اول پادشاهان 7

¹مګر سلیمان د خپلې ماڼۍ په جوړولو باندې دیارلس کاله تېر کړل او هغه یې بشپړه کړه.

²د ماڼۍ هغه سالون چې د لبنان د ځنګل د سالون په نوم یادېده څلورڅلوېښت متره اوږدوالی، دوه ویشت متره سور او دیارلس نیم متره لوړوالی درلود. هغه د صبر د ونو د ستنو څلور قطاره درلودل چې د صبر تیران ورباندې پراته وو.

³د دې سالون د صبر د لرګیو بام د تیرانو دپاسه ؤ، کوم چې په ستنو باندې پراته وو. ټول پنځه څلوېښت تیران او په هر یو قطار کې پنځلس تیران وو.

⁴د هغې کړکۍ ګانې په درې قطارونو کې یو او بل ته مخامخ ایښودل شوې وې.

⁵دروازو او کړکیو مستطیل شکله چوکاټونه درلودل او په هر دېوال کې د کړکیو درې قطاره یو او بل ته مخامخ وو.

⁶بل سالون چې د ستنو د سالون په نوم یادېده، دوه ویشت متره اوږد او دیارلس نیم متره یې سور ؤ. د هغه مخې ته یو دالان ؤ چې بام یې درلود او په ستنو باندې ټینګ شوی ؤ.

⁷د پادشاه د تخت کوټه چې د قضاوت د سالون په نوم هم یادېدله، یعنې هغه ځای چې سلیمان به په کې دعوې فیصله کولې، د غولي څخه تر چته پورې یې د صبر د لرګیو تختې درلودلې.

⁸د سلیمان خپل کور په بل انګړ کې د قضاوت د سالون شاته ؤ چې د نورو ودانیو په شان جوړ شوی ؤ. همدارنګه سلیمان د فرعون د لور دپاره چې هغه ورسره واده کړی ؤ د دې کور په شان یو کور جوړ کړ.

⁹دا ټولې ودانۍ د بیرون څخه تر لوی انګړه پورې او د تهداب څخه تر بامه پورې د ډېرو ښو تیږو د تختو څخه چې په ټاکلو اندازو غوڅې شوې وې او بیروني او دننني مخونه یې په آره باندې غوڅ شوي وو، جوړې شوې وې.

¹⁰تهدابونه یې په ډېرو ښو لویو تیږو باندې چې ځینې یې څلورنیم متره او ځینې یې درې نیم متره اوږدوالی درلود ایښودل شوي وو.

¹¹د هغو دپاسه په ټاکلو اندازو غوڅې شوې ډېرې ښې تیږې او د صبر د لرګیو تیران وو.

¹²د ماڼۍ د لوی انګړ دېوال چې د انګړ څخه چاپېره شوی ؤ، د څښتن د کور د داخلي انګړ او د هغه د دالان په شان درې طبقې توږل شوې تیږې او یوه طبقه د صبر د لرګیو تیران یې درلودل.د حورام کار

¹³سلیمان پادشاه یو سړی راوغوښت چې حورام نومېده او د صور په ښار کې اوسېده.

¹⁴هغه د نفتالي د قبیلې څخه د یوې کونډې زوی ؤ او د هغه پلار د صور څخه ؤ او د برنجو کسبګر ؤ. حورام ډېر ماهر او پوه سړی ؤ او د برنجو په هر ډول کار کې یې تجربه درلودله. هغه سلیمان پادشاه ته راغی او ټول هغه کارونه چې ورته سپارل شوي وو سرته یې ورسول.

¹⁵حورام دوه برنجي ستنې په قالب کې جوړې کړې چې د هرې یوې لوړوالی اته متره او ګردچاپېر یې پنځه متره او دېرش سانتي ؤ.

¹⁶همدارنګه هغه د قالب شویو برنجو څخه دوه تاجونه جوړ کړل او د ستنو په سر باندې یې کېښودل. هر تاج دوه متره او شل سانتي لوړ ؤ.

¹⁷د اوبدل شویو ځنځیرونو یو جال ؤ چې د ستنو په سر باندې یې تاجونه سینګار کړي وو. د هر تاج دپاره اووه دانې ځنځیرونه وو.

¹⁸هغه په دوه قطارونو کې برنجي انار جوړ کړل چې د هر جال څخه راتاو شي او هغه تاجونه چې د ستنو په سر باندې دي، ښکلي کړي.

¹⁹هغه تاجونه چې په دالان کې د ستنو په سر باندې وو، د سوسن د ګلونو په شکل وو او یو متر او اتیا سانتي لوړوالي یې درلودل.

²⁰د دواړو ستنو په تاجونو باندې د کاسه شکله برخې دپاسه چې د جال په څنګ کې وه په چارچاپېره قطارونو کې دوه سوه برنجي اناره وو.

²¹حورام د خدای د کور د دروازې په مخکې دا دوه برنجي ستنې ودرولې. د جنوبي خوا ستن یې د یاکین په نوم او د شمالي خوا ستن یې د بوعز په نوم یاده کړه.

²²د ستنو په سر باندې د سوسن د ګلونو په شکل برنجي تاجونه وو. په دې توګه د ستنو کار سرته ورسېده.

²³حورام د برنجو څخه یوه ګرده ټانکۍ جوړه کړه، چې ژوروالی یې دوه متره او شل سانتي، قطر یې څلورنیم متره او ګردچاپېر یې دیارلس نیم متره ؤ.

²⁴د ټانکۍ د غاړې ګردچاپېره د برنجي کدوانو دوه قطارونه وو، چې د ټانکۍ د نورو برخو سره یوځای قالب شوي وو.

²⁵ټانکۍ د دولسو برنجي غوایانو په شا باندې ولاړه وه چې درې یې شمال ته، درې یې جنوب ته، درې یې ختیځ ته او درې یې لوېدیځ ته مخامخ وو. ټانکۍ د هغو دپاسه وه او د هغو سرونه بیرون خواته وو.

²⁶د هغه پنډوالی پنځه اویا ملي متره ؤ او څنډه یې د جام د څنډې په شان وه، لکه د سوسن د غوړېدلي ګل په شان. په دې ټانکۍ کې د څلوېښت زرو لیترو نه زیاتې اوبه ځائېدلې.

²⁷همدارنګه حورام لس برنجي ګاډۍ جوړې کړې چې هرې یوې یو متر او اتیا سانتي اوږدوالی، یو متر او اتیا سانتي سور او یو متر او دېرش سانتي لوړوالی درلود.

²⁸د ګاډیو نقشه په دې ډول وه: د ګاډۍ په چوکاټونو کې څلور کنجه تختې ایښودل شوې وې.

²⁹په څلور کنجه تختو باندې د زمریانو، غوایانو او کروبیانو نقشونه وو. په چوکاټونو باندې د زمریانو او غوایانو د نقشونو دپاسه او لاندې د ګلانو د غنچو نقشونه وو، چې د ټکول شوي فلز څخه جوړ شوي وو.

³⁰هرې ګاډۍ د برنجي اکسلونو سره څلور برنجي عرابې درلودلې. د تشت دپاره په څلورو کنجونو کې برنجي کومکي میلې وې. د هغو په هر اړخ کې د ګلانو د غنچو نقشونه وو.

³¹د تشت دپاره د ګاډۍ په سر باندې یو ګرد چوکاټ ؤ. هغه د ګاډۍ د سر څخه پنځه څلوېښت سانتي متره پورته خواته او اووه شپېته سانتي متره لاندې دننه خواته غزېدلی ؤ. د خولې چارچاپېره یې چې ګرده وه نقشونه ایستل شوي وو. د ګاډیو تختې ګردې نه وې، بلکه څلور کنجه وې.

³²څلور عرابې د تختو لاندې وې او د عرابو اکسلونه د ګاډیو پورې نښتي وو. د هرې عرابې قطر اووه شپېته سانتي ؤ.

³³نوموړې عرابې د جنګي ګاډیو د عرابو په شان جوړې شوې وې. د هغوی اکسلونه، ژۍ ګانې، پرې او د عرابو منځنۍ برخې ټول په قالب کې د برنجو څخه جوړ شوي وو.

³⁴د هرې ګاډۍ په لاندینیو څلورو کنجونو کې څلور کومکي ستنې وې چې د ګاډۍ سره نښتې وې.

³⁵د ګاډۍ په سر باندې یوه ګرده کړۍ وه چې دوه ویشت سانتي لوړوالی یې درلود. کومکي ستنې او تختې د ګاډۍ د سر پورې نښتې وې.

³⁶هغه په کومکي ستنو او تختو باندې په هر خالي ځای کې د کروبیانو، زمریانو او د خرما د ونو نقشونه جوړ کړل او د هغو سره چارچاپېره د ګلانو د غنچو نقشونه وو.

³⁷په دې ډول هغه لس ګاډۍ جوړې کړې، چې ټولې په یو قالب کې جوړې شوې وې او د اندازې او شکل له مخې یو شان وې.

³⁸همدارنګه حورام لس برنجي تشتونه جوړ کړل چې د هرې ګاډۍ دپاره یو تشت ؤ. د هر تشت قطر یو متر او اتیا سانتي ؤ او شاوخوا اته سوه لیتره اوبه په کې ځائېدل.

³⁹هغه پنځه ګاډۍ د خدای د کور په جنوب کې او پنځه یې په شمال کې ځای په ځای کړې. د خدای د کور په جنوب ختیځ کنج کې یې ټانکۍ کېښوده.

⁴⁰حورام همدارنګه تشتونه، بېلچې او د وینو د شیندلو کاسې جوړې کړې.نو حورام هغه ټول کارونه پای ته ورسول چې د سلیمان پادشاه دپاره یې د څښتن د کور په خاطر په خپله غاړه اخیستي وو:

⁴¹دوه ستنېد ستنو په سر باندې دوه کاسه شکله تاجونهد جالونو دوه سېټونه د ستنو په سر باندې د دوه کاسه شکله تاجونو د سینګارولو دپاره

⁴²د دوو سېټونو د جالونو دپاره څلورسوه برنجي انار. (د هر جال دپاره د برنجي انارو دوه قطارونه چې د ستنو په سر باندې د کاسه شکله تاجونو د ښکلا دپاره وو.)

⁴³لس ګاډۍ د هغو د لسو تشتونو سره

⁴⁴ټانکۍ او د هغې لاندې دولس برنجي غوایان

⁴⁵لوښي، بېلچې او د وینو د شیندلو دپاره کاسې.د څښتن د کور دا ټول لوازم چې حورام د سلیمان پادشاه دپاره جوړ کړي وو، د صیقل شویو برنجو څخه وو.

⁴⁶دا شیان پادشاه د اردن په دره کې د سوکوت او زرتان ترمنځ د خاورې په قالبونو کې جوړ کړي وو.

⁴⁷سلیمان دا شیان ونه تلل، ځکه چې هغه ډېر زیات وو او د برنجو وزن معلوم نه شو.

⁴⁸همدارنګه سلیمان د څښتن د کور دپاره ټول لوازم جوړ کړل:د قربانۍ ځای د سرو زرو څخه.د سرو زرو مېز چې هغه سپېڅلې ډوډۍ به ورباندې ایښودل کېده چې خدای ته به نذرانه کېدله.

⁴⁹څراغدانونه چې د سوچه سرو زرو څخه وو (ډېر مقدس ځای ته مخامخ، پنځه ښي خواته او پنځه چپ خواته).د سرو زرو د ګلانو نقشونه، څراغونه او انبورونه.

⁵⁰د سوچه سرو زرو تشتونه، د پلتې پاکوونکي، د وینو د شیندلو کاسې، د خوشبويۍ پشقابونه او د اور لوښي.د ډېر مقدس ځای د دروازو دپاره او همدارنګه د خدای د کور د اصلي سالون د دروازو دپاره د سرو زرو چپراسونه.

⁵¹کله چې سلیمان پادشاه د څښتن د کور ټول کارونه پای ته ورسول، بیا سلیمان هغه شیان یعنې سپین او سره زر او نور لوازم چې د هغه پلار داود څښتن ته وقف کړي وو، هغه یې د څښتن د کور په تحویلخانو کې کېښودل.