Revelation 12

¹Vano, nthoonyeryo nuulupale naahikhumelela wirimu: Muthiyana awanre-ene nsuwa, inawu sawe aanyakenle mweeri nave ekhar'awe yaari ya itheneeri muloko ni piili.

²Ole aarupanle aanikhuwela n'uwerya w'oyara ahaawaka ehukhumu wira ayare.

³Wirimu weiwo waahikhuma-tho nthoonyeryo nikina: Yaari enowa yuulupalexa yooxeerya, yihaniwe ehana si yaarina miru mithanu na miili n'inyaka muloko; khula muru waawanre ekhara.

⁴Mwil'aya waarina mpantte waneeraru wa itheneeri, khurihela mulaponi. Vano ehanasi eyo yaahemela ohoolo wa muthiyan'owo ahalenle oyara, ephavelaka ommirya mwan'awe, ayariwakaru.

⁵Muthiyan'owo aahimuyara mwaana mwamulopwana: Mwaana yoowo ontthuna weettiherya maloko othene a vathi n'ekopo ya yuuma. Vano, mwanamwane owo aahikuxiwa, khurowaniwa wa Muluku mpakha veehiceni vawe.

⁶Muthiyan'owo aahitthyawela moothakoni, weiwo Muluku aamulokihenry'awe nipuro, wira owo akhapeleliwe muhina imiya miloko muloko ni mahiku imiya piili ni miloko mithanu na mosa.

⁷Numala, yaahikhumelela ekhotto wirimu, Mikhayeli n'ankelo awe yaahiwana n'ehanasi. Nave-tho ehanasi vamosa n'ankelo aya yaahiwana,

⁸Ehanasi n'ankelo aya yaahiweriwa, tivo khiyaawenrye-tho ophwanya opuro wirimu

⁹khuriheliwa ota. Ehanas'iyo yele ya khalayi, eniihaniwa Nwanani wala Satana, yeeyo eniwoototha atthu a maloko manci-ene. Eyo yaahiriheliwa elapo ya vathi: Ankelo aya yaahiriheliwa-tho mulaponi vamosa ni yeeyo.

¹⁰Numala, kaahiiwa nsu nikhuwelaka wirimu, nihimyaka wira: Vano woophiya woopowa n'uwerya n'omwene wa Muluku ahu n'ulamulela wa Kristu awe! Tthiri mulipa-oowootherya axinn'ihu, yoowo aari ohoolo wa Muluku ahu awootheryaka othana n'uhiyu, ooriheliwa vathi.

¹¹Tthiri awo aamuxintta owo, n'ephome ya mwaapwittipwitthi.

¹²Tivo, nyuwo erimu ni nyuwo othene munkhala weiwo mutthapeke, nto yootakhaliwa etthaya n'iphareya. Satana ookhuruwela wa nyuwo ananariwe-ene vanci-ene okhala wira onnisuwela wira okathi awe, ori vakhaaani.

¹³Vano ehanas'iyo voonaly'aya wira yaahiriheliwa vathi-va, yaahikelela omulupattha muthiyan'owo aamuyanre mwaana mwaamulopwana.

¹⁴Nto muthiyan'owo aahivahiwa mapupha manli a murumasi muulupale, wira avave arowaka woopuroni w'awe woothakoni, weiwo aarowawe okhapeleliwa mpakha iyakha tthaaru ni miyeeri mithanu na mosa, aakiheriwaka ehanasi.

¹⁵Vano ehanasi yaahikumiha maasi mwaano mw'aya, ntoko muro, erapheelaka ottuli wa muthiyan'owo, wira apuruliwe ni maasi yaawo.

¹⁶Nto etthaya yaahimukhaliherya muthyiyn'owo, eyo yaahaathama khumirya muro waakhumme mwaano mw'ehanasi.

¹⁷Ehanasi yaahinviruwela muthiyan'owo, khurowa owana n'osuulu awe waahanle, yoowo weettela sooruma sa Muluku ni wamukhalenle onamoona Yesu.

¹⁸Vano ehanas'iyo yaaheemela vamihaavani ophareya.