لاویان 14

¹څښتن حضرت موسیٰ ته وفرمایل:

³کاهن دې د کمپ څخه دباندې لاړ شي او هغه دې معاینه کړي. که چېرې هغه نفر د پوستکي د ساري ناروغۍ څخه روغ شوی وي،

⁴کاهن به داسې حکم وکړي چې دوه ژوندۍ پاکې مرغۍ، د صبر لږ لرګي، سور تار او د وېلني بوټی دې د پاکوالي د مراسمو دپاره راوړل شي.

⁵بیا به کاهن داسې حکم وکړي چې له دې مرغیو څخه دې یو د خټو د لوښي دپاسه چې د چینې تازه اوبه په کې وي، حلاله شي.

⁶هغه دې بله ژوندۍ مرغۍ د صبر د لرګي، سور تار او د وېلني د بوټي سره واخلي او د هغې مرغۍ په وینه کې دې غوټه کړي کومه چې د تازه اوبو دپاسه حلاله شوې وه.

⁷کاهن به اووه ځلې په هغه نفر باندې چې د ساري ناروغۍ څخه پاکیږي هغه وینه وشیندي او هغه به پاک اعلان کړي. بیا دې هغه ژوندۍ مرغۍ په صحرا کې خوشې کړي.

⁸کوم نفر چې پاکیږي، هغه باید خپل کالي ومینځي، خپل ټول ویښتان دې وخرایي او غسل دې وکړي، بیا به هغه پاک شي. له دې وروسته هغه کولی شي چې کمپ ته ورننوزي، مګر اووه ورځې باید د خپلې خېمې څخه دباندې واوسیږي.

⁹هغه باید په اوومه ورځ بیا خپل سر، ږیره، وروځې او د بدن پاتې ویښتان وخرایي. خپل کالي دې ومینځي او غسل دې وکړي، نو هغه به پاک شي.

¹⁰هغه باید په اتمه ورځ دغه شیان راوړي: دوه وري او یوه یو کلنه مېږه چې په هر یو کې عیب نه وي، د غلې دانې د نذرانې دپاره درې کیلوګرامه ښه اوړه چې د زیتونو تېل ورسره ګډ وي او یوه پیاله د زیتونو تېل.

¹¹کاهن باید هغه نفر چې پاکیږي د دې نذرانو سره د مقدسې خېمې د دروازې په خوله کې د څښتن حضور ته ورولي.

¹²بیا به کاهن یو وری د یوې پیالې تېلو سره واخلي او هغه به د تاوان د نذرانې په توګه وړاندې کړي. کاهن به دا پورته ونیسي ترڅو دا وښایي چې هغه څښتن ته وقف شوي دي.

¹³هغه دې وری په هغه مقدس ځای کې حلال کړي چېرته چې د ګناه د نذرانو او سوزېدونکو نذرانو دپاره حیوانات حلالیږي. هغه باید داسې وکړي ځکه چې د تاوان نذرانه د ګناه د نذرانې په شان د کاهن ده او هغه ډېره مقدسه ده.

¹⁴کاهن دې د وري له وینې څخه لږه وینه واخلي او د هغه نفر چې پاکیږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې دې وسولوي.

¹⁵بیا به کاهن لږ تېل راواخلي او د خپل چپ لاس په ورغوي کې به یې توی کړي،

¹⁶خپله ښي ګوته به په خپل ورغوي کې غوټه کړي او لږ تېل به په خپلې ګوتې سره د څښتن په حضور کې اووه ځلې وشیندي.

¹⁷کاهن دې لږ تېل چې د هغه د لاس په ورغوي کې پاتې دي راواخلي او د هغه نفر چې پاکیږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې وسولوي.

¹⁸کاهن به پاتې تېل چې د هغه په ورغوي کې دي د هغه چا په سر باندې توی کړي څوک چې پاکیږي او د هغه دپاره به د څښتن په حضور کې کفاره ادا کړي.

¹⁹بیا دې کاهن د ګناه نذرانه قرباني کړي او د هغه چا دپاره دې کفاره ادا کړي چې د خپلې ناپاکۍ څخه پاکیږي. له هغې څخه وروسته به د سوزېدونکې نذرانې دپاره حیوان حلال کړي

²⁰او د غلې دانې د نذرانې سره به یې په قربانګاه باندې وړاندې کړي. په دې ډول به د هغه نفر دپاره کفاره ادا کړي او هغه به پاک شي.

²¹که چېرې هغه نفر غریب وي او نور څه نه شي اخیستلی، باید یو وری د تاوان د نذرانې په توګه راوړي. کاهن به هغه څښتن ته د وقف کولو دپاره پورته ونیسي او د هغه نفر دپاره به کفاره ادا کړي. هغه به یو کیلوګرام ښه اوړه چې د زیتون تېل ورسره ګډ وي د غلې دانې د نذرانې دپاره راوړي او یوه پیاله تېل.

²²همدارنګه هغه نفر به دوه کوترې یا دوه قمري ګانې راوړي، یوه د ګناه د نذرانې دپاره او بله د سوزېدونکې نذرانې دپاره.

²³هغه باید په اتمه ورځ دا شیان د خپل ځان د پاکېدلو دپاره د مقدسې خېمې د دروازې په خوله کې کاهن ته راوړي.

²⁴کاهن به وری او د زیتونو تېل د تاوان د نذرانې دپاره واخلي او څښتن ته به یې د وقف کولو دپاره پورته ونیسي.

²⁵هغه به وری د تاوان د نذرانې په توګه حلال کړي او د هغه لږه وینه به واخلي او د هغه نفر چې پاکیږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې به یې وسولوي.

²⁶بیا دې کاهن لږ تېل راواخلي او د خپل چپ لاس په ورغوي کې دې توی کړي.

²⁷هغه دې په خپله ښي ګوته د خپل ورغوي څخه لږ تېل اووه ځلې د څښتن په حضور کې وشیندي.

²⁸د خپل ورغوي څخه دې لږ تېل په هماغو ځایونو باندې وسولوي چې د تاوان د نذرانې وینه یې ورباندې سولولې وه، یعنې د هغه نفر چې پاکیږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې دې هغه وسولوي.

²⁹کاهن به هغه تېل چې د هغه په ورغوي کې پاتې دي د هغه نفر په سر باندې چې پاکیږي توی کړي او په دې ډول به د هغه دپاره د څښتن په حضور کې کفاره ادا کړي.

³⁰‏-

³¹بیا به هغه نفر د هغو کوترو یا قمري ګانو څخه یوه د ګناه د نذرانې په توګه او بله د سوزېدونکې نذرانې په توګه د غلې دانې د نذرانې سره یوځای قرباني کړي. په دې ډول به کاهن د هغه نفر دپاره چې پاکیږي د څښتن په حضور کې کفاره ادا کړي.

³²دا مقررات د هغه چا دپاره دي چې د پوستکي په ساري ناروغۍ باندې اخته وي او د خپل ځان د پاکوالي دپاره هغه نذرانې چې رواج وې نه شي اخیستلی.>

³³څښتن حضرت موسیٰ او حضرت هارون ته وفرمایل:

³⁵د هغه کور خاوند باید لاړ شي او کاهن ته داسې ووایي چې ما په خپل کور کې یو شی لیدلی دی چې د چڼاسکې په شان ښکاري.

³⁶کاهن به داسې حکم وکړي چې مخکې له دې چې هغه د چڼاسکې د معاینه کولو دپاره لاړ شي هرڅه دې له هغه کور څخه راوویستل شي. که نه، نو هرڅه چې په هغه کور کې دي هغه به ناپاکه اعلان شي. له هغې وروسته دې کاهن دننه لاړ شي او کور دې معاینه کړي.

³⁷هغه دې په دېوالونو باندې چڼاسکې معاینه کړي. که چېرې په هغه کې شین بخن یا سوربخن داغونه وي چې دېوال خرابوي،

³⁸نو کاهن به د هغه کور څخه لاړ شي او کور به د اوو ورځو دپاره بند کړي.

³⁹په اوومه ورځ به کاهن بېرته راشي او هغه کور به بیا معاینه کړي. که چېرې چڼاسکه په دېوالونو باندې خپره شوې وي

⁴⁰هغه دې حکم وکړي چې هغه تیږې چې چڼاسکې ورباندې پیدا شوې دي هغه دې لېرې شي او د ښار څخه دې دباندې په یو ناپاک ځای کې وغورزول شي.

⁴¹له هغې وروسته باید کاهن ټول دننني دېوالونه په یو چا باندې وتوږي او خاوره دې د ښار څخه دباندې په یو ناپاکه ځای کې وغورزوي.

⁴²بیا دې د هغو تیږو په ځای چې لېرې کړای شوې دي د نورو تیږو څخه کار واخیستل شي او دېوالونو ته دې نوی اخېړ ورکړای شي.

⁴³که چېرې د دېوالونو د تیږو د لېرې کولو، توږلو او اخېړولو نه پس بیا په هغه کور کې چڼاسکه راښکاره شي

⁴⁴نو کاهن دې لاړ شي او هغه دې بیا معاینه کړي. که چېرې په کور کې چڼاسکه خپره شوې وي، نو دا یوه خرابوونکې چڼاسکه ده او دا کور ناپاک دی.

⁴⁵هغه کور باید وران شي او د هغه تیږې، تیرونه او ټوله خاوره باید د ښار څخه دباندې یو ناپاکه ځای ته یوړل شي.

⁴⁶په هغه دوران کې چې کاهن هغه کور بند اعلان کړی وي نو هرڅوک چې هغه ته ننوزي، هغه به تر ماښامه پورې ناپاک وي.

⁴⁷همدارنګه هرڅوک چې په هغه کور کې خوب کوي یا خوراک کوي باید خپل کالي ومینځي.

⁴⁸مګر که چېرې کاهن راشي او هغه معاینه کړي، نو که د کور د اخېړولو څخه وروسته چڼاسکه خپره شوې نه وي نو هغه به کور پاک اعلان کړي، ځکه چې چڼاسکه ورکه شوې ده.

⁴⁹هغه دې د کور د پاکولو دپاره دوه مرغۍ، د صبر لرګی، سور تار او د وېلني بوټی راواخلي.

⁵⁰هغه به له دغو مرغیو څخه یوه د خټو د لوښي دپاسه چې د چینې تازه اوبه په کې وي حلاله کړي.

⁵¹بیا دې د صبر لرګی، د وېلني بوټی، سور تار او ژوندۍ مرغۍ راواخلي او هغه دې د مړې مرغۍ په وینه او تازه اوبو کې غوټه کړي او په کور باندې دې اووه ځلې وشیندي.

⁵²په دې ډول به کاهن هغه کور د مرغۍ په وینه، تازه اوبو، ژوندۍ مرغۍ، د صبر په لرګي، د وېلني په بوټي او سور تار باندې پاک کړي.

⁵³بیا دې هغه ژوندۍ مرغۍ د ښار څخه دباندې په صحرا کې خوشې کړي. په دې ډول به هغه د کور دپاره د پاکوالي مراسم سرته ورسوي او هغه به پاک شي.>

⁵⁴دا مقررات د پوستکي د هرې ساري ناروغۍ دپاره دي لکه خارښت،

⁵⁵‏-

⁵⁶زخمونه، دانې یا پړسوب او همدارنګه په کالیو یا په کور کې چڼاسکه.

⁵⁷د دې مقرراتو له مخې دا فیصله کېدای شي چې یو شی په کوم وخت کې پاک دی او په کوم وخت کې ناپاک.