Revelation 17

¹Vano, munkelo mmosa n'ale athanu n'anli yaarina mihasa mithanu na miili, aahirwa okihimeerya wira: Murwe, kothonyeryeni ohukhummwa wa muthiyana namararuwa muulupale, okilanthe eriyari ya maasi manci-ene.

²Mamwene a mulaponi aararuwa ni yoowo: Atthu a mulaponi aahapaliwa eviinyu y'oraruwa wawe.

³Naanaanoru, munkelo aahikikuxa munnepani, akirowanaka woothakoni. Weiwo kaahimoona muthiyana akilantte vasulu va nxeni nooxeerya: Vanamani vaavo vaalempwe masina oomuruwana Muluku. Enam'eyo yaarina miru mithanu na miili ni manyaka muloko.

⁴Muthiyan'owo aawanre ekuwo yootteetheya ni yooxerya, aikhunenle n'urerihiwa wa eweero ni maluku oowarya ni muhasa wa eweero, osareiyeene itthu soonanara ni soowuliha muru, sikhumaka mooraruwani mw'awe.

⁵Vayuuci vawe vaahilempwa-vo nsina nootikiniha: Opapilooni, muttetthe muulupale, mai a anamararuwa ni a soonanara s'elapo.

⁶Siiso, kaahoona wira muthiyan'owo aahihapaliwa ephome y'atthu a Muluku n'iphome y'ale yaiviwe mwaha w'omutthara Yesu. Vaamoonaly'aka, kaahitikinihiwa vanci-ene.

⁷Vano munkelo aahikikoha wira: Xeeni muhalaka otikinihiwa siiso? Miyo kinimootaphulelani otikiniha wa muthiyan'ole ni wa nxeni nimukunxe, nenlo nrina miru mithanu na miili ni mayaka muloko.

⁸Enam'eyo yoonaly'anyu yaari ekumi, nto vano khinkhala-tho: Enrowa okhuma mweepiphini, epwetexiwe. Siiso, atthu ankhala mulaponi, yaawo masin'aya ahilempwe muliivuruni mwe'ekumi okhuma opattuxiwakaru olumwenku, anootikinihiwa vanci-ene, vanrowaya woona enam'eyo, yaari ekumi, ni vano ehikhanle, nto entthikela-tho okhala.

⁹Vaavo ti vamphaveleya ankhili, wira nisuwele. Miru mithanu na miili sinthonyerya miyaako mithanu na miili sikilatheliwe ni muthiyana; sinthonyerya-tho mamwene mathanu na manli:

¹⁰Mamwene mathanu ahookhwa, mukina onoruma nlelo khakhumelenle. Vanrwawe, khanrowa olekela.

¹¹Enama yeele yaari ekumi ni vano ehikhanle, yeeyo ene ti mwene aneethanu neeraru, nto onoolikana ni makina mathanu na manli: Yowo-tho onrowa opwetexiwa.

¹²Manyaka muloko yoonaly'anyu anthoonyerya mamwene muloko nlelo ahipacenrye oruma: Nto anrowa ovahiwa owerya, wira yeettihe omwene vamosa n'inama, ewoora emosa paahi.

¹³Othene ala aakhalana muupuwelo mmosaru: Orumeela enam'ele n'uwerya n'uruma orinaya.

¹⁴Awo anrowa owana ni mwaapwittipwitthi, nto ola onrowa wawerya, okhala wira owo ti Pwiya a mapwiya ni Mwene a mamwene. Vano atthu yiihaneliwe woopowa, yaawo athanliwe, akhanle oororomeleya, anrowa oxintta vamosa ni yoowo.

¹⁵Munkelo ole aahikihimeerya-tho wira: Nto ale yonaly'anyu, vale vakilantte muthiyan'owo namararuwa, anthonyerya maloko n'ilapo ni mahimo ni malavulelo.

¹⁶Vano, manyaka muloko yoonal'anyu, vamosa ni nxeni, anrowa omunyokha namararuw'owo. Awo anrowa omwaakha sothene sirin'awe, emuhiye ahiwanr'etthu: Vano anrowa okhuma erutthu awe, ehanle anoopwetexa ni mooro.

¹⁷V'ekeekhayi, Muluku oohela mmurimani mwaya otthuna wo wira itthu sintthun'awe: Siiso awo animwiiwanana yaworu, anoovaha nxeni nlo owerya w'oruma orinaya, mpakha omaliheriwa moolumo a Muluku.

¹⁸Vano muthiyana omoonaly'anyu onthonyerya muttetthe muulupale oniweettiha mamwene a mulaponi.