Wagyz kitaby 1

¹Bu Iýerusalimde patyşalyk eden Dawudyň ogly Wagyzçynyň sözleridir.

²Wagyzçy: «Biderek! Biderek! Bary biderek!» diýýär.

³Ynsan Günüň astynda çekýän zähmetinden näme peýda tapýar?

⁴Bir nesil gidip, bir nesil gelýär; emma bu dünýä ebedilik galýar.

⁵Gün dogýar, ýaşýar; öz dogjak ýerine tarap howlugýar.

⁶Ýel günorta tarap öwüsýär, soňra demirgazyga öwrülýär. Ol töwerege aýlanyp-aýlanyp, ýene öz aýlawyna dolanýar.

⁷Ähli derýalar deňze akýar, emma deňiz dolmaýar. Derýalar täzeden akmak üçin öz akýan ýerine dolanýarlar.

⁸Bar zat irizýär. Muny söz bilen beýan edip bolmaz. Göz görmekden doýmaýar, gulak-da eşitmekden.

⁹Näme bolan bolsa, ýene şol bolar, näme edilen bolsa, ýene şol ediler. Günüň astynda täze zat ýok.

¹⁰«Seret, ine, şu täze» diýip boljak zat barmy? Ol owaldan bardy, bizden öňem bolupdyr.

¹¹Öňki bolup geçeni hiç kim ýatlamaz; indiki geljekler-de, häzirki hem soňky boljak zatlary ýatlamaz.

¹²Men, Wagyzçy, Iýerusalimde Ysraýylyň patyşasydym.

¹³Gögüň astynda edilýän ähli zatlar barada paýhas bilen gözleg hem barlag geçirmegi ýüregime düwdüm. Işli bolsunlar diýip, bu Hudaýyň ynsanlara beren agyr ýumşydyr.

¹⁴Günüň astynda edilýän ähli işleri gördüm; ine, bary biderek, salgyma çapmak.

¹⁵«Egrini göneldip bolmaz; ýok zady-da sanap bolmaz».

¹⁶Öz-özüme şeýle diýdim: «Ine, men beýik bolup, paýhasda özümden öň Iýerusalimde hökmürowanlyk edenleriň hemmesinden ozdum. Ýüregim paýhas bilen bilime baýdy».

¹⁷Akyldarlyga, telbelikdir akmaklyga düşünmäge ýüregimi berdim. Munuň-da salgyma çapmakdygyny bildim.

¹⁸«Paýhas näçe köp bolsa, gussa-da şonça köpdür. Bilimini artdyrýanlar, derdini-de artdyrýandyrlar».