Mattanyň Hoş Habary 23

¹Onsoň Isa halka, Öz şägirtlerine şeýle gürrüň berdi:

²Kanunçylar bilen fariseýler Musanyň ornunda otyrlar.

³Şonuň üçin olaryň size aýdýanlarynyň baryny ýerine ýetiriň, berjaý ediň, ýöne olaryň edenlerini etmäň, çünki aýdyp-da, özleri edýän däldirler.

⁴Olar agyr, götermesi kyn ýükleri baglap, adamlaryň gerşine goýýandyrlar, ýöne özleri bu ýükleri götermek üçin bir barmaklaryny hem gymyldatmak isleýän däldirler.

⁵Olar edýän ähli zatlaryny göz üçin edýändirler. Doga gutularyny giňeldip, geýimleriniň pürçügini uzaldýandyrlar.

⁶Zyýapatlarda töri, sinagogalarda baş kürsüleri,

⁷bazar ýerinde salam almagy, adamlaryň özlerine „mugallym" diýmegini söýýändirler.

⁸Siz özüňize „mugallym, mugallym" diýdirmäň, çünki siziň Mugallymyňyz birdir, siziň baryňyz dogansyňyz.

⁹Ýer ýüzünde hiç kime „Ata" diýmäň, çünki siziň Ataňyz birdir, Ol Gökdedir.

¹⁰Özüňize „Ýolbaşçy" diýdirmäň, çünki siziň Ýolbaşçyňyz birdir, Ol Mesihdir.

¹¹Ulyňyz hemmäňize hyzmatkär bolsun.

¹²Çünki özüni beýgelden peseler, özüni peselden beýgeler.

¹³Waý günüňize, eý, kanunçylar we fariseýler, ikiýüzlüler! Çünki siz Gögüň Patyşalygyny adamlara baglaýarsyňyz, ne özüňiz girýärsiňiz, ne-de girjeklere ýol berýärsiňiz.

¹⁴Waý günüňize, eý, kanunçylar we fariseýler, ikiýüzlüler! Çünki siz dul hatynlaryň öýlerini talap, göz üçin uzyn-uzyn dogalar okan bolýarsyňyz. Şonuň üçin siz has agyr jeza sezewar bolarsyňyz.

¹⁵Waý günüňize, eý, kanunçylar we fariseýler, ikiýüzlüler! Çünki birje adamy öz diniňize girizjek bolup, deňizlere, düzlere aýlanýarsyňyz. Girizeniňizde bolsa, ony özüňizden iki esse dowzah ogly edýärsiňiz.

¹⁶„Biriniň ybadathanadan ant içmegi möhüm däl, ýöne kim ybadathananyň gyzylyndan ant içse, öz antyna daňylgy bolar" diýýän kör ýol görkezijiler, waý günüňize!

¹⁷Eý, akmaklar we körler! Haýsysy uly, gyzylmy ýa gyzyly mukaddes edýän ybadathana?

¹⁸Ýene: „Biriniň gurbanlyk edilýän ýerden ant içmegi möhüm däl, ýöne kim onuň üstündäki gurbandan ant içse, öz antyna daňylgy bolar" diýýärsiňiz.

¹⁹Eý, akmaklar we körler! Haýsysy uly, gurbanmy ýa gurbany mukaddes edýän gurbanlyk ýeri?

²⁰Gurbanlyk edilýän ýerden ant içýän ondan hem onuň üstündäki zatlaryň hemmesinden ant içýändir.

²¹Ybadathanadan ant içýän ondan we onuň içinde mekan tutan Hudaýdan ant içýändir.

²²Gökden ant içýän Hudaýyň tagtyndan we onuň üstünde Oturandan ant içýändir.

²³Waý günüňize, eý, kanunçylar we fariseýler, ikiýüzlüler! Çünki siz narpyzdan, anisden we zireden zekat berip, kanunyň wajybrak işlerini, adyllygy, rehimdarlygy, imany taşladyňyz. Bu zatlary etmeli, beýlekileri-de taşlamaly däldiňiz.

²⁴Eý çybyny süzüp aýryp, düýäni ýuwudýan kör ýol görkezijiler!

²⁵Waý günüňize, eý, kanunçylar we fariseýler, ikiýüzlüler! Çünki siz käsedir gap-çanagyň daşyny arassalaýarsyňyz, olaryň içi bolsa ogurlyk hem nebisjeňlikden doly.

²⁶Eý, kör fariseý! Käsedir gap-çanagyň daşy-da arassa bolar ýaly, öňinçä içini arassala.

²⁷Waý günüňize, eý, kanunçylar we fariseýler, ikiýüzlüler! Çünki siz agardylyp, daşyndan owadan görünýän, ýöne içi ölüleriň süňkleri we her tüýsli murdarlykdan doly mazarlarsyňyz.

²⁸Siz hem daşyňyzdan adamlara dogry adam ýaly görünýärsiňiz, ýöne içiňiz ikiýüzlülikden, erbetlikden doly.

²⁹Waý günüňize, eý, kanunçylar we fariseýler, ikiýüzlüler! Çünki siz pygamberlere mazarlar salyp, dogry adamlaryň ýadygärliklerini bezäp:

³⁰„Biz atalarymyzyň günlerinde bolan bolsak, pygamberleriň ganyny dökmekde olara şärik bolmazdyk" diýýärsiňiz.

³¹Şeýlelik bilen, pygamberleri öldürenleriň ogullarydygyňyza özüňiz güwä geçýärsiňiz.

³²Onda, atalaryňyzyň başlan işlerini tamamlaň!

³³Eý ýylanlar we alahöwrenler nesli! Dowzah höküminden nähili gaçjak?

³⁴Şoňa görä, ine, Men size pygamberler, akyldarlar we kanunçylar ýollaýaryn. Siz olaryň käbirini öldürersiňiz, haça çüýlärsiňiz, käbirini-de sinagogalaryňyzda ýenjersiňiz, şäherden-şähere kowalarsyňyz.

³⁵Şeýlelikde, dogry adam bolan Habylyň ganyndan tä ybadathana bilen gurbanlyk edilýän ýer arasynda öldüreniňiz Berekýanyň ogly Zekerýanyň ganyna çenli, her dogry adamyň ýer ýüzünde dökülen ganyna siz jogapkärsiňiz.

³⁶Size dogrusyny aýdýaryn, bu zatlaryň ählisine şu nesil jogapkärdir.

³⁷Eý, Iýerusalim! Pygamberleri öldürýän, özüne ýollananlary daşlaýan Iýerusalim! Bir towugyň jüýjelerini ganatlarynyň aşagyna ýygnaýşy ýaly, Men hem ençeme gezek seniň çagalaryňy ýygnajak boldum, emma siz islemediňiz.

³⁸Ine, öýüňiz size haraba bolup galýar.

³⁹Çünki size aýdýaryn, siz „Rebbiň adyndan gelen gutly bolsun" diýene deňeç Meni gaýtadan görmersiňiz».