Mithali 19

¹Afadhali maskini aendaye katika unyofu wake, Kuliko mpotofu wa midomo aliye mpumbavu.

²Tena si vizuri nafsi ya mtu ikose maarifa; Naye afanyaye haraka kwa miguu hutenda dhambi.

³Upumbavu wa mtu hupotosha njia yake; Na moyo wake hununa juu ya Bwana.

⁴Utajiri huongeza rafiki wengi; Bali maskini hutengwa na rafiki yake.

⁵Shahidi wa uongo hakosi ataadhibiwa; Wala asemaye uongo hataokoka.

⁶Watu wengi watamsihi mkuu ili awafadhili; Na kila mtu ni rafiki yake atoaye tunu.

⁷Ndugu zote wa maskini humchukia; Jinsi gani rafiki zake huzidi kujitenga naye! Huwafuata kwa maneno, lakini wametoweka.

⁸Apataye hekima hujipenda nafsi yake; Ashikaye ufahamu atapata mema.

⁹Shahidi wa uongo hakosi ataadhibiwa; Naye asemaye uongo ataangamia.

¹⁰Maisha ya anasa hayampasi mpumbavu; Sembuse mtumwa awatawale wakuu.

¹¹Busara ya mtu huiahirisha hasira yake; Nayo ni fahari yake kusamehe makosa.

¹²Ghadhabu ya mfalme ni kama ngurumo ya simba; Bali hisani yake kama umande juu ya majani.

¹³Mwana mpumbavu ni msiba kwa babaye; Na ugomvi wa mke kama kutona-tona daima.

¹⁴Nyumba na mali ni urithi apatao mtu kwa babaye; Bali mke mwenye busara, mtu hupewa na Bwana.

¹⁵Uvivu humtia mtu katika usingizi mzito; Na nafsi yake mvivu itaona njaa.

¹⁶Yeye aihifadhiye amri huihifadhi nafsi yake; Bali yeye asiyeziangalia njia zake atakufa.

¹⁷Amhurumiaye maskini humkopesha Bwana; Naye atamlipa kwa tendo lake jema.

¹⁸Mrudi mwanao, kwa maana liko tumaini; Wala usiikaze nafsi yako kwa kuangamia kwake.

¹⁹Mtu wa hasira nyingi atachukua adhabu yake, Maana ujapomwokoa huna budi kufanya tena.

²⁰Sikiliza mashauri, ukapokee mafundisho, Upate kuwa na hekima siku zako za mwisho.

²¹Mna hila nyingi moyoni mwa mtu; Lakini shauri la Bwana ndilo litakalosimama.

²²Haja ya mwanadamu ni hisani yake; Ni afadhali maskini kuliko mwongo.

²³Kumcha Bwana huelekea uhai; Atakaa ameshiba; hatajiliwa na ubaya.

²⁴Mtu mvivu hutia mkono wake sahanini; Ila hataki hata kuupeleka kinywani pake.

²⁵Mpige mwenye mzaha, na mjinga atapata busara; Mwonye mwenye ufahamu, naye atatambua maarifa.

²⁶Apotezaye mali za babaye na kumfukuza mamaye, Ni mwana aaibishaye, na kuleta lawama.

²⁷Mwanangu, acha kusikia mafundisho, Ukitaka tu kuyaasi maneno ya maarifa.

²⁸Shahidi asiyefaa kitu hudhihaki hukumu, Na vinywa vya wasio haki humeza uovu.

²⁹Hukumu zimewekwa tayari kwa wenye mzaha; Na mapigo kwa mgongo wa wapumbavu.