Revelation 7

¹Numala itthu iya, kaahiwoona ankelo axexe yemenle-ene va maloothoni maxexe a olumwenku oovirikana oolumwenku; awo yaanivarelela ipheyo sooxexe sa mulaponi, wira ehikhale epheyo yaarowa woopela elapo, nnakhala mphareya wala mmirini hata mmosa.

²Kaahoona-tho munkelo mukina arwaaka onikhuma nsuwa akunwe-ene ekanyeryo ya Muluku a ekumi, nave owo aaniwiitthana ankelo awo axexe akhuwelaka, yaawo yaavahiwe owerya woohonona elapo n'iphareya,

³yiiraka: ?Muhihonone elapo wala ephareya nnakhala miri, mpakha hiyo w'atthittya ekanyeryo arumeyi a Muluku ahu vayunci vaya.?

⁴Vano ale yaatthittiwe ekanyeryo ya Muluku, kaahiiwa wira yaari atthu imiya miloko muloko n'imiya miloko mixexe n'atthu imiya xexe a mahimo othene a Isarayeli:

⁵Yaatthittiwe atthu imiya miloko muloko ni piili a nihimo na Yuta, imiya miloko muloko ni piili a nihimo na Rupeni, imiya miloko muloko ni piili a nihimo na Kati;

⁶imiya miloko muloko ni piili a nihimo n'Aseri, imiya miloko muloko ni piili a nihimo na Nefetali, imiya miloko muloko ni piili a nihimo na Manase;

⁷imiya miloko muloko ni piili a nihimo na Simeyoni, imiya miloko muloko ni piili a nihimo na Levi, imiya miloko muloko ni piili a nihimo na Isakari;

⁸imiya miloko muloko ni piili a nihimo na Sapuloni, imiya miloko muloko ni piili a nihimo na Yosefe, imiya miloko muloko ni piili a nihimo na Penxamini.

⁹Numala, itthu iya, naanaanoru kaahoona muttitthi muulupale w'atthu yaawo khaavo aawerya owaalikela, awo yaaruiye ilapo sothene, ni maloko othene, ni mahimo othene ni ilavulelo sothene, awo yeemenle ohoolo w'ehice ya mwaapwittipwitthi, ewanre-ene soowara sotteela, ekunxe-ene makukhu mmatatani mw'aya.

¹⁰Awo yaanikhuwela yiituperyaka wira: Woopola ti wa Muluku ahu, yoowo okilanthe vehiceni, ni ti wa mwaapwittipwitthi.

¹¹Ankelo othene yaarimweemela erukurenryeene ehice ni makhulupale n'akumi axexe. Naanaanoru, yaahuuramela ohoolo w'ehice, khumukokhorela Muluku,

¹²ehimyaka wira: Amen! Ottottopela n'uvuwa n'usuwela, oxukhuru n'uttittimiha n'uwerya n'ikuru sikhale sa Muluku ahu wa mahiku othene! Amen!

¹³Vano humu mmosa aahikikoha, iiraka: T'ani ale awanre malaya ootteela? Ankhuma vayi?

¹⁴Miyo kaahimwaakhula wira: Pwiya, musuwenle ti nyuwo! Vano owo aahikihimeerya wira: Ale ti yaale yahaareere ohaaxiwa. Ale aakattha malay'aya, khutteeliha mphomeni mwa mwaapwittipwitthi.

¹⁵Tivo veemenlyaya ohoolo w'ehice ya Muluku, khiyamurumeela othana n'uhiyu, mpaani mwawe. Vano ole okilanthe veehiceni onookhala ni yaawo ni onimwaakhapelela.

¹⁶Awo khanrowa ovoliwa-tho etala wala ntthona. Khanrowa opahiwa-tho ni nsuwa wala n'uviha wooluttuwaxa.

¹⁷Tthiri, mwaapwittipwitthi okilanthe eriyari y'ehice onrowa okhala makampusi aya, onimwaahoola ori maasi a ekumi, nave Muluku onoopuputtha maithori othene mmaithoni mw'aya.