کولسیان 1

¹دا لیک د پولوس له خوا چې د خدای په ارادې سره د عیسی مسیح رسول دی او زمونږ د ورور تیموتاوس له خوا،

²په مسیح کې د خدای خلکو او هغو وفادارو خویندو او ورونو ته چې په کولسیه کې دي. زمونږ د پلار خدای فضل او سلامتي دې وي په تاسو باندې.

³کله چې مونږ ستاسو دپاره دعا کوو، نو تل زمونږ د څښتن عیسی مسیح د پلار یعنې خدای شکر کوو.

⁴ځکه چې مونږ خبر شولو چې تاسو په عیسی مسیح ایمان لرئ او د خدای د ټولو خلکو سره مینه کوئ.

⁵ستاسو دا ایمان او مینه د هغې هیلې څخه راپیدا کیږي چې په اسمان کې ستاسو دپاره ساتل شوی دی. تاسو د مخکې نه په دې هکله په رښتیني کلام یعنې زېري کې اورېدلي وو.

⁶لکه څنګه چې دا زېری تاسو ته درورسېد، نو همداسې ټولې دنیا ته رسیږي او حاصل ورکوي. د هماغې ورځې نه چې تاسو خبر شوئ او د خدای د فضل په هکله په رښتیا سره پوه شوئ، نو په تاسو کې یې هم حاصل ورکړ.

⁷تاسو د خدای د فضل په هکله د اپفراس څخه چې په کار کې زمونږ ملګری دی، زده کړل. هغه ستاسو دپاره د مسیح وفادار خدمتګار دی.

⁸هغه مونږ ستاسو د هغې مینې څخه خبر کړو چې روح القدس تاسو ته درکړې ده.

⁹له همدې امله د هماغې ورځې نه مو چې دا واورېدل، نو ستاسو دپاره مو تل دعا کړې ده. مونږ د خدای څخه غواړو چې تاسو په خپله اراده په پوره توګه پوه کړي، ترڅو تاسو هغه ټول حکمت او پوهه ولرئ چې د هغه روح یې درکوي،

¹⁰ترڅو داسې ژوند وکړئ لکه څنګه چې څښتن یې غواړي او هغه په هر څه کې خوشحاله کړئ او په هر نېک کار کې ثمره ولرئ او د خدای په پېژندلو کې وده وکړئ.

¹¹همدارنګه زمونږ دا دعا ده چې د هغه د جلال نه ډک قدرت سره قوي شئ، ترڅو په صبر سره هرڅه وزغمئ

¹²او په خوشحالۍ سره د پلار خدای شکر وباسئ چې تاسو یې د دې لایق کړي یئ چې د خپلو خلکو سره یې د رڼا د پاچاهۍ په میراث کې شریک کړئ.

¹³هغه مونږ د تیارې د پاچاهۍ نه ازاد کړو او د خپل ګران زوی پاچاهۍ ته یې راوستلو.

¹⁴د هغه په وسیله مونږ خلاصون وموند او زمونږ ګناهونه وبخښل شول.

¹⁵مسیح د نه لیدونکي خدای تصویر او د ټولو مخلوقاتو نه لومړی زېږېدلی دی.

¹⁶ځکه چې د هغه په وسیله ټول شیان پیدا شول، که هغه په اسمان کې دي یا په ځمکه، لیدونکي دي یا نه لیدونکي، که هغه د پاچاهۍ تختونه دي که روحاني قدرتونه دي یا حاکمان یا د واک خاوندان، ټول شیان د هغه په وسیله او د هغه دپاره پیدا شول.

¹⁷هغه د ټولو شیانو نه مخکې وجود درلود او په هغه کې ټول شیان سره یوځای کیږي.

¹⁸د دې تر څنګ هغه د بدن سر یعنې د کلیسا سر دی، هغه پیل دی، هغه لومړی زېږېدلی دی چې د مړو نه راپاڅېد، ترڅو په هرڅه کې لومړی ځای ولري.

¹⁹ځکه چې دا د خدای خوښه وه چې زوی دې په خپل ځان کې د خدای کامل فطرت او خوی ولري.

²⁰خدای د مسیح په وسیله د ټولو شیانو سره پخلا شو او په صلیب باندې د مسیح د وینې د تویېدلو په وسیله یې د خدای او هغه څه چې په ځمکه او اسمان کې دي، ترمنځ سوله راوستله.

²¹یو وخت تاسو د خدای نه لېرې وئ او د خپلو فکرونو او بدو عملونو له امله د هغه دښمنان وئ.

²²خو اوس هغه د مسیح د جسماني مرګ په وسیله تاسو د خپل ځان سره پخلا کړئ، ترڅو تاسو سپېڅلي، بې عیبه او بې له ملامتۍ څخه خپل حضور ته راولي.

²³خو بې له شکه باید تاسو په ایمان کې قوي او ټینګ پاتې شئ او هغه هیله پرېنږدئ چې د زېري په اورېدلو سره په ټوله دنیا کې اعلان شوی دی، او زه پولوس د همدې زېري خدمتګار شوم.

²⁴زه اوس په هغو کړاوونو کې خوشحاله یم چې ستاسو په خاطر یې تېروم، ځکه چې زه په خپل بدن کې د مسیح د بدن یعنې د کلیسا په خاطر د مسیح د تکلیفونو هغه کمی پوره کوم چې لا تر اوسه پاتې دی.

²⁵زه د هغې وظیفې له مخې چې خدای ستاسو په خاطر ماته راکړې ده، د کلیسا خدمتګار شوم ترڅو د خدای کلام په پوره توګه تاس�� ته درورسوم،

²⁶یعنې هغه پټ راز چې د پېړیو او تېرو نسلونو راهیسې پټ پاتې ؤ او اوس د خدای خلکو ته ښکاره شوی دی.

²⁷خدای غوښتل چې تاسو غیریهودیانو ته د دې جلال نه ډکې شتمنۍ پټ راز ښکاره کړي او هغه راز دا دی چې مسیح په تاسو کې اوسیږي او هغه د جلال هیله ده.

²⁸مونږ د مسیح په هکله ټولو ته وعظ کوو او په هغې ټولې پوهې سره چې مونږ یې لرو، ټولو ته خبرداری ورکوو او هر یو ته تعلیم ورکوو، ترڅو هر یو د بالغو خلکو په توګه په مسیح کې خدای ته وړاندې کړو.

²⁹د دې دپاره زه کار کوم او زحمت وباسم، ترڅو د هغه لوی قدرت نه کار واخلم چې مسیح یې ماته راکوي او په ما کې کار کوي.