Revelation 13

¹Vano kaahoona nxeni nikhumaka mphareya nlo n'arina manyaka muloko ni miru mithanu na miili: Khula nnyaka naawanre ekhara, wa khula muru waahilempwa nsina n'onveha Muluku.

²Nxeni nlo naalikana ni havara: Inawu saya saari ntoko inawu sa namunyoma, iyano saya saalikana n'iyano sa kharamu. Nto ehanasi yaahivaha nxeni nlo ikuru saya n'ihice aya n'uwerya waya wuulupale.

³Vano wa miru seiyo, kaahoona muru mmosa ntoko woovulalihiwa ni okhwa, nto nikhwatta nlo noowiva naahivolihiwa nave elapo yothene ya vathi yaahitikinihiwa, khutthara nxeni nlo,

⁴nto atthu othene yaahikokhorela ehanas'iyo, okhala wira yaahivaha nxeni nlo owerya waya. Awo yaahikokhorela-tho nxeni nlo yiiraka: Ti pani oowerya ntoko nxeni nla? Ti pani onwerya owana ni nenla?

⁵Nxeni nlo naahivahiwa eyano yoolavula moolumo oowisinnuwiha ni moolumo ooveeha n'uwerya wira neettiherye mpakha myeeri miloko mixexe ni miili.

⁶Vano naahipacerya onveeha Muluku n'oruwana nsina nawe ni nipuro ninkhal'awe, ni waveeha ale ankhala wirimu.

⁷Naahivahiwa-tho owerya w'owana n'atthu a Muluku ni waaxintta: Khuvahiwa-tho otokhweene w'oruma maloko othene n'ilapo sothene ni malavulelo othene ni mahimo othene.

⁸Atthu othene ankhala elapo ya vathi anrowa okokhorela nxeni nlo: Eyo p'iyo, atthu yale masin'aya ahilempwe muliivuruni mw'ekumi ya mwaapwittipwitthi iiviwe y'eyo elempwe olumwenku ohipattuxiwe.

⁹Arina maaru oowiiwa animwiiwa.

¹⁰Ole opattuxeriwe okhala epottha, onookhala epottha tthiri: Ole ovahiwe wiiviwa ni xoowa, tthiri onimwiiviwa ni xoowa. Tivo, atthu a Muluku ekhaleleke nthiti waamini.

¹¹Vano, kaahoona nxeni nikina nikhumaka vathi v'etthaya. Naarina manyaka manli ntoko manyaka eepwittipwitthi, nave naalavula ntoko ehanasi.

¹²Nto nxeni nlo naanirumeela owerya wothene wa nxeni noopacerya, vamaithoni vaya. Naanaakhanyereriha atthu othene anikhala vathi okokhorela nxeni nlo noopacerya, nenlo naavonihiwe nikhwatta n'aya noowiva.

¹³Nxeni nlo nanenli ninniira mitikiniho suulupale, mpakha omoriha mooro wirimu, nimorihelaka mulaponi-mu, atthu othene yoonaka.

¹⁴Nlo ninnoototha maloko othene a vathi mwaha wa mitikiniho sivahiw'aya opaka vamaithoni va nxeni nle noopacerya: Ninniwiirela atthu othene ankhala mulaponi, wira epake elatarato yoottittimiherya nxeni nle nikina, nivulalihiwe ni xoowa, khukhala.

¹⁵Nxeni nlo naneenli naahivahiwa owerya wo wiiseelela iphumu s'ekumi elatarato ya nxeni, wira eyo eweryeke olavula n'uuwiiva atthu othene y'ale yaarowa okhootta okokhorela elatarato ya nxeni nlo.

¹⁶Nxeni nlo ninnakhanyereriha atthu othene, akhaani n'alupale, athaaciri, n'amasikhini, ipottha ni ootaphuwa, wira etthittiwe ekanyeryo muntatani noolopwana wala vayuuci.

¹⁷Wira ahikhale ontthuna owerya othuma wala otumiha, ohikhanle y'ole otthittiwe ekanyeryo ya nsina na nxeni wala nummaru na nsina n'aya.

¹⁸Vano ti vary'aya ankhili. Ole orina ankhili uupuwele nummaru na nxeni, maana nummaru nlo nnoniherya nsina na mutthu. Vano, nummaru nawe ti miloko miloko mithanu na mosa ni miloko mithanu na mosa ni thanu namosa.