تاريخ اول 10

¹فلسطینیانو د جلبوع په غره کې د اسراییلو سره جګړه وکړه. په هغه ځای کې ډېر اسراییلیان ووژل شول او پاتې یې چې په هغو کې شاوول پاچا او د هغه زامن هم شامل وو، وتښتېدل.

²خو فلسطینیانو هغوی ډېر سخت تعقیب کړل او د شاوول درې زامن، یوناتان، ابیناداب او ملکیشوع یې ووژل.

³په شاوول باندې جګړه ډېره سخته شوه او کله چې د فلسطینیانو غشي ویشتونکي هغه ته ورسېدل، نو هغه یې سخت ټپي کړ.

⁴شاوول خپل عسکر ته چې د هغه وسله یې لېږدوله وویل: «خپله توره راوباسه او ما ووژنه، ترڅو دا کافر فلسطینیان مې په عذاب نه کړي.» خو هغه ځوان له دې کاره ډېر ووېرېد. نو شاوول خپله توره راواخیستله او ځان یې ورباندې وغورځاوه.

⁵کله چې هغه ځوان ولیدل چې شاوول مړ شوی دی، نو هغه هم په خپلې تورې باندې ځان وغورځاوه او مړ شو.

⁶نو په دې ډول شاوول او د هغه درې زامن ټول یو ځای مړه شول او د هغه شاهي کورنۍ له منځه لاړه.

⁷کله چې هغو اسراییلیانو چې د یزرعیل په دره کې اوسېدل دا خبره واورېدله چې لښکرې تښتېدلې دي او شاوول او د هغه زامن مړه شوي دي، هغوی خپل ښارګوټي پرېښودل او وتښتېدل. نو فلسطینیان راغلل او په دغو ښارونو کې ځای په ځای شول.

⁸له جګړې یوه ورځ وروسته فلسطینیان د مړو د لوټلو دپاره ورغلل، نو هغوی د شاوول او د هغه د زامنو مړي وموندل چې د جلبوع په غره کې پراته وو.

⁹دوی د شاوول سر پرې کړ، له هغه څخه یې زغرې وویستلې او د فلسطین ټول هېواد ته یې استازي ولېږل چې دا زېری د خپلو بتانو او خپلو خلکو په منځ کې خپور کړي.

¹⁰دوی د شاوول وسلې د خپلو بتانو په عبادت خانه کې کېښودلې او د هغه سر یې د خپل بت یعنې د داجون په عبادت خانه کې ځوړند کړ.

¹¹کله چې په جلعاد کې د یابیش د ښار ټولو خلکو د هغه څه په اړه چې فلسطینیانو په شاوول باندې کړي وو، واورېدل،

¹²تر ټولو زړور سړي لاړل، د شاوول او د هغه د زامنو مړي یې راوړل او یابیش ته یې یووړل. هغوی دا مړي هلته د څېړۍ د ونې لاندې ښخ کړل او اووه ورځې یې روژه ونیوله.

¹³‏-

¹⁴شاوول ځکه مړ شو چې هغه بې وفا ؤ او د څښتن اطاعت به یې نه کاوه. هغه حتی د څښتن په ځای له یوې کوډګرې سره مشوره وکړه. نو ځکه څښتن شاوول وواژه او د هغه پاچاهي یې د یسي زوی داود ته ورکړه.