لاویان 13

¹څښتن حضرت موسیٰ او حضرت هارون ته وفرمایل:

³کاهن دې د هغه زخم معاینه کړي او که چېرې په هغه کې ویښتان سپین شوي وو او زخم د پوستکي څخه ژور ښکاره کېده، نو دا د پوستکي ساري ناروغي ده. نو کاهن به هغه نفر ناپاک اعلان کړي.

⁴که چېرې د هغه د پوستکي زخم سپین ؤ خو د پوستکي څخه ژور نه ښکاره کېده او ویښتان په کې سپین شوي نه وو، کاهن دې هغه ناروغه نفر د اوو ورځو دپاره د نورو څخه جدا وساتي.

⁵کاهن به په اوومه ورځ هغه بیا معاینه کړي او که چېرې د هغه په نظر کې زخم هماغه شان ښکاره کېده او خپور شوی نه ؤ، کاهن به هغه د نورو اوو ورځو دپاره جدا وساتي.

⁶په اوومه ورځ دې کاهن هغه د دوهم ځل دپاره معاینه کړي. که چېرې زخم مړاوی شوی ؤ او په پوستکي کې نه ؤ خپور شوی، کاهن به هغه پاک اعلان کړي، دا یوازې یوه ګرمکه ده. هغه نفر باید خپل کالي ومینځي او هغه به پاک شي.

⁷مګر که چېرې کاهن هغه نفر معاینه کړی وي او هغه یې پاک اعلان کړی وي او له هغې څخه وروسته ګرمکه د هغه په بدن باندې خپره شي، هغه باید خپل ځان بیا کاهن ته ورښکاره کړي.

⁸کاهن دې هغه معاینه کړي، که چېرې هغه ګرمکه په بدن باندې خپره شوې وه، کاهن به هغه ناپاک اعلان کړي، دا یوه ساري ناروغي ده.

⁹کله چې یو نفر د پوستکي ساري ناروغي ولري، هغه باید کاهن ته راوستل شي.

¹⁰کاهن دې هغه معاینه کړي، که چېرې په پوستکي کې یو سپین زخم وي چې ویښتان یې سپین کړي وي او که چېرې په پړسوب کې خامه غوښه وي،

¹¹نو دا د پوستکي یوه دوامداره ناروغي ده او کاهن به هغه ناپاک اعلان کړي. کاهن دې هغه د معاینې دپاره جدا ونه ساتي، ځکه چې هغه په ښکاره ناپاک دی.

¹²‏-

¹³مګر که چېرې د ناروغۍ موده تېره شوې وي او یوازې داغونه پاتې وي، کاهن به هغه نفر پاک اعلان کړي.

¹⁴مګر هرکله چې په هغه باندې خامه غوښه راښکاره شي، هغه به ناپاک شي.

¹⁵کله چې کاهن دا خامه غوښه وویني، هغه نفر به ناپاک اعلان کړي. خامه غوښه ناپاکه ده، هغه نفر په ساري ناروغۍ اخته دی.

¹⁶مګر کله چې دا خامه غوښه روغه شي او بیا سپینه شي، هغه نفر باید کاهن ته ورشي.

¹⁷کاهن دې هغه معاینه کړي، که چېرې د زخم څخه یوازې سپین داغونه پاتې وي کاهن به هغه ناروغه نفر پاک اعلان کړي، بیا به هغه پاک شي.

¹⁸کله چې د یو چا په پوستکي باندې یوه دانه وي او روغه شي

¹⁹او په هغه ځای باندې چې دانه وه، یو سپین پړسوب یا سوربخن سپین داغ راښکاره شي، هغه باید خپل ځان کاهن ته ورښکاره کړي.

²⁰کاهن دې هغه معاینه کړي، که چېرې هغه د پوستکي څخه ژور وي او ویښتان په کې سپین شوي وي، کاهن به هغه ناپاک اعلان کړي. دا د پوستکي یوه ساري ناروغي ده چې د دانې په ځای منځته راغلې ده.

²¹مګر که چېرې کاهن هغه معاینه کړي او سپین ویښتان په کې نه وي او د پوستکي څخه ژور نه وي او مړاوی شوی وي، بیا دې کاهن هغه نفر د اوو ورځو دپاره جدا وساتي.

²²که چېرې هغه زخم په پوستکي کې خپریږي، کاهن به هغه نفر ناپاک اعلان کړي، دا ساري ناروغي ده.

²³مګر که چېرې هغه بدل شوی او خپور شوی نه وي، دا یوازې د دانې داغ دی او کاهن به هغه نفر پاک اعلان کړي.

²⁴کله چې د یو چا پوستکی سوزېدلی وي او د سوزېدلي ځای په خامه غوښه کې یو سوربخن سپین یا سپین داغ راښکاره شي،

²⁵نو کاهن دې هغه داغ معاینه کړي. که چېرې په هغه کې ویښتان سپین شوي وو او د پوستکي څخه ژور ښکارېده، دا د پوستکي یوه ساري ناروغي ده چې په هغه سوزېدلي ځای کې پیل شوې ده. کاهن به هغه نفر ناپاک اعلان کړي.

²⁶مګر که چېرې کاهن هغه معاینه کړي او په داغ کې سپین ویښتان نه وي او هغه د پوستکي څخه ژور نه وي او مړاوی شوی وي، بیا دې کاهن هغه نفر د اوو ورځو دپاره جدا وساتي.

²⁷په اوومه ورځ دې کاهن هغه معاینه کړي. که چېرې هغه خپریږي، کاهن به هغه نفر ناپاک اعلان کړي، دا د پوستکي یوه ساري ناروغي ده.

²⁸خو که چېرې بیاهم التهاب بدل شوی نه وي او خپور شوی نه وي مګر مړاوی شوی وي، نو دا د سوزېدلي ځای پړسوب دی او کاهن به هغه نفر پاک اعلان کړي. دا یوازې د سوزېدلي ځای داغ دی.

²⁹که چېرې د یو سړي یا د یوې ښځې په سر یا په زنه باندې زخم وي،

³⁰نو کاهن دې هغه زخم معاینه کړي. که چېرې هغه د پوستکي څخه ژور ښکاري او ژیړ نري ویښتان په کې وي، نو کاهن به هغه نفر ناپاک اعلان کړي. دا یو خارښت دی او د سر یا د زنې ساري ناروغي ده.

³¹مګر کله چې کاهن د ناسور دا ډول زخم معاینه کړي، که چېرې هغه د پوستکي څخه ژور نه ښکاره کېده، خو بیاهم تور ویښتان په کې نه وو، نو کاهن دې هغه ناروغه نفر اووه ورځې جدا وساتي.

³²په اوومه ورځ دې کاهن هغه زخم معاینه کړي. که چېرې خارښت خپور شوی نه ؤ او ژیړ ویښتان په کې نه وو او د پوستکي څخه ژور نه ښکارېده،

³³نو د هغه نفر ټول سر باید وخرایل شي بغیر له زخمي ځای څخه. کاهن دې هغه نورې اووه ورځې جدا وساتي.

³⁴په اوومه ورځ دې کاهن هغه خارښت بیا معاینه کړي، که چېرې هغه په پوستکي کې خپور شوی نه ؤ او د پوستکي څخه ژور نه ښکاره کېده، کاهن به هغه پاک اعلان کړي. هغه نفر باید خپل کالي ومینځي او پاک به شي.

³⁵مګر که چېرې د هغه د پاکوالي د اعلان څخه وروسته خارښت خپور شي،

³⁶کاهن دې هغه معاینه کړي او که چېرې خارښت په پوستکي کې خپور شوی وي، کاهن دا اړتیا نه لري چې ژیړ ویښتان ولټوي، هغه نفر ناپاک دی.

³⁷خو که چېرې د هغه په نظر کې هغه بدل شوی نه وي او تور ویښتان په کې راشنه شوي وي، دا خارښت روغ شوی دی. هغه نفر پاک دی او کاهن به هغه همداسې پاک اعلان کړي.

³⁸کله چې د یو سړي یا د یوې ښځې په پوستکي باندې سپین داغونه وي،

³⁹نو کاهن دې هغه نفر معاینه کړي. که چېرې دا داغونه مړاوي او سپین وي، هغه یوه بې زیانه ګرمکه ده چې په بدن باندې راختلې ده، هغه نفر پاک دی.

⁴⁰که چېرې یو سړي خپل ویښتان له لاسه ورکړي وي او ګنجی شوی وي، هغه پاک دی.

⁴¹که چېرې هغه د خپلې کوپړۍ یا تندي ویښتان له لاسه ورکړي وي او لوڅ تندی ولري، هغه پاک دی.

⁴²مګر که چېرې د هغه په ګنجي سر یا لوڅ تندي باندې سوربخن سپین زخم وي، دا د پوستکي یوه ساري ناروغي ده.

⁴³کاهن دې هغه معاینه کړي او که چېرې زخم سوربخن سپین وي،

⁴⁴نو هغه سړی ناروغ او ناپاک دی. کاهن به هغه ناپاک اعلان کړي ځکه چې د هغه په سر باندې زخم دی.

⁴⁵هغه نفر چې په داسې ساري ناروغۍ اخته وي باید شلېدلي کالي واغوندي، خپل ویښتان دې ببر پرېږدي، خپله خوله دې پټه کړي او داسې چیغې دې ووهي: زه ناپاک یم! زه ناپاک یم!

⁴⁶ترڅو پورې چې هغه نفر په دې ناروغۍ باندې اخته وي هغه ناپاک پاتې کیږي. هغه باید یوازې او د کمپ څخه دباندې واوسیږي.

⁴⁷که چېرې کوم کالي چڼاسکې وهلي وي که هغه د وړیو څخه جوړ شوي وي یا د کتان کالي وي،

⁴⁸د کتان یا وړیو ټوکر، یا څرمن او یا داسې شی وي چې له څرمنې څخه جوړ شوی وي،

⁴⁹که چېرې هغه چڼاسکه شنه بخنه یا سره بخنه وي، نو دا یوه خپرېدونکې چڼاسکه ده او کاهن ته باید وروښودل شي.

⁵⁰کاهن دې هغه چڼاسکه معاینه کړي او هغه شی دې اووه ورځې جدا کېږدي.

⁵¹په اوومه ورځ دې هغه بیا معاینه کړي. که چېرې چڼاسکه خپره شوې وه نو هغه شی ناپاک دی.

⁵²کاهن باید هغه کالي وسوزوي، ځکه چې چڼاسکه خرابوونکې ده او هغه دې وسوزول شي.

⁵³مګر کله چې کاهن هغه معاینه کړي او دا معلومه کړي چې چڼاسکه په هغه شي باندې نه ده خپره شوې،

⁵⁴هغه به دا حکم وکړي چې دا خراب شوی شی ومینځل شي. بیا دې هغه د نورو اوو ورځو دپاره جدا کېږدي.

⁵⁵له دې وروسته چې خراب شوی شی ومینځل شي، کاهن دې هغه بیا معاینه کړي. که چېرې چڼاسکې خپل رنګ نه وي بدل کړی، که څه هم هغه خپره شوې نه ده، بیاهم هغه ناپاک دی. که دا خرابوالی په مخ کې وي یا شاته، تاسو باید دا شی وسوزوئ.

⁵⁶مګر کله چې کاهن هغه معاینه کړي، که چېرې د هغه شي د مینځلو څخه وروسته چڼاسکه مړاوې شوې وي، هغه دې خرابه شوې برخه وشلوي.

⁵⁷مګر که چېرې چڼاسکه په پورتنیو شیانو باندې بیا راښکاره شي، نو دا خپرېدونکې ده او په هرڅه باندې چې چڼاسکه وي خاوند یې باید هغه شی وسوزوي.

⁵⁸که چېرې هغه نفر هغه شی ومینځي او چڼاسکه ورکه شي هغه دې بیا ومینځل شي نو هغه شی به پاک شي.

⁵⁹دا مقررات د هغو کالیو په هکله دي چې چڼاسکې وهلي وي که هغه د وړیو یا کتان څخه جوړ شوي وي، د وړیو یا کتان ټوکر وي یا هغه شیان وي چې د څرمنې څخه جوړ شوي وي. نو په دې ډول به کاهن کولی شي دا فیصله وکړي چې آیا دا شیان پاک دي یا ناپاک.>