Zaburi 37

¹Usikasirike kwa sababu ya watenda mabaya, Usiwahusudu wafanyao ubatili.

²Maana kama majani watakatika mara, Kama miche mibichi watanyauka.

³Umtumaini Bwana ukatende mema, Ukae katika nchi, upendezwe na uaminifu.

⁴Nawe utajifurahisha kwa Bwana, Naye atakupa haja za moyo wako.

⁵Umkabidhi Bwana njia yako, Pia umtumaini, naye atafanya.

⁶Ataitokeza haki yako kama nuru, Na hukumu yako kama adhuhuri.

⁷Ukae kimya mbele za Bwana, Nawe umngojee kwa saburi; Usimkasirikie yeye afanikiwaye katika njia yake, Wala mtu afanyaye hila.

⁸Ukomeshe hasira, uache ghadhabu, Usikasirike, mwisho wake ni kutenda mabaya.

⁹Maana watenda mabaya wataharibiwa, Bali wamngojao Bwana ndio watakaoirithi nchi.

¹⁰Maana bado kitambo kidogo asiye haki hatakuwapo, Utapaangalia mahali pake wala hatakuwapo.

¹¹Bali wenye upole watairithi nchi, Watajifurahisha kwa wingi wa amani.

¹²Asiye haki hunuia mabaya juu ya mwenye haki, Na kumsagia meno yake.

¹³Bwana atamcheka, Maana ameona kwamba siku yake inakuja.

¹⁴Wasio haki wamefuta upanga na kupinda uta, Wamwangushe chini maskini na mhitaji, Na kuwaua wenye mwenendo wa unyofu.

¹⁵Upanga wao utaingia mioyoni mwao wenyewe, Na nyuta zao zitavunjika.

¹⁶Kidogo alicho nacho mwenye haki ni bora Kuliko wingi wa mali wa wasio haki wengi.

¹⁷Maana mikono ya wasio haki itavunjika, Bali Bwana huwategemeza wenye haki.

¹⁸Bwana anazijua siku za wakamilifu, Na urithi wao utakuwa wa milele.

¹⁹Hawataaibika wakati wa ubaya, Na siku za njaa watashiba.

²⁰Bali wasio haki watapotea, Nao wamchukiao Bwana watatoweka, Kama uzuri wa mashamba, Kama moshi watatoweka.

²¹Asiye haki hukopa wala halipi, Bali mwenye haki hufadhili, hukirimu.

²²Maana waliobarikiwa na yeye watairithi nchi, Nao waliolaaniwa na yeye wataharibiwa.

²³Hatua za mtu zaimarishwa na Bwana, Naye aipenda njia yake.

²⁴Ajapojikwaa hataanguka chini, Bwana humshika mkono na kumtegemeza.

²⁵Nalikuwa kijana nami sasa ni mzee, Lakini sijamwona mwenye haki ameachwa Wala mzao wake akiomba chakula.

²⁶Mchana kutwa hufadhili na kukopesha, Na mzao wake hubarikiwa.

²⁷Jiepue na uovu, utende mema, Na kukaa hata milele.

²⁸Kwa kuwa Bwana hupenda haki, Wala hawaachi watauwa wake. Wao hulindwa milele, Bali mzao wa wasio haki ataharibiwa.

²⁹Wenye haki watairithi nchi, Nao watakaa humo milele.

³⁰Kinywa chake mwenye haki hunena hekima, Na ulimi wake husema hukumu.

³¹Sheria ya Mungu wake imo moyoni mwake. Hatua zake hazitelezi.

³²Mtu asiye haki humvizia mwenye haki, Na kutafuta jinsi ya kumfisha.

³³Bwana hatamwacha mkononi mwake, Wala hatamlaumu atakapohukumiwa.

³⁴Wewe umngoje Bwana, Uishike njia yake, Naye atakutukuza uirithi nchi, Wasio haki watakapoharibiwa utawaona.

³⁵Nimemwona mtu asiye haki mkali sana, Akijieneza kama mwerezi wa Lebanoni.

³⁶Nikapita na kumbe! Hayuko, Nikamtafuta wala hakuonekana.

³⁷Umwangalie sana mtu mkamilifu, Umtazame mtu mnyofu, Maana mwisho wake mtu huyo ni amani.

³⁸Wakosaji wataangamizwa pamoja, Wasio haki mwisho wao wataharibiwa.

³⁹Na wokovu wa wenye haki una Bwana; Yeye ni ngome yao wakati wa taabu.

⁴⁰Naye Bwana huwasaidia na kuwaopoa; Huwaopoa na wasio haki na kuwaokoa; Kwa kuwa wamemtumaini Yeye.