لاویان 11

¹څښتن حضرت موسیٰ او حضرت هارون ته وفرمایل:

³هر حیوان چې خلاص سوم ولري او شخوند وهونکی هم وي.

⁴خو داسې حیوانات شته چې یوازې شخوند وهونکي دي یا یوازې خلاص سوم لري، خو تاسو باید د هغو غوښه ونه خورئ. لکه اوښ، که څه هم هغه شخوند وهونکی دی، مګر خلاص سوم نه لري. دا ستاسو دپاره ناپاک دی.

⁵غرنۍ سویه، که څه هم هغه شخوند وهونکې ده مګر خلاص سوم نه لري، دا ستاسو دپاره ناپاکه ده.

⁶سویه، که څه هم شخوند وهونکې ده مګر خلاص سوم نه لري. دا ستاسو دپاره ناپاکه ده.

⁷د خوګ غوښه مه خورئ. هغه باید ناپاک وګڼل شي. هغه خلاص سومان لري، مګر شخوند وهونکی نه دی.

⁸تاسو باید د دې حیواناتو غوښه ونه خورئ او مه د هغو مړو ته لاس وروړئ، دا ستاسو دپاره ناپاک دي.

⁹تاسو کولی شئ هر ډول ماهیان چې وزرونه او پتري ولري وخورئ،

¹⁰مګر هر حیوان چې په اوبو کې ژوند کوي او وزرونه او پتري نه لري باید غوښه یې ونه خوړل شي.

¹¹داسې حیوانات باید حرام وګڼل شي. تاسو باید د هغو غوښه ونه خورئ او حتیٰ مړو ته یې لاس هم مه وروړئ.

¹²هر شی چې په اوبو کې ژوند کوي او وزرونه او پتري ونلري باید ونه خورئ.

¹³‏-

¹⁹دا هغه مرغان دي چې تاسو یې باید حرام وګڼئ: عقاب او ډول ډول ټپوسان، هر ډول باښې، هر ډول کارغان، شترمرغ، ډول ډول ګونګیان، د دریاب مرغان، لګ لګ، هر ډول ماهي خوړونکي مرغان، ملاچرګک او شوپرک.

²⁰ټول وزر لرونکي حشرات حرام دي،

²¹بغیر د هغو حشراتو څخه چې ټوپونه وهي.

²²له هغو څخه کولی شئ چې ډول ډول چورچورکۍ او ملخان وخورئ.

²³مګر نور ټول وزر لرونکي حشرات چې په پښو باندې هم ګرځي باید حرام وګڼل شي.

²⁴‏-

²⁸هرڅوک چې د دغو حیواناتو مړو ته لاس وروړي هغه به تر ماښامه پورې ناپاک وي: ټول سوم لرونکي حیوانات، له هغو پرته چې سومان یې هم جدا وي او شخوند هم وهي او ټول حیوانات چې څلور پښې ولري او پنجې ولري. هرڅوک چې د هغو مړي یوسي باید هغه خپل کالي ومینځي، خو تر ماښامه پورې به ناپاک وي.

²⁹د هغو حیواناتو څخه چې په ځمکه باندې ګرځي، دغه حیوانات ستاسو دپاره ناپاک دي: ړنده مږه، موږک، هر ډول سمساره،

³⁰ډول ډول د کور او د شګې چرموښکۍ او کربوړی.

³¹هرڅوک چې د هغو مړو ته لاس وروړي، هغه به تر ماښامه پورې ناپاک وي.

³²که چېرې د هغو مړي په یو شي باندې ولویږي، هغه شی به ناپاک شي. همداسې کار به د لرګي، ټوکر، څرمنې، یا بوجۍ په موادو باندې کیږي او مهمه نه ده چې هغه د څه شي دپاره استعمالیږي. هغه دې په اوبو کې غوټه کړای شي خو تر ماښامه پورې به ناپاک پاتې شي.

³³که چېرې د هغو مړي د خټې په یو لوښي کې وغورزیږي، هرڅه چې په هغه کې دي ناپاک به شي او تاسو باید هغه لوښی مات کړئ.

³⁴کوم خواړه چې په عادي توګه حلال وي، مګر که له داسې لوښي څخه په هغو خواړو باندې اوبه توی شي، هغه به ناپاک شي او د څښلو هرڅه چې په دې لوښي کې وي هغه ناپاک دي.

³⁵په هر شي باندې چې د هغو مړي ولویږي هغه شی ناپاکه کیږي، که په هغو کې نغری یا د پخلي لوښی شامل وي هغه باید مات شي.

³⁶مګر یوه چینه یا کوهی چې دغه مړه حیوانات په کې پراته وي، هغه پاک پاتې کیږي. لیکن هرڅوک چې د دغو مړو له جملې څخه کوم یو ته لاس وروړي، هغه به ناپاک شي.

³⁷که چېرې یو داسې مړی په هغو تخمونو باندې وغورزیږي چې کرل کیږي، هغه تخمونه پاک پاتې کیږي.

³⁸مګر که چېرې په تخمونو باندې اوبه توی شوې وي او په هغه باندې یو داسې مړی ولویږي، هغه ستاسو دپاره ناپاک دي.

³⁹که چېرې یو حیوان چې ستاسو دپاره پاک وي مړ شي، هرڅوک چې د هغه مړي ته لاس وروړي هغه به تر ماښامه پورې ناپاک وي.

⁴⁰هرڅوک چې د دې مړ حیوان د غوښې څخه لږه غوښه وخوري، باید خپل کالي ومینځي، خو هغه به تر ماښامه پورې ناپاک وي. هرڅوک چې د هغه مړی راپورته کړي، هغه باید خپل کالي ومینځي خو هغه به تر ماښامه پورې ناپاک وي.

⁴¹هره خزنده چې په ځمکه باندې ګرځي، باید ونه خوړل شي.

⁴²ستاسو دپاره هره خزنده حرامه ده، که هغه په سینه باندې ښوئیږي یا په څلورو یا په ډېرو پښو ګرځي.

⁴³د هغو څخه د کوم یو په خوړلو سره خپل ځانونه مه ناپاکه کوئ.

⁴⁴زه ستاسو څښتن خدای یم، تاسو باید خپل ځانونه پاک کړئ او مقدس اوسئ، ځکه چې زه مقدس یم. خپل ځانونه په هیڅ یوې خزندې باندې مه ناپاکه کوئ.

⁴⁵زه څښتن یم چې تاسو مې له مصر څخه راوویستلئ ترڅو ستاسو خدای اوسم. له دې کبله تاسو باید مقدس اوسئ، ځکه چې زه مقدس یم.

⁴⁶دا مقررات د حیواناتو، مرغانو او هرڅه چې په اوبو کې ژوند کوي او ټولو خزندو په باره کې دي.

⁴⁷تاسو باید پام وکړئ چې د پاک او ناپاک او همدارنګه د حلالو او حرامو حیواناتو ترمنځ فرق وکړئ.>