Revelation 8

¹Vano mwaapwittipwitthi aahitaphula ekanyeryo yaneethanu nanli: Vataphunly'awe, wirimu wahimaaleleya okathi mmosa nnuusu oohilavuliwaka.

²Numala, miyo kaawoona ankelo athanu n'anli yeemenleene ohoolo wa Muluku: Awo yaahivahiwa malope mathanu na manli.

³Aahirwa munkelo mukina akunxe-ene muhasa wa eweero, w'opaha-mo erupani, khweemela vakhiviiru w'altaari, owo aahivahiwa erupani yinci-ene wira avahe w'altaari a eweero ni mavekelo a atthu othene ooreera murima ohoolo w'ehive.

⁴Nave mwiixi w'erupani waatthuwa mmatatani mwa munkelo, ni mavekelo a atthu ooreera murima yaahiphiya wa Muluku.

⁵Numala munkelo owo waahikuxa muhas'owo wa eweero, khusariha mooro w'altaari, khurihela mulaponi. Naanaanoru, khukhumelela overnya n'ukukutteya n'itari n'itetere.

⁶Vano, ankelo athanu n'anli, yaarina malope mathanu na manli, yaahiilokiherya wira yoope.

⁷Munkelo oopacerya ahoopa nlope n'awe: Naanaanoru, khukhumelela epula ya maralala ni mooro, otakahereiye-ene n'iphome, khuriheliwa mulaponi. Waahipahiwa mpantte waneeraru w'elapo: Khupahiwa-tho mpantte waneeraru wa miri ni munyepu wothene.

⁸Numala, munkelo a nenli ahoopa nlope nawe: Naanaanoru, khukhumelela ntoko mwaako muulupale waavarela mooro, khuriheliwa mphareya. Mpantte waneeraru wa phareya waahirukunuwa, khukhala ephome.

⁹Mpantte waneeraru wa itthu sikumi mphareya saahikhwa, nave khuhononeya mpantte waneeraru wa ikalawa sothene.

¹⁰Numala, munkelo a neeraru ahoopa nlope nawe: Naanaanoru, etheneeri yuulupale, yaavarela ntoko muthuko, yaahimora wirimu, emorelaka mpantte waneeraru wa miro n'iphattuwelo sa maasi.

¹¹Nsina ni etheneer'eyo ti Owaawa. Mpantte waneeraru wa maasi waahirukunuwa, maasi awo khukhala oowaawa. Atthu anci-ene, yaawunrye maasi awo oowaawa, yaahikhwasa okhala wira maasi awo yaari oowaawa.

¹²Munkelo a aneexexe aahoopa nlope, nto khupaha epantte ya neeraru ya nsuwa, ni ya mweeri ni wa itheneeri, siiso epantte aya yomwaleela ya neeraru yaahiriipihiwa khuhikhala omwaleela mpakha epantte ya neeraru y'othana nnakhala-tho w'ohiyu.

¹³Vano nto, kaahimoona ni kaahimwiiwa murumaasi aavava wirimu-rimu, akhuwelaka vanci-ene aanihimya wira: Aatakhaliwa! Aatakhaliwa! Aatakhaliwa ale ankhala elapo ya vathi, mwaha w'oruma wa malope ahanle a ankelo araru yaawo nlelo anrowa woopiwa.