Revelation 16

¹Vano, kaahiiwa nsu nuulupale naalavula mpaani mwa Muluku, naalavulelaka ankelo ale athanu n'anli, iiraka: Murowe mwaitthele mulaponi onanariwa wa Muluku, weiwo ori mmihasani mithanu na miili!

²Ankelo oopacerya aahivenya, khurowa omwarexela mulaponi ehasara yaari mmuhasani mwaya. Naanaanoru, yaahaakhumelela makhwatta maalupale ni oowerya ale yaarina ekanyeryo ya nxeni, yale yaakokhorela elatarato aya.

³Munkelo a nenli aahimwarexela mphareya ehasara yaari mmuhasani mwaya. Maasi yaahithatuwa, khukhala ntoko ephome ya mutthu ookhwa; axinama othene a mphareya khukhwaasa.

⁴Vano munkelo w'aneeraru aahimwarexela mmuro ni mwehimeni ehasara yaari mmuhasani mwaya: Maasi yaahithatuwa, khukhala ephome.

⁵Okathi uwo, kaahimoona munkelo eettiha maasi, iiraka: Nyuwo mulipa-ooreera murima, nyuwo munkhala ni mwaakhala! Mulamulaka siiso, nyuwo muhettela exariya!

⁶V'ekeekhayi, awo yaahimwarexa ephome y'atthu a Muluku ni ya maprofeta: Ni vano nyuwo muhaavaha owurya ephome. Awo ahaakhela emphwanelaya!

⁷Numala, kaahiiwa nsu naakhuma vaaltaari, naahimya wira: Apwiya Muluku oowerya sothene! Ti siiso! Olamula wanyu ti w'ekeekhayi ni wa xariya.

⁸Vano, munkelo aneexexe aahimwarexela vansuwani ehasara yaari mmuhasani mwaya. Nsuwa aahivahiwa waapaha atthu ni mooro.

⁹Atthu yaahipahiwa n'uviha wuulupalexa: Nto khattharunwe, wira envuwihe Muluku; ohiya vo, yaahiruwana nsina na Muluku; orina owerya w'oruma ihasara iyo.

¹⁰Numala munkelo aneeraru aahimwarexela veehiceni va nxeni ehasara yaari mmuhasani mwaya. Vano omwene w'enam'eyo waahikela mweepiphini. Atthu yanluma nlumi mwaha wo woona owerya,

¹¹enamuruwana Muluku a wirimu mwaha wo woona owerya ni mwaha wa makhwatta. Nto khiyaahiye miteko saya sootakhala.

¹²Vano munkelo aneethanu na mosa aahimwarexela mmuro muulupale, Eufrate, ehasara yaari mmuhasani mwaya. Mur'owo waahuuma, wira waatthukulele ephiro mamwene yaarwa onikhuma nsuwa.

¹³Numala, kaahoona minepa mithanu sonanara, salikana n'anaphulu, sikhumaka mwaano mw'enowa yuulupalexa ni mwaano mwa nxeni ni mwaano mwa profeta oowootha.

¹⁴Yaari ankelo a Satana, yaawo aniira mitikiniho. Vano annarowela mamwene a mulaponi mothene, wira yaathukumanyerye owana ekhotto ya nihiku nuulupale na Muluku oowerya sothene.

¹⁵Awo yaahathukumanya mamwene nipuro aHeperi aniihanaya oHarmaxitoni.

¹⁶Nwiriyane: ?Miyo kinrwa ntoko nawiye! Ooreeriwa t'ule ohinrupa, onsuka ikuwo sawe, wira aheetteke ahiwanr'etthu, uuliwaka muru vamaithoni v'atthu.?

¹⁷Vano, munkelo aneethanu n'anli aahimwarexela osulu ehasara yaari mmuhasani mwaya. Naanaanoru, nahiiwanyeya nsu nuulupale nikhumaka veehiceni, mpaani mwa Muluku, iiraka: Somalelihiwa!

¹⁸Khukhumelela overunya n'okukutteya n'itari n'itetere yuulupale ni yoowoopiha, ehinakhumelele siiso okhuma vavale vapattuxiwawe mutthu!

¹⁹Muttetthe muulupale waahiphweeya, khukawanyeya mipantte miraru; mittetthe sa ilapo sothene sahiphomowa. Muluku ahuupuwela, oPapilooni, muttetthe muulupale khuwuriha eviinyu y'onanariwa wawe wuulupale.

²⁰Isisiro sothene saahirimelela miyaako sothene saahilakaseya.

²¹Maluku a maralala malupalexa ni oolemelexa yaahaamorela atthu. Vano atthu yaahimuruwana Muluku mwaha w'ehasara ya maralela: Tthiri ehasar'eyo yaari yuulupale ni yowoopihexa.