Süleýmanyň pähimleri 31

¹Massa patyşasy Lemuwala ejesiniň öwreden wajyp sözleri:

²Näme, oglum? Göwrämden önen zürýadym! Näme diýeýin, Hudaýdan diläp alan oglum?

³Güýjüňi hem ýollaryňy patyşalary heläkleýän aýallara berme.

⁴Eý, Lemuwal, şerap içmek patyşalara ýaraşmaz, meý-içgi hökümdarlara gelişmez.

⁵Olar içip, düzgüni unudaýmasynlar, ähli ezilenleriň hakyny ýoýaýmasynlar.

⁶Meýi heläk bolup barýana, şeraby ajy hasrat çekýäne bergin.

⁷Olar içip, garyplygyny unutsyn, azabyny ýada salmasyn.

⁸Agzyňy dilsizler üçin, hossarsyzlaryň haky üçin açgyn.

⁹Geple, dogruçyllyk bilen höküm çykar, garybyň we mätäjiň hakyny alyp ber.

¹⁰Başarjaň aýaly kim tapyp bilýär? Onuň gadyr-gymmaty jöwherden ýokarydyr.

¹¹Äri oňa ýürekden bil baglaýandyr, hiç zada mätäç bolmaz.

¹²Ol ärine ýamanlyk däl-de, bütin ömrüne ýagşylyk edýändir.

¹³Ýüňi we zygyry saýlaýandyr, elleri höwes bilen işleýändir.

¹⁴Ol söwda gämileri ýaly, içerisiniň iýjegini uzakdan getirýändir.

¹⁵Entek garaňkyka turup, içerisine nahar, hyzmatkärlerine tabşyryk berýändir.

¹⁶Oýlanyp, ekin meýdanyny satyn alýandyr, eliniň gazanjy bilen üzümleri oturdýandyr.

¹⁷Bilini berk guşap, gollaryna güýjüni toplaýandyr.

¹⁸Harydynyň peýdasyny bilýändir, çyrasy gijesine-de sönýän däldir.

¹⁹Elini çarha goýýandyr, barmaklary igi tutýandyr.

²⁰Garyba eli açykdyr, mätäje elini uzadýandyr.

²¹Içerisi üçin gardan gorkýan däldir, çünki bütin içerisi galyň geýinýändir.

²²Özi ýorgan köpeýändir, lybasy nepis keteni we gyrmyzydyr.

²³Äri şäher derwezesiniň alnynda tanalýar, ýurduň ýaşulularynyň arasynda oturýandyr.

²⁴Keteniden lybaslar tikip satýandyr, söwdagärlere guşaklar eltip berýändir.

²⁵Güýç hem hormat onuň lybasydyr. Geljege seredip guwanýandyr.

²⁶Danalyk bilen sözleýändir, dilinde dogry öwütler bardyr.

²⁷Içerisiniň işlerine oňat seredýändir, ýaltalyk çöregini iýýän däldir.

²⁸Çagalary turup, oňa alkyş aýdýandyr, äri hem turup, ony taryplaýandyr:

²⁹«Başarjaňlyk bilen işleýän zenan köpdür, ýöne sen olaryň baryndan ýokarysyň».

³⁰Görmegeýlik aldawçydyr, owadanlyk puçdur, diňe Rebden gorkýan aýal taryplanýandyr.

³¹Elleriniň miwesini oňa beriň, goý, şäher derwezesinde ony işleri öwsün.