1 Korintoslylara haty 16

¹Mukaddesler üçin kömek ýygnama hakda, siz hem Galatýa ýygnaklaryna tabşyryşym ýaly ediň.

²Men baranymda, ýygnama zerurlygy bolmaz ýaly, siziň her biriňiz hepdäniň birinji güni öz ýagdaýyna görä, bir mukdar pul süýşürip, ýanynda saklasyn.

³Baranymda bolsa mynasyp gören adamlaryňyzy siziň gatanjyňyzy Iýerusalime gowşurar ýaly, hatlar bilen ýollaryn.

⁴Meniň gitmegim hem ýaraşykly bolsa, onda olar meniň bilen gider.

⁵Makedoniýadan geçenimden soň, siziň ýanyňyza-da bararyn, sebäbi men Makedoniýadan geçmekçi.

⁶Meni gitjek ýerime ugratmagyňyz üçin, belki, siziň ýanyňyzda bir mütdet galaryn ýa gyşy-da geçirerin.

⁷Çünki sizi häzir ýol ugrunda göresim gelenok. Reb rugsat etse, birnäçe wagtlap ýanyňyzda bolaýsam diýen umydym bar.

⁸Men Hasyl baýramyna çenli Efesosda bolaryn.

⁹Çünki maňa uly, iş bitiriji bir gapy açyldy, garşy çykýanlar hem köp.

¹⁰Timoteos baranda, ýanyňyzda gorkusyz bolar ýaly, göz-gulak boluň, sebäbi ol hem meniň ýaly Rebbiň işini edýär.

¹¹Ony hiç kim äsgermezlik etmesin. Meniň ýanyma geler ýaly, ony sag-salamat ýola salyň. Çünki men oňa doganlar bilen bilelikde garaşýaryn.

¹²Dogan Apollos hakda aýdanymda bolsa, men doganlar bilen bilelikde siziň ýanyňyza gitmegini ondan köp haýyş etdim, emma onuň şu wagt gelmäge meýli ýok; amatly pursat tapanda geler.

¹³Hüşgär boluň, imanda berk duruň, mert boluň, gujurly boluň!

¹⁴Edýän ähli zadyňyz söýgi bilen bolsun.

¹⁵Doganlar, sizden şuny haýyş edýärin, siz Stefanyň içersini tanaýansyňyz, olaryň Ahaýada ilkinji mesihilerdigini we mukaddesleriň gullugyna berlendiklerini bilýänsiňiz.

¹⁶Siz hem şeýle adamlara, olar bilen işläp, zähmet çekýänleriň hemmesine baş egiň.

¹⁷Men Stefanyň, Fortunatusyň we Ahaýakusyň gelenine begenýärin, sebäbi olar maňa siziň ýoklugyňyzy bildirmeýärler.

¹⁸Çünki olar meniň ruhuma-da siziňkä berişleri ýaly ynjalyk berdi. Şeýle adamlaryň gadyryny biliň.

¹⁹Aziýanyň ýygnaklary size salam aýdýar. Akila we Priskilla öýlerindäki ýygnak bilen birlikde size Rebde köp salam aýdýar.

²⁰Doganlaryň bary size salam aýdýarlar. Biri-biriňize mukaddes ogşuk bilen salam aýdyň.

²¹Men Pawlus öz salamymy öz elim bilen ýazýaryn.

²²Reb Isa Mesihi söýmeýäne lagnat bolsun. Eý Rebbimiz, gel!

²³Reb Isa Mesihiň merhemeti siziň bilen bolsun!

²⁴Meniň söýgim Mesih Isada siziň ähliňiz bilen bolsun! Omyn.