Mithali 18

¹Ajitengaye na wenzake hutafuta matakwa yake mwenyewe; Hushindana na kila shauri jema.

²Mpumbavu hapendezwi na ufahamu; Ila moyo wake udhihirike tu.

³Ajapo asiye haki, huja dharau pia; Na pamoja na aibu huja lawama.

⁴Maneno ya kinywa cha mtu ni kama maji ya vilindi; Kijito kibubujikacho; chemchemi ya hekima.

⁵Kukubali uso wake asiye haki si vizuri; Wala kumpotosha mwenye haki hukumuni.

⁶Midomo ya mpumbavu huingia katika fitina, Na kinywa chake huita mapigo.

⁷Kinywa cha mpumbavu ni uharibifu wake, Na midomo yake ni mtego wa nafsi yake.

⁸Maneno ya mchongezi ni kama vitoweo; Nayo hushukia pande za ndani za tumbo.

⁹Yeye naye aliye mvivu katika kazi yake, Ni ndugu yake aliye mharabu.

¹⁰Jina la Bwana ni ngome imara; Mwenye haki huikimbilia, akawa salama.

¹¹Mali ya mtu tajiri ni mji wake wa nguvu; Ni kama ukuta mrefu katika mawazo yake.

¹²Kabla ya uharibifu moyo wa mwanadamu hujivuna; Na kabla ya heshima hutangulia unyenyekevu.

¹³Yeye ajibuye kabla hajasikia, Ni upumbavu na aibu kwake.

¹⁴Roho ya mtu itastahimili udhaifu wake; Bali roho iliyovunjika nani awezaye kuistahimili?

¹⁵Moyo wa mwenye busara hupata maarifa; Na sikio la mwenye hekima hutafuta maarifa.

¹⁶Zawadi ya mtu humpatia nafasi; Humleta mbele ya watu wakuu.

¹⁷Ajiteteaye kwanza huonekana kuwa ana haki; Lakini jirani yake huja na kumchunguza.

¹⁸Kura hukomesha mashindano; Hukata maneno ya wakuu.

¹⁹Ndugu aliyechukizwa ni mgumu kuliko mji wa nguvu; Na mashindano ni kama mapingo ya ngome.

²⁰Tumbo la mtu litajazwa matunda ya kinywa chake; Atashiba mazao ya midomo yake.

²¹Mauti na uzima huwa katika uwezo wa ulimi; Na wao waupendao watakula matunda yake.

²²Apataye mke apata kitu chema; Naye ajipatia kibali kwa Bwana.

²³Maskini hutumia maombi; Bali tajiri hujibu kwa ukali.

²⁴Ajifanyiaye rafiki wengi ni kwa uangamivu wake mwenyewe; Lakini yuko rafiki aambatanaye na mtu kuliko ndugu.