Revelation 14

¹Numala, miyo kaahiweha-tho, khumoona mwaapwittipwitthi emenle-ene vamwaako Siyooni. Yaahikhala vaavo ni yoowo atthu imiya miloko muloko ni miloko mixexe n'atthu imiya xexe yaale yaalempwe vayuuci nsina na mwaapwittipwitthi ni nsina n'Atiithi awe.

²Vano kaahiiwa nsu nikhumaka wirimu, naalikana n'uruma wa maasi manci-ene wala ni woopa wuulupale w'etari. Nsu nenlo kaiwaly'aka naalikana-tho n'anaviyela emoopaka viyel'aya.

³Atthu awo anci-ene yaaniipa nsipa na naanaano ohoolo w'ehice ni w'akumi axexe ni wa mahumu miloko miili n'axexe. Khaavo aawerya wiixutta nsipo nlo, ehikhanle atthu ale emiya miloko muloko ni miloko mixexe n'atthu emiya xexe, yoopoliwe w'elapo ya vathi.

⁴Ala t'ale ahinaphitaane n'athiyana okhala wira awo toowisinnanela. Ala t'ale animutthara mwaapwittipwitthi niyoopoliwe nipuro ti nipuro ninrow'awe, Yale yoopoliwe mw'atthu akina othene, ntoko milipu sivahiwe Muluku ni pwaapwittipwitthi.

⁵Awo khanaphwanyaniwe wootha mwaano mwaya: T'oreera murima paahi.

⁶Numala, kaahimoona munkelo nkina, aavava osulu-sulu. Aarina moolumo a Ehapari Yooreera yoohimala, wira aalaleerye atthu ankhala mulaponi-mu: Atthu a maloko othene ni mahimo othene ni a malavulelo othene ni a ilapo sothene.

⁷Munkelo owo aahihimya ituperyaka wira: Mmoveke Muluku, mmuttittimiheke Yoowo! Maana woophiya okathi onrow'awe walamula atthu othene. Mmukokhoreleke yoowo opattunxe erimu n'ilapo ya vathi n'iphareya n'iphattuwelo sa maasi!

⁸Munkelo mukina aahimutthara ole oopacerya iiraka: Woomora! O Papilooni wuulupale woomora! Iwo waahapalin'he atthu a maloko othene n'iviinyu yoonanara y'onamuttompe aya.

⁹Munkelo aneeraru aahaatthara ale anli oopacerya, akhuwelaka, wira: Akhala onrowa okokhorela nxeni n'ilatarato aya, n'utthittiwa ekanyeryo aya vayuuci wala va ntatani,

¹⁰yowo-tho onoowurya eviinyu y'onanariwa wa Muluku, yeeyo yooreera Muluku iitthenly'awe mukahini y'oviruwa wawe! Awo anoohaxiwa mmooroni ni mmwiixini ohoolo wa ankelo oreera n'uhoolo wa mwaapwittipwitthi.

¹¹Mwiixi wa mooro onrowa waahaaxa, onoowela wa mahiku othene. Ale ankokhorela nxeni n'ilatarato aya, etthittiwaka ekanyeryo ya nsina naya, khanrowa ohiya ohaaxiwa othana n'uhiyu.

¹²Tivo, atthu a Muluku, yaawo aniiwelela masu s'awe, animwaamini Yesu, ekhalaneke nthiti.

¹³Nto kaahiiwa nsu naakhuma wirimu, nihimyaka wira: ?Mulepe, ooreeriwa t'ale anikhwa akhwelaka mw'Apwiya okhuma naanaano va mpakha ohoolo.? Enihimya Erooho ya Muluku: Ayo, awo anoomumula m'ohaawani mwaya, okhala wira miteko saya sinimwaatthara.

¹⁴Vano kaahoona neeku nootteela ohoolo waka, vaneekuni vo, aahikilaathi mutthu aalikana ni Mwaana a Mutthu. Owo aawanre ekhara ya eweero mmuru mwawe ni aakunxe efonso, yoononiwa mmatatani mwawe.

¹⁵Munkelo mukina ahikhuma mpaani mwa Muluku, khukhuwela vanci-ene, akhuwelelaka munkelo ole aakilanthe aneekuni, iiraka: Murihele efonso vathi, muhepheke, okhala wira woophiya okathi w'ohepha. Ipyo solikana wira sihattiwe!

¹⁶Vano munkelo ole akilantte vaneekuni aahirihela efonso awe vathi, ipyo khuhemphwa.

¹⁷Vano, ankelo mukina ahikhuma mpaani mwa Muluku wirimu, ni owo-tho aahikuxa mwaalo woononiwa.

¹⁸Numala, ankelo mukina, yoowo aari mwaneene mooro, aahivenya vaalitaari, khunkhumwelela mukelo aakunxe mwaalo woononiwa, iiraka: Murihele mwaalo vathi, mwikitthe mihokokhorokho sa ivitera sa vathi, okhala wira soottokottha!

¹⁹Munkelo owo aahirihela mwaalo aya vathi, aahiikittha mihokorokho sa ivitera, khuttikhela mulittini n'onanariwa wuulupale wa Muluku.

²⁰Mihokorokho iyo saahiwammwa mulittini-mmo ota wa muttetthe: Vano mulittini-memmo mwaahikhuma mukhulaku w'ephome, khumwareya erakamelo aya mpakha ikilomo miloko muloko miraru ni wiixa waya mpakha iyano sa ikhavalo.