Revelation 6

¹Vano miyo kaahimoona mwapwittipwitthi ataphulaka ekanyeryo yoopacerya wa ikanyeryo iyo thanu na piili. Vano kaahimwiiwa mmosa aakumi awo axexe ahimyaka ni nsu noowituperya ntoko etari, iiraka: ?Murwe!?

²Naanaanoru, kaahoona ekhavalo yootteela. Mulipa-oweettiha ekhavalo eyo aahikhalana muura, khuvahiwa ekhara y'ovuwa, maana aari mulipa-ooxintta. Owo aahivenya wira nlelo axintteke.

³Numala, mwaapwittipwitthi otaphula ekanyeryo yanenli, miyo kaahimwiiwa mukumi anenli aahimyaka wira: ?Murwe!?

⁴Vano yaahikhuma ekhavalo ekina, yaari yooxerya ntoko mooro. Mulipa-ooweettiha ekhavalo eyo aahivahiwa owerya w'okumiha mureettele mulaponi, wira atthu yivananeke. Owo aahivahiwa xoowa muulupale.

⁵Vano mwaapwittipwitthi aahitaphula ekanyeryo yaneeraru, ni miyo kaahimwiiwa mukumi aneeraru ahimyaka wira: ?Murwe.? Naanaanoru kaahoona ekhavalo yooripa. Mulipa-oweettiha ekhavalo eyo aakunxe epalansa mmatatani mw'awe.

⁶Vano kaahiiwa oruma ntoko nsu, nikhumaka eriyari y'akumi awo axexe, nihimyaka wira: Mphimo mmosa, wa triku onthumwa n'itenario emosa, miphimo miraru sa meele sinthummwa n'iterario emosa: Nto muhihonone eviinyu ni makhura.

⁷Vano Owo aahitaphula ekanyeryo yaneexexe, miyo kaahimwiiwa mukumi aneexexe ahimyaka wira: ?Murwe!?

⁸Vano kaahoona ekhavalo yancano, mulipa-oweettiha aaihaniwa okhwa nave mukina iihaniwa omooroni aanimutthara yoowo, nave yaahivahiwa owerya wa wiiva atthu wa mpantte wa neexexe w'elapo, wira ewiive n'ixoowa, n'itala, n'iretta ni muhina wa inama soowoopiha sa mulaponi.

⁹Vano mwaapwittipwitthi aahitaphula ekanyeryo yaneethanu, miyo kaahoona vathi v'altari minepa s'atthu ale aiviwe mwaha ale aiviwe mwaha w'olaleya masu a Muluku mwaha w'okhalana onamoona w'ororomeleya.

¹⁰Awo yaaninla ekhuwelaka wira: Pwiya oowerya sothene, ooreera murima ni a ekeekhayi. Muntthuna waalamula liini atthu a vathi va? Muntthuna waahukhumu liini ale aniivale?

¹¹Vano khula mutthu a yaawo oovahiwa nlaya noottela, khuhimeeriwa wira emumuleke-tho vakhaani, mpakha omalelihiwa mwaattelo w'arumeyi apatthani aya ni axinn'aya yaawo, yaarowa wiiviwa ntoko awo siiviwaya.

¹²Vano, kaahimoona mwaapwittipwitthi ataphulaka ekanyeryo yaneethanu na mosa; naanaanoru, yaahikhumelela etetere yuulupale, nsuwa naahikhala nooripexa ntoko exile; mweeri wothene waahikhala wooxerya ntoko ephome;

¹³nto itheneeri saahimorela vathi, ntoko mpheera mihokorokho saya sikithi simmoraya mmwirini mwaya sittikinyiwaka n'ipheyo yuulupale;

¹⁴erimu yaahinyaanyeya ntoko epaphelo ekhuniwe, miyaako sothene n'isisiro sothene saahiphelasiwa mmapuroni mwaya.

¹⁵Vano, mamwene a mulaponi ni makuvernatoro ni makhulupale aanakhotto n'athaciri n'alipa oowerya n'atthu akina othene, ipottha n'alipa-ootaphuwa, yaahitthyawela mmakhukuni n'iriyari ya miyala sa miyaako,

¹⁶khukhuwelela miyaako iyo ni miyala wira: Munimorele hiyo, munivithe wira ole okilanthe vehiceni ahinoone, onanariwa wa mwaapwittipwitthi ohinipwanye!

¹⁷V'ekeekhayi, nihiku nuulupale n'onanariwa waya noophiya: T'ani onwerya ohala?