Revelation 15

¹Vano, miyo kaahoona wirimu ekanyeryo ekina yootikiniha: Yaari yuulupale ni y'othikila muthana. Yaari Ankelo athanu na nanli, yaakunxe ihasara thanu na piili, siri sookiserya, okhala wira ni seiyo enoomalela ehukhumu ya Muluku.

²Vaavo, kaahoona etthu yaalikana n'iphareya ya vituru, yootutha, yootakaheriwa mooro. Kaahiwoona-tho ale axinttale nxeni nle n'ilatarato aya, yale anwenrye-tho ole arina nsina noolempwa ni nummaro: Awo yaarimweemela vasulu va pharey'ele yootutha, yaakunxeene aviyela Muluku aavahaly'awe.

³Awo yaaniipa nsipo na Monse, murumeyi Apwiya, ni nsipo na mwaapwittipwitthi, iiraka: Apwiya, Muluku oowerya sothene, miteko sanyu ti suulupale ni sootikiniha! Nyuwo mwene a atthu othene, iphiro sanyu ti sa xariya ni s'ekeekhayi.

⁴T'ani ohinrowa owoovani, Apwiya? T'ani ohinrowa olaleya wunnuwa wanyu? Tthiri nyuwo paahi muri ooreera murima. Atthu a maloko othene animoorwa yookokhoreleni, okhala wira miteko sanyu sa xariya soosuwelihiwa.

⁵Numala itthu iya, kaahoona wirimu empa ya Muluku ehuleyaka, yaari-mo eheema yo waataana.

⁶Ankelo awo athanu n'anli, yaarina ihasara thanu na piili, yaahikhuma mpaani memmo, ewanreene ikuwo soovivy'ala sootteela ni soowaarya, etitenleene misako sa eweero.

⁷Vano mmosa a akumi ale axexe aahaavaha ankelo awo mathanu n'anli mihasa mithanu na miili sa eweero, sisareiyeene onanariwa wa Muluku, yoowo onkhala mahiku othene.

⁸Naanaanoru, emp'eyo ya Muluku yaahisareya mwiixi, waathoonyerya ovuwa n'uwerya wa Muluku. Khaavo awenrye okela mpaani-mmo, sihimalihenrye toko ihasara iye thanu na piili saruuhiwe ni ankelo athanu n'anli.