri waya mmuttettheni-mme, anrowa okhala ottaiwene, yoovaka ehukhumu ya muttetthe owo, anrowa okhuwela ni wikhupanyerya,

¹⁶Yiiraka: ?Wootakhaliwa! Wootakhaliwa muttetthe owo muulupale! Owo waawanre ikuwo sootteettheya ni soorika ni sooxerya: Warerihiwe n'iweero ni maluku oowaarya ni oorika.

¹⁷Vano, okathi vakhaani woorimeliwa mihakhu saya sothene.? Makhulupale othene aneettiha ikalawa suulupale n'atthu othene ampakhiriwa mukalawani-mmo, anahota n'atthu akina anvara muteko nphareya, animweemela ottaiwene:

¹⁸Vano yoonaka muttetthe ole opanttene, otthuwaka mwiixi, anookhuwela yiiraka: Khinonne muttetthe muulupale onlikana n'ula!

¹⁹Awo animwitthela ntthupi mmuruni mwaya, anookhuwela yinlaka ni wiikhupanyerya, yiiraka: ?Wootakhaliwa! Muttetthe muulupale wootakhaliwa! Weiwe wathaaciryaya-wo ni sooreera saya othene ale yaarina ikalawa suulupale mphareya: Vano okathi vakhaani woopwetexiwa.

²⁰Nyuwo, erimu, mutteliweke murima mwaha wa yoowo. Mutteeliweke murima, nyuwo atthu oowerya n'arummwa ni maprofeta! Muluku oohukhumu muttetthe owo, mwaha wa sootakhala siwirenly'aya.?

²¹Vano, munkelo a ikuru aahikuxa khurihela mphareya, khwiiraka: Ti siiso muttetthe muulupale oPapilooni sinrow'aya oriheliwa vathi n'uwali olakaseye.

²²Mwa nyuwo, khaninrowa-tho wooneya warya wa muthuko. Mwa nyuwo khaninrowa-tho wiiwiwa nsu na mutheli nnakhala nsu na mulipa-oomopa xipetta ni nlope. Mwa nyuwo khanrowa-tho wiiwiwa oruma wa nluku n'oxila!

²³Mwa nyuwo khunrowa-tho wooneya waarya wa muthuko. Mwa nyuwo khaninrowa-tho wiiwiwa nsu na mutheli nnakhala nsu na mulipa-ootheliwa. Okhala wira anamarott'anyu yaari axineene elapo: Vano nyuwo muhototha maloko othene a mulaponi ni mirette s'okhwiri anyu.

²⁴Vano-tho mwa nyuwo yoophwanyiwa ephome ya maprofeta ni y'atthu oowaarya n'iphome y'atthu aiviwe mulaponi-mu.