Işaýa 24

¹Ine, Reb ýer ýüzüni weýran edip çolardar, ýeriň ýüzüni tanar ýaly etmez Ol, ilatyny dargadar.

²Halkyň-da, ruhanyň-da, guluň-da, hojaýynyň-da, gyrnagyň-da, bikäniň-de, satyn alýanyň-da, satýanyň-da, bergidaryň-da, algydaryň-da, karzdaryň-da, karz bereniň-de takdyry birdir.

³Ýer ýüzi bütinleý weýran edilip talanar, muny Reb aýdýandyr.

⁴Ýer ýüzi solýar, guraýar heläk bolup, ýitip gider dünýä; dünýäniň halklarynyň güýçlüleri heläk bolarlar.

⁵Ilatlar harama çykardy dünýäni, olar kanunlardan çykdylar, parzlary saklamadylar, ebedi ähti bozdular.

⁶Muňa görä dünýä lagnat ýagýar, ilaty ýazyklarynyň jezasyny çekýär, şonuň üçin ýer ýüzüniň ilaty ýanyp, gaty az adam galýar.

⁷Täze şerap gutarýar, solýar üzüm agajy, ah çekýär şadyýanlar.

⁸Depreklerem şat owazyny kesdi, şadyýan sesler eşidilmedi, barbat sem boldy.

⁹Indi aýdym aýdyp, şerap içmezler, agyzlara ajy deger içgi.

¹⁰Weýran bolan şäher harabalykdyr, hiç kim girmez ýaly, ähli öý ýapyldy.

¹¹Köçelerde şerap üçin nalaşýarlar, şatlykdan nam-nyşan galmady, begenç dünýäni terk etdi.

¹²Şäher harabalyk, bölek-bölekdir derwezeler.

¹³Zeýtun agajy kakylanda, hasyl ýygylandan soň, artyp galan üzümler bilen näme edilýän bolsa, dünýädäki milletler bilen-de şeýle bolar.

¹⁴Olar seslerini gataldyp, begenjine heşelle kakarlar, Rebbiň beýikligi üçin günbatardan gygyryşarlar.

¹⁵Şonuň üçin gündogarda Rebbi öwüň, Ysraýylyň Hudaýy Rebbiň adyny söhratlandyryň deňiz adalarynda.

¹⁶Öwgi aýdymlary ýaňlanýar ýeriň aňry ujunda: «Dogry Bolana şöhrat!» Emma men: «Gara maňlaý, gara maňlaý! Dat günüme! Dönükler dönüklik edýärler, dönükligi çäksiz olaryň» diýdim.

¹⁷Eý, ýer ýüzüniň ilaty, gorky, çukur we duzak başyňyzda!

¹⁸Gorky sesinden gaçan çukura gapgarlar, çukurdan çykan duzaga düşer, gögüň penjireleri açylar, ýeriň binalary titrär.

¹⁹Jaýryk-jaýryk bolar ýer ýüzi, bölek-bölek bolar ol, ýer ýüzi güýçli sarsar.

²⁰Serhoş kimin yraň atar ol, sakçy jaýy kimin çaýkanar, ýazyklary oňa agyr ýük bolar, ýykylar-da, soň galmaz ol.

²¹Şol gün Reb gökde gök goşunlaryny, ýerde dünýäniň şalaryny jezalandyrar.

²²Ýerzemine tussag kimin toplanarlar, zyndana gabalarlar, birnäçe günden soň jezalandyrylarlar.

²³Aýyň ýüzi gyzarar, gün utanar; Hökmürowan Reb Siýon dagynda, Iýerusalimde höküm sürer, Ýaşulularynyň öňünde Öz şöhratyny görkezer.