Revelation 10

¹Numala kaahimoona munkelo mukina a ikuru, akhuruwaka wirimu, aawanre meeku: Ekhweyi y'ari vasulu va muru awe, owiitho wawe waari ntoko nsuwa, metto sawe saari ntoko maripu a mooro.

²Ahikuxa mmatatani eliivuru yaamukhaani yookhunuliweene, nnawu noolopwana nanyakenle ephareya, nnawu noothiyana nanyakenle etthaya.

³Vano, aahikhuwela yiiituperyaka, ntoko wiipa w'akharamu. Vamanly'awe okhuwela, itari thanu na piili saahilavula n'ukukutteya waya.

⁴Vamanly'aya okukutteya itar'iyo thanu ni piili, miyo kaatthuna olepa, nto kaahiiwa nsu naakhuma wirimu, nihimyaka wira: Muhilep'etthu, musuke mmurimani mwanyu soohimeeryaayani itar'iyo.

⁵Vano, vaamoonaly'aka munkelo anyakenle-ene ephareya ni anyakenle-ene etthaya, aahittukhulela ntata noolopwana osulu.

⁶Nave khulapela nsina nawe ole onikhala wa mahiku othene, Yoowo opattunxe erimu n'ilapo ya vathi, opattunxe ephareya ni sothene sinikhala memmo, vano khivampisa-tho.

⁷Nto okathi munkelo a neethanu nenli onrow'awe woopa nlope, Muluku onoomaliherya otthuna wawe waaipithihaly'awe, siisaale saahimeeraly'awe arumeyi awe, maprofeta.

⁸Numala, nsu naaiwaly'aka nikhumaka wirimu, naahikilavuliha-tho niiraka: Murowe mwakuxe eliivuru yaamukhaani yookhunuliwa eri mmatatani mwa munkelo eemenle vasulu va phareya ni vatthayani!

⁹Miyo kaahimwaattamela munkelo owo, khunvekela wira akivahe eliivuru iyo yaamukhaani. Mukelo aahikiirela wira: Mukuxeke, mukhuureke. Mwaano mwanyu munrowa onaya ntoko oravo, nto munipwiipwiini mwanyu munrowa owaawa.

¹⁰Miyo kaahikuxa eliivuru iyo yaamukhaani mmatatani mwa munkelo, kikhuura: Vano mwaano mwaka yaamunaya ntoko oravo, nto vaaminry'aka napwiipwi aka aahiwaawa.

¹¹Vano, kaahileeliwa wira: Nyuwo muhaana olaleya-tho ehapari ya Muluku, mulaleeryaka maloko manci-ene n'ilapo n'ilavulelo ni mamwene manci-ene.