عزرا 4

¹کله چې د یهودا او بنیامین د خلکو دښمنانو واورېدل چې هغه خلک چې له جلاوطنۍ څخه راستانه شوي دي د اسراییلو د څښتن خدای د عبادت ځای بیا جوړوي،

²نو هغوی زروڅپرکیل او د طایفو مشرانو ته ورغلل او هغوی ته یې وویل: «مونږ ته اجازه راکړئ چې ستاسو سره مرسته وکړو! له هغه وخت راهیسې چې د اشور پاچا اسرحدون مونږ دلته راوستلي یو، مونږ ستاسو په شان ستاسو د خدای عبادت کوو او هغه ته قربانۍ وړاندې کوو.»

³زروڅپرکیل، یشوع او د طایفو مشرانو هغوی ته وویل: «مونږ خپل خدای ته د کور په جوړولو کې ستاسو مرستې ته هېڅ اړتیا نه لرو، خو مونږ به خپله هغه خپل څښتن، یعنې د اسراییلو خدای ته جوړ کړو لکه څنګه چې د فارس پاچا کوروش امر کړی دی.»

⁴نو هغو خلکو چې په دې وطن کې اوسېدل هڅه وکړه چې د یهودیانو زړونه تور کړي، هغوی ووېروي او مجبور یې کړي چې د ودانولو کار ودروي.

⁵همدارنګه هغوی د فارس حکومتي مامورینو ته رشوت هم ورکاوه چې د هغوی په خلاف کار وکړي. هغوی دې کار ته د کوروش د پاچاهۍ په دوران کې او حتی د داریوش د پاچاهۍ تر پیل کېدلو پورې دوام ورکړ.

⁶د خشایار شاه د امپراتورۍ په پیل کې د یهودا او اورشلیم د خلکو دښمنانو په هغوی باندې لیکل شوي تورونه ولګول.

⁷د فارس د پاچا ارتخششتا د امپراتورۍ په وخت کې بشلام، میتردات، تبییل او د هغوی ملګرو پاچا ته لیک ولیکه. دا لیک په آرامي ژبه لیکل شوی ؤ چې د لوستلو په وخت کې به ترجمه کېده.

⁸همدارنګه رحوم والي او د ولایت منشي شمشای د اورشلیم په اړه دا لاندې لیک ارتخششتا پاچا ته ولیکه:

⁹«د والي رحوم، د منشي شمشای، د هغوی د ملګرو، قاضیانو او نورو ټولو مامورینو او څارونکو له خوا چې په اصل کې له ارک، څپرکیل او د عیلام د شوشه دي،

¹⁰د هغو نورو خلکو سره یوځای چې لوی او عزتمن آشور بانیپال د خپلو هېوادونو څخه شړلي وو او د سامریې په ښار او د فرات د سیند د لوېدیځې خوا ولایت په نورو برخو کې یې ځای په ځای کړي وو.»

¹¹د لیک متن دا دی:«ارتخششتا پاچا ته د هغه د هغو خدمتګارانو له خوا چې د فرات د سیند په لوېدیځې خوا ولایت کې اوسیږي سلامونه وړاندې کیږي.

¹²مونږ غواړو چې تاسو اعلیحضرت په دې خبر شئ چې هغه یهودیان چې ستاسو د نورو سیمو څخه دلته راغلي دي، په اورشلیم کې ځای په ځای شوي دي او هغه بد او یاغي ښار بېرته ودانوي. نژدې دی چې هغوی د دېوالونو او بنیادونو بیاجوړونه پای ته ورسوي.

¹³ای اعلیحضرته، که چېرې دا ښار بېرته ودان شو او د هغه دېوالونه جوړ شول، نو خلک به د باج او مالیې ورکول بس کړي او ستاسو پاچاهي عایدات به لږ شي.

¹⁴نو څرنګه چې مونږ تاسو اعلیحضرت ته وفادار یو، مونږ نه غواړو چې ستاسو بې عزتي وشي، نو مونږ دا وړاندیز کوو،

¹⁵تاسو حکم وکړئ چې د پخوانیو پاچاهانو سندونه دې ولټول شي. که تاسو دا کار وکړئ، نو تاسو ته به څرګنده شي چې دا ښار تل یاغي ؤ او د پخوا زمانو څخه یې پاچاهان او والیان کړولي دي. د دې ښار په خلکو باندې حکومت کول تل سخت وو. نو ځکه دا ښار وران شوی دی.

¹⁶له دې امله مونږ په دې باندې باور لرو چې که چېرې دا ښار بیا ودان شو او د هغه دېوالونه جوړ شول، نو تاسو اعلیحضرت به ونه شئ کولای چې د فرات د سیند د لوېدیځې خوا ولایت باندې خپله واکمني وساتئ.»

¹⁷پاچا داسې ځواب ورولېږه:«د رحوم والي، د ولایت منشي شمشای او د هغوی ملګرو ته چې په سامره او د فرات د سیند د لوېدیځې خوا ولایت په نورو برخو کې اوسیږي، په تاسو دې سلام وي.

¹⁸هغه لیک چې تاسو رالېږلی ؤ وروسته له ترجمې څخه ماته ولوستل شو.

¹⁹ما حکم کړی ؤ او څېړنه وشوه او په رښتیا دا څرګنده شوه چې اورشلیم له پخوا زمانو راهیسې د شاهي واکمنۍ په خلاف راپورته شوی او هغه ښار د یاغیانو او باغیانو ډک ؤ.

²⁰قدرتمندو پاچاهانو هلته پاچاهي کړې ده او د فرات د سیند له لوېدیځې خوا په ټول ولایت باندې یې حکومت کړی، باج او مالیه یې راټوله کړې ده.

²¹نو له دې امله تاسو باید حکم جاري کړئ چې زما د بل حکم پورې هغه خلک د ښار د بیا ودانولو کار ودروي.

²²لټي ونه کړئ او دا کار همدا اوس وکړئ ترڅو امپراتورۍ ته نور زیان ونه رسیږي.»

²³څنګه چې د ارتخششتا پاچا لیک رحوم، شمشای او د هغو ملګرو ته ولوستل شو، هغوی په بیړه اورشلیم ته لاړل او یهودیان یې په زوره مجبور کړل چې د ښار بیا ودانول ودروي.

²⁴په دې ډول په اورشلیم کې د خدای د کور د جوړولو کار درېدلی ؤ او د فارس پاچا داریوش د امپراتورۍ تر دوهم کال پورې وځنډېده.