Zaburi 38

¹Ee Bwana, usinilaumu katika ghadhabu yako, Wala usiniadhibu kwa ukali wa hasira yako.

²Kwa maana mishale yako imenichoma, Na mkono wako umenipata.

³Hamna uzima katika mwili wangu Kwa sababu ya ghadhabu yako. Wala hamna amani mifupani mwangu Kwa sababu ya hatia zangu.

⁴Maana dhambi zangu zimenifunikiza kichwa, Kama mzigo mzito zimenilemea mno.

⁵Jeraha zangu zinanuka, zimeoza, Kwa sababu ya upumbavu wangu.

⁶Nimepindika na kuinama sana, Mchana kutwa nimekwenda nikihuzunika.

⁷Maana viuno vyangu vimejaa homa, Wala hamna uzima katika mwili wangu.

⁸Nimedhoofika na kuchubuka sana, Nimeugua kwa fadhaa ya moyo wangu.

⁹Bwana, haja zangu zote ziko mbele zako, Kuugua kwangu hakukusitirika kwako.

¹⁰Moyo wangu unapwita-pwita, Nguvu zangu zimeniacha; Nuru ya macho yangu nayo imeniondoka.

¹¹Wanipendao na rafiki zangu wanasimama mbali na pigo langu; Naam, karibu zangu wamesimama mbali.

¹²Nao wanaoutafuta uhai wangu hutega mitego; Nao wanaotaka kunidhuru hunena mabaya; Na kufikiri hila mchana kutwa.

¹³Lakini kama kiziwi sisikii, Nami ni kama bubu asiyefumbua kinywa chake.

¹⁴Naam, nimekuwa kama mtu asiyesikia, Ambaye hamna hoja kinywani mwake.

¹⁵Kwa kuwa nakungoja Wewe, Bwana, Wewe utajibu, Ee Bwana, Mungu wangu.

¹⁶Maana nalisema, Wasije wakanifurahia; Mguu wangu ukiteleza wajitukuza juu yangu.

¹⁷Kwa maana mimi ni karibu na kusita, Na maumivu yangu yako mbele yangu daima.

¹⁸Kwa maana nitaungama uovu wangu, Na kusikitika kwa dhambi zangu.

¹⁹Lakini adui zangu ni wazima wenye nguvu, Nao wanaonichukia bure wamekuwa wengi.

²⁰Naam, wakilipa mabaya kwa mema, Huwa adui zangu kwa kuwa nalifuata lililo jema.

²¹Wewe, Bwana, usiniache, Mungu wangu, usijitenge nami.

²²Ufanye haraka kunisaidia, Ee Bwana, wokovu wangu.