بادشاهانو دويم 15

¹په اسراییلو کې د یروبعام د پاچاهۍ په اووه ویشتم کال د امصیا زوی عزیا د یهودا پاچا شو.

²هغه د شپاړس کلنۍ په عمر پاچا شو او په اورشلیم کې یې دوه پنځوس کاله پاچاهي وکړه. د هغه د مور نوم یکلیا ؤ چې د اورشلیم څخه وه.

³عزیا د خپل پلار په شان د څښتن اطاعت کاوه او ښه کارونه یې کول.

⁴که څه هم سیمه یز د عبادت ځایونه ړنګ نه شول او خلکو لا هم هلته قربانۍ کولې او خوشبویي یې سوځولې.

⁵څښتن عزیا د جذام په مرض اخته کړ او د عمر تر پایه پورې په هغه رنځ رنځور پاتې شو. هغه په خپل کور کې یواځې اوسېده. د هغه زوی یوتام د ماڼۍ او هېواد واک درلود.

⁶د عزیا د پاچاهۍ نورې پېښې او دا چې هغه څه کړي دي د یهودا د پاچاهانو د تاریخ په کتاب کې لیکل شوي دي.

⁷عزیا مړ شو او د داود د ښار په شاهي هدیره کې ښخ شو. بیا د هغه زوی یوتام د هغه په ځای پاچا شو.

⁸په یهودا کې د عزیا د پاچاهۍ په اته دېرشم کال د یروبعام زوی زکریا د اسراییلو پاچا شو. هغه په سامره کې شپږ میاشتې پاچاهي وکړه.

⁹زکریا د خپلو نیکونو په شان د څښتن په مقابل کې ګناه وکړه. هغه د نباط د زوی د یروبعام بده لاره غوره کړه، څوک چې د اسراییلو د ګناه سبب ګرځېدلی ؤ.

¹⁰د یابیش زوی شلوم د زکریا په ضد دسیسه جوړه کړه او د خلکو په مخکې یې وواژه. بیا شلوم د هغه په ځای پاچا شو.

¹¹د زکریا د پاچاهۍ نورې پېښې او دا چې هغه څه کړي دي د اسراییلو د پاچاهانو د تاریخ په کتاب کې لیکل شوي دي.

¹²په دې توګه څښتن د ییهو سره خپله هغه وعده سرته ورسوله چې ویلي یې وو: او همداسې وشول.

¹³په یهودا کې د عزیا د پاچاهۍ په نهه دېرشم کال شلوم د اسراییلو پاچا شو. هغه یوه میاشت په سامره کې پاچاهي وکړه.

¹⁴وروسته د جادي زوی مناحیم د ترزې څخه سامرې ته راغی، شلوم یې هلته وواژه او په خپله د هغه په ځای د اسراییلو پاچا شو.

¹⁵شلوم چې د خپلې پاچاهۍ په وخت کې هرڅه کړي دي، د هغې دسیسې په شمول چې د زکریا په ضد یې کړې وه، د اسراییلو د پاچاهانو د تاریخ په کتاب کې لیکل شوي دي.

¹⁶مناحیم د ترزه څخه د تګ په حال کې، د تفسح ښار، د هغه اوسېدونکي او ګردچاپېره سیمې په بشپړه توګه له منځه یوړې، ځکه چې دا ښار ده ته نه ؤ تسلیم شوی. هغه حتی د ټولو امیدوارو ښځو ګېډې هم څیرې کړې.

¹⁷په یهودا کې د عزیا د پاچاهۍ په نهه دېرشم کال مناحیم د جادي زوی د اسراییلو پاچا شو او په سامره کې یې لس کاله پاچاهي وکړه.

¹⁸هغه د خپل ژوند تر پایه پورې د څښتن په مقابل کې ګناه وکړه او د نباط د زوی یروبعام بده لاره یې چې د اسراییلو د ګناه سبب ګرځېدلی ؤ، غوره کړه.

¹⁹د مناحیم د پاچاهۍ په دوران کې د آشور پاچا تغلت فلاسر په اسراییلو باندې برید وکړ. مناحیم، تغلت فلاسر ته څلور دېرش ټنه سپین زر ورکړل، ترڅو تغلت فلاسر د هغه سره د پاچاهۍ د واک په ساتلو کې مرسته وکړي.

²⁰نو مناحیم په اسراییلو کې په هر شتمن نفر باندې حکم وکړ چې هغه ته نیم نیم کیلوګرامه سپین زر ورکړي او دا ټول هغه د آشور پاچا ته ورکړل. نو د آشور پاچا برید ودراوه او د اسراییلو څخه لاړ.

²¹د مناحیم د پاچاهۍ نورې پېښې او دا چې هغه څه کړي دي د اسراییلو د پاچاهانو د تاریخ په کتاب کې لیکل شوي دي.

²²مناحیم مړ او ښخ شو. بیا د هغه ��وی فقحیا د هغه په ځای پاچا شو.

²³په یهودا کې د عزیا د پاچاهۍ په پنځوسم کال فقحیا د اسراییلو پاچا شو او په سامره کې یې دوه کاله پاچاهي وکړه.

²⁴هغه د څښتن په مقابل کې ګناه وکړه او د نباط د زوی یروبعام بده لاره یې چې د اسراییلو د ګناه سبب ګرځېدلی ؤ، غوره کړه.

²⁵د رملیا زوی فقح د فقحیا د لښکر قوماندان ؤ، مګر هغه د پاچا د وژلو دپاره پلانونه جوړ کړل. نو هغه د پنځوسو تنو جلعادیانو سره په سامره کې د ماڼۍ تر ټولو قوي برخې ته ورننوتل او فقحیا پاچا یې په قتل ورساوه. د پاچا سره یې دوه نور سړي چې ارجوب او اریه نومېدل هم په قتل ورسول. بیا فقح د هغه په ځای پاچا شو.

²⁶د فقحیا د پاچاهۍ نورې پېښې او دا چې هغه څه کړي دي د اسراییلو د پاچاهانو د تاریخ په کتاب کې لیکل شوي دي.

²⁷په یهودا کې د عزیا د پاچاهۍ په دوه پنځوسم کال د رملیا زوی فقح د اسراییلو پاچا شو او په سامره کې یې شل کاله پاچاهي وکړه.

²⁸هغه د څښتن په مقابل کې ګناه وکړه، د نباط د زوی یروبعام بده لاره یې غوره کړه څوک چې د اسراییلو د ګناه سبب ګرځېدلی ؤ.

²⁹د فقح د پاچاهۍ په دوران کې د آشور پاچا تغلت فلاسر په اسراییلو باندې برید وکړ. هغه د عیون، آبل بیت معکې، یانواح، قادش او حاصور ښارونه او همدارنګه د جلعاد، جلیل او د نفتالي ټولې سیمې هم ونیولې. بیا هغه اسراییلیان د اسیرانو په توګه آشور ته یوړل.

³⁰په یهودا کې د یوتام د پاچاهۍ په شلم کال د ایله زوی هوشع د فقح په ضد دسیسه جوړه کړه او هغه یې په قتل ورساوه. بیا هوشع د هغه په ځای د اسراییلو پاچا شو.

³¹د فقح د پاچاهۍ نورې پېښې او دا چې هغه څه کړي دي د اسراییلو د پاچاهانو د تاریخ په کتاب کې لیکل شوي دي.

³²په اسراییلو کې د فقح د پاچاهۍ په دویم کال د عزیا زوی یوتام د یهودا پاچا شو.

³³یوتام د پنځه ویشت کلنۍ په عمر پاچا شو او په اورشلیم کې یې شپاړس کاله پاچاهي وکړه. د هغه مور یروشه د صادوق لور وه.

³⁴یوتام د خپل پلار په شان هغه کارونه کول چې د څښتن په نظر کې ښه وو.

³⁵دا یوتام ؤ چې د څښتن د کور پاسنۍ دروازه یې بیا جوړه کړه. که څه هم سیمه یز د عبادت ځایونه ړنګ نه شول، لا هم خلکو هلته قربانۍ کولې او خوشبویي یې سوځولې.

³⁶د یوتام د پاچاهۍ نورې پېښې او دا چې هغه څه کړي دي د یهودا د پاچاهانو د تاریخ په کتاب کې لیکل شوي دي.

³⁷د هغه د پاچاهۍ په دوران کې د لومړي ځل دپاره څښتن د سوریایي پاچا رزین او د اسراییلو پاچا فقح ولېږل چې په یهودا باندې برید وکړي.

³⁸یوتام مړ شو او د هغه د نیکه داود د ښار په شاهي هدیره کې ښخ شو. بیا د هغه زوی آحاز د هغه په ځای پاچا شو.