Revelation 11

¹Numala itthu iya, kaahivahiwa muthali w'ophima, waalikana n'ikopo, khuhimeeriwa wira: Nvenye, mwaphime empa ya Muluku n'altaari, nwalikele n'ale ankokhorela memmo.

²Vano muhiphime niyate n'ota w'empa ya Muluku: Muhiye, okhala wira avahiwe amalapo. Awo anoonyakela oYerusalemu, muttetthe wothanliwa, mpakha miyeeri miloko mixexe ni miili.

³Miyo kinimwaaruma anamoon'aka anli, ewanreene isaakho, orowa olaleya ni nsina naka mpakha mahiku awo emiya emosa ni mahiku miloko miloko miili ni mahiku miloko mithanu na mosa.

⁴Anamoon'ala anli ti miri miili s'olivera ni mithuko miili seemenle ohoolo w'Apwiya a mulaponi.

⁵Vakhala wira awanani aya antthuna owiiriha yootakhala, okhume mooro mwaano mw'anamoon'awo anli, ontthuna wapwetexa awanani aya, nave akhala mutthu ontthuna owiiriha yootakhala iiviwe.

⁶Awo aakhalana owerya w'otthukwa wirimu, wira ehirupe epula okathi wothene onlaleyaya Ehapari ya Muluku. Siiso-tho, awo aakhalana owerya w'otatuxa maasi, ekhale ephome, ni w'ohonona elapo n'ihasara sinci-ene, okathi wothene ontthun'aya.

⁷Okathi vanrow'aya omaliha olaleya onamoon'aya, enama yoowali enookhuma mweehimeni moowixexa, ewane ni yaawo: Enrowa waawerya n'uwiiva.

⁸Nave mirutthu saya sinrowa wataleliwa mphironi mwa muttetthe muulupale, yoowo ekanyeryo aya enihimya Sotoma ni Exitu, weiwo okhomeliw'awe pwiy'aya.

⁹Atthu a ilapo sothene ni a maloko othene ni a ilavulelo sothene ni oomwene wothene animoorwa woona mirutthu saya mpakha mahiku mararu, nnuusu, ekhoottaka ovitha mirutthu seiyo mmahiye.

¹⁰Atthu a mulaponi mothene anootteliwa murima n'ukhwa w'anamoon'ala anli: Awo anootthapa, anooruhelana soovaha sooreera akina n'akhw'aya, maana maprofet'awo manli ahaaruhela atthu oohaawa wuulupale.

¹¹Vano-nto n'uvira mahiku mararu nnuusu, saahirwa wa Muluku iphumu s'ekumi, khwaakela yaawo, vano awo khuvenya-thoyeemela. Othene ale yawoonne, yaahituthuwa ni woova wuulupale.

¹²Vano maprofet'awo manli yaahiiwa nsu noorunya nikhumaka wirimu, naahimeeryaka wira: ?Nwele va!? Awo yaahiwela wirimu, eviraka muneekuni, ewehiwaka n'awanani aya.

¹³Okathi ene yoowo, yaahikhumelela etetere yuulupale: Mpantte wanamuloko wa muttetthe waahihononeya, atthu imiya thanu na piili yaahikhwa mwaha w'eteter'eyo. Atthu akina yaahisareya woova, khunvuwiha Muluku a wirimu.

¹⁴Otakhaliwa wanenli woovira: Nto mwipasoopeke! Otakhaliwa waneeraru onoophiya naanaano!

¹⁵Vano munkelo aneethanu nanli aahoopa nlope nawe, nave wiirimu yaahikhala masu manci-ene yaahimya wira: Omwene wa mulaponi woorukunuwa khukhala wa Apwiy'ahu ni khukhala wa Kristu, nave owo onookhala wa mahiku othene.

¹⁶Mahumu miloko miili n'axexe, yaakilantte mweehiceni mwaya ohoolo wa Muluku, yaahikokhora, yuramaka mpakha vathi, emukokhorelaka Muluku,

¹⁷yiiraka: Nyuwo Pwiya, Muluku oowerya sothene, mukhanle ni mwaakhala! Hiyo ninnooxukhuruni okhala wira muheettiha owerya wanyu wuulupale, khukhaliha omwene anyu.

¹⁸Amalapo aananariwa vanci-ene: Nto okathi w'oviruwa wanyu woophiya. Woophiya okathi wo waalamula alipa-ookhwa, woophiya okathi onrowanyu waatthuvela maprofeta, arumeyi anyu, n'atthu ooreera murima othene, ni othene ale anoottittimihani, aalupale n'akhaani. Woophiya okathi wo wapwetexa ale anihonona elapo.

¹⁹Vano, yaahihuleya empa ya Muluku, eri wirimu, nivuku no waataana naahooniwa mpaani memmo. Wahikhumelela overunya n'ukukutteya n'itari n'itetere n'ipula ya maralala.