Mattanyň Hoş Habary 22

¹Isa olara ýene-de tymsallar bilen gürrüň berip, şeýle diýdi:

²Gögüň Patyşalygy öz ogly üçin gelin toýuny tutan patyşa ýalydyr.

³Ol toýa çagyrylanlara habar etmek üçin hyzmatkärlerini iberýär, ýöne çagyrylanlar gelmek islemeýärler.

⁴Patyşa ýene başga hyzmatkärleri iberip, olara şeýle diýýär: „Çagyrylanlara aýdyň, ine, men naharymy taýýarladym, öküzler, semiz mallar soýuldy, ähli zat taýýar, toýa gelsinler".

⁵Emma olar ähmiýet bermeýärler, biri öz ekin meýdanyna, ýene biri öz söwdasynyň ugruna çykýar.

⁶Beýlekiler-de onuň hyzmatkärlerini tutup, horlaýarlar, olary öldürýärler.

⁷Şeýlelikde, patyşa gazaplanyp, goşun ýollaýar-da, ýaňky ganhorlary derbi-dagyn edýär, şäherlerini otlaýar.

⁸Onsoň hyzmatkärlerine diýýär: „Toý taýýar, ýöne çagyrylanlar muňa mynasyp däl eken.

⁹Ýol çatryklaryna baryň-da, kimi tapsaňyz, toýa çagyryň".

¹⁰Bu hyzmatkärler hem ýollara çykyp, ýaman diýmän, ýagşy diýmän, tapanlarynyň baryny üýşürýärler, toýhana myhmandan dolýar.

¹¹Patyşa myhmanlara seretjek bolup içerik girende, toý geýimini geýmedik bir adama gözi düşýär.

¹²Oňa diýýär: „Eý dost, sen toý geýimini geýmän, bu ýere nähili girdiň?" Ýöne ol sesini çykarmaýar.

¹³Onsoň patyşa hyzmatkärlere diýýär: „El-aýagyny baglaň-da, ony daşaryk, garaňkylyga taşlaň, ol ýerde agy we diş gyjama bolar".

¹⁴Çünki çagyrylanlar köp, saýlananlar azdyr».

¹⁵Onsoň fariseýler gidip, Ony gepde tutmak barada maslahat geçirdiler.

¹⁶Hirodesçiler bilen öz şägirtlerini Isanyň ýanyna iberip diýdiler: «Mugallym! Biz Seniň dogruçyldygyňy, Hudaýyň ýoluny hakykat ýüzünden öwredýändigiňi, hiç kime ýaranjak bolmaýandygyňy bilýäris, çünki Sen adamlaryň derejesine bakmaýarsyň.

¹⁷Indi bize aýt, Sen näme diýýärsiň, kaýsara salgyt tölemek dogrumy ýa dälmi?»

¹⁸Isa olaryň ýaman niýetlerini bilip diýdi: «Meni näme üçin synaýarsyňyz, eý ikiýüzlüler?

¹⁹Maňa salgyt puluny görkeziň». Olar hem Oňa bir dinar getirdiler.

²⁰Isa olara: «Şu surat bilen ýazgy kimiňki?» diýdi.

²¹Olar: «Kaýsaryňky» diýdiler. Şonda Isa olara: «Onda, kaýsaryňkyny kaýsara, Hudaýyňkyny Hudaýa beriň» diýdi.

²²Olar muny eşidenlerinde haýran galyp, Onuň ýanyndan gitdiler.

²³Ölümden direlme ýokdur diýýän saddukeýler şol gün Isanyň ýanyna gelip, Oňa sorag berdiler:

²⁴Mugallym, Musa: „Eger bir adamyň zürýady bolman ölse, dogany onuň aýalyny alyp, doganyna nesil ýetişdirmelidir" diýipdir.

²⁵Biziň aramyzda ýedi dogan bardy. Birinjisi öýlendi-de öldi. Zürýady bolmansoň, aýalyny doganyna galdyrdy.

²⁶Ikinjisi, üçünjisi, tä ýedinjisine çenli şeýle boldy.

²⁷Olaryň hemmesinden soň hem aýal öldi.

²⁸Indi, ölüler direlende, bu aýal ol ýedi doganyň haýsysynyň aýaly bolar? Çünki hemmesi ony alypdy».

²⁹Isa olara şeýle jogap berdi: «Siz Mukaddes Ýazgylary, Hudaýyň gudratyny bilmän ýalňyşýarsyňyz.

³⁰Ölüler direlenlerinde öýlenmän, äre çykman, Hudaýyň Gökdäki perişdeleri ýaly bolarlar.

³¹Ölümden direlmä gelenimizde bolsa, siz Hudaýyň özüňize:

³²„Men Ybraýymyň Hudaýy, Yshagyň Hudaýy, Ýakubyň Hudaýydyryn" diýenini okamadyňyzmy? Ol ölüleriň däl, dirileriň Hudaýydyr».

³³Märeke muny eşidip, Onuň taglymatyna haýran galdy.

³⁴Fariseýler Isanyň saddukeýleriň sesini çykartmanlygyny eşidenlerinde, bir ýere ýygnanyşdylar.

³⁵Olardan bir kanunçy Isany synamak üçin:

³⁶«Mugallym, kanunda iň uly tabşyryk näme?» diýip sorady.

³⁷Isa oňa şeýle diýdi: «„Hudaýyň Rebbi bütin ýüregiň, bütin janyň, bütin düşünjäň bilen söý".

³⁸Şu birinji we iň uly tabşyrykdyr.

³⁹Ikinji hem şonuň ýaly: „Goňşyňy özüň ýaly söý".

⁴⁰Bütin kanun we pygamberler ýazgylary şu iki tabşyryga baglydyr».

⁴¹Fariseýler ýygnanyşyp durkalar, Isa olardan:

⁴²«Mesih barada näme pikir edýärsiňiz? Ol kimiň Ogly?» diýip sorady. Olar hem Isa: «Ol Dawudyň Ogly» diýdiler.

⁴³Isa olara şeýle diýdi: «Onda, näme üçin Dawut Ruhdan ylham alyp, Oňa Reb diýip:

⁴⁴„Reb meniň Rebbime diýdi: Duşmanlaryňy aýaklaryň astynda goýýançam, Meniň sagymda otur" diýýär?

⁴⁵Eger Dawut Oňa Reb diýýän bolsa, Ol nähili Dawudyň ogly bolýar?»

⁴⁶Hiç kim Isa jogap berip ýekeje söz hem aýdyp bilmedi, şol günden beýläk hiç kim Ondan bir zat soramaga ýürek etmedi.