Revelation 9

¹Vano, munkelo aneethanu aahoopa nlope: Naanaanoru, kaahoona etheneeri emosa ekhumaka wirimu, khumorela vathi, owo aahivahiwa muhulelo w'ehime yoowiixexa.

²Vano aahitthukula ehim'eyo yoowixexa: Mweehimeni-mme khukhumaka mwiixi, waari ntoko mwiixi wa muhuru muulupale. Nsuwa n'osulu naahiriipa mwaha wa mwiixi uwo watthuwa mweehimeni.

³Mmwiixini memmo ahikhuma nasope, khumwareela mulaponi: Nasope owo aahivahiwa owerya waalikana n'uwerya wa ikhororopwe sa mulaponi.

⁴Nave yaahihimeeriwa wira ehiirihe yootakhala malaxi a mulaponi, hata itthu sikina sikithi, nnakhala mwiri mmosa, nto yaahonone atthu y'ale paahi ahikhalanne ekanyeryo ya Muluku vayuuci v'aya.

⁵Nasope owo khatthuniheriwe owiivakasa atthu awo, masi arummwe waahaaxa mpakha miyeri mithanu. Ohaaxa waawoonih'awe atthu w'ari ntoko owerya w'ekhororopwe yamuluma mutthu.

⁶Mahiku awo, atthu anoophavelesa okhwa nto khanrowa ophwanya, nave-tho anootthuna okhwa nto okhwa iwo onimwaatthyawa.

⁷Nasope owo amulikana n'ikhavalo silokiheriwe owana ekhotto. Vamuru vawe vaahikhala ntoko ikhara sa eweero: Minupi saari ntoko owitho wa mutthu;

⁸ikharari sawe saari ntoko ikharari sa muthiyana: Maino awe yaari ntoko maino a kharamu.

⁹Owo aahiwara yoowara ya yuuma. Oruma wa mapuph'awe waalikana n'uruma wa ikaaro sinci-ene, simpuruliwa n'ikhavalo, sitthimakelaka okhottoni.

¹⁰Aahikhalana miila ni mpuula ntoko ikhororopwe: Mmiilani mmo ti mwaari-mo owerya wawe wo wavulaliha atthu, okathi wa miyeeri mithanu.

¹¹Nasope owo aahikhalana mwene awe, aari munkelo w'ehime yoowiixexa. Nsina nawe mwene owo ti Muhononi.

¹²Otakhaliwa woopacerya woovira, moone, woohala-tho otakhaliwa wa imaara piili ontthuna orwa.

¹³Vano munkelo aneethanu na mosa aahoopa nlope nawe: Vano miyo kaahiiwa nsu naakhuma mmanyakani maxexe a altaari aweero, yaari ohoolo wa Muluku.

¹⁴Nsu nlo naahimuhimeerya munkelo a neethanu na mosa, aarina nlope wira: Mwaataphule ankelo ale maxexe atthukweliwe wattamela muro muulupale wa Eufrate.

¹⁵Vano ankelo awo axexe khutaphuliwaka: Awo yaahilikanela okathi ule wa nihiku nle na mweeri ule w'eyaakh'ele, wira ewivakase atthu a mpantte waneraru.

¹⁶Vano, miyo kaahiiwa mwaattelo aya wira anakhavalo a ekhotto yaari anci-ene oohaalikeleya.

¹⁷Enamuna yoonalyaka ikhavalo iyo n'anakhavalo aya t'ila: Anakhavalo yaawanre vatthirima eyuuma ntoko mooro, yooripelela ntoko erimu ya ncano ntoko soofiri. Miru sa ikhavalo saalikana ni miru s'akharamu: Vano, mwaano mwaya mwaanikhuma mooro ni mwiixi ni esoofiri.

¹⁸Muhina wa sootakhala iyo tthaaru sikhanle: Mooro ni mwiixi ni esoofiri, saakhuma mwaano mwa ikhavalo saahiwiiva mpantte wa neeraru w'atthu.

¹⁹V'ekeekhayi, ikuru sa ikhavalo saari mwaano mwaya ni mmiilani mwaya. Nave miila saya salikana n'inowa, saarina miru: Ni miru seiyo ti sawirihanaya atthu sootakhala.

²⁰Atthu akina yaahanle, y'ale yahaaviwe ni sootakhala iyo, khiyaattharunwe wira sootakhala siiraya: Khiyaahiyerenrye waakokhorela a Satana n'itthu sipakiwe n'iweero n'iparatha n'iyuuma ni maluku ni miri, seiyo sihinwerya woona nnakhala wiiwa wala weetta.

²¹Atthu awo khiyaattharunwe owiiva akhw'aya, khiyaahiyale okhwiri n'uraruwa ni wiiya.