Mattanyň Hoş Habary 24

¹Isa ybadathanadan çykyp barýarka, şägirtleri ýanyna gelip, Oňa ybadathananyň jaýlaryny görkezjek boldular.

²Emma Isa olara şeýle jogap berdi: «Bütin bu zatlary görýärmisiňiz? Size dogrusyny aýdýaryn, bu ýerde daş üstünde daş galmaz, hemmesi dargar».

³Isa Zeýtun dagynda otyrka, şägirtleri ýekelikde Onuň ýanyna gelip, şeýle diýdiler: «Bize aýt, bu zatlar haçan bolar? Seniň gelmegiňiň we ahyrzamanyň alamaty näme bolar?»

⁴Isa olara şeýle jogap berdi: «Ägä boluň, sizi aldaýmasynlar.

⁵Çünki köpler: „Men Mesih" diýip, Meniň adym bilen gelerler, köp adamlary aldarlar.

⁶Uruş seslerini, uruş turanlygy barada habarlar eşidersiňiz. Ägä boluň, gorkmaň, çünki bularyň bary bolmalydyr, ýöne entek dünýäniň soňy däldir:

⁷Çünki millet-millete, patyşalyk-patyşalyga garşy çykar. Aýry-aýry ýerlerde açlyklar bolar, Ýer titrär.

⁸Emma bular burgularyň başlangyjydyr.

⁹Onsoň sizi gaýga basdyrarlar, öldürerler, Meniň adym üçin hemme milletler sizi ýigrener.

¹⁰Şonda köpler imandan dänip, biri-birlerine haýynlyk eder, biri-birlerini ýigrenerler.

¹¹Birentek ýalan pygamberler döräp, köpleri azdyrarlar.

¹²Şer işleriň artanlygy zerarly, köpleriň söýgüsi sowar.

¹³Emma soňa çenli çydan halas bolar.

¹⁴Patyşalyk baradaky bu Hoş Habar hemme milletlere güwälik hökmünde dünýäniň ähli ýerinde wagyz ediler, ahyrzamana şonda geler.

¹⁵Şeýlelik bilen, Daniýel pygamber tarapyndan agzalan weýrançylyk getirýän ýigrenjiniň mukaddes ýerde duranyny göreniňizde (okyjy düşünsin),

¹⁶Ýahudadakylar daglara gaçsyn.

¹⁷Öýüň üçegindäki ― öýünden bir zat almak üçin aşak inmesin.

¹⁸Ekin meýdanyndaky ― donuny almak üçin yzyna öwrülmesin.

¹⁹Ol günlerde göwreli, çaga emdirýän aýallaryň gününe waý!

²⁰Gaça-gaçlygyňyz gyş ýa Sabat güni bolmasyn diýip doga ediň.

²¹Çünki şonda uly muşakgat bolar, beýle muşakgat dünýäniň başyndan tä şu wagta çenli bolanam däldir, bolmazam.

²²Ol günler gysgaldylmadyk bolsady, onda, hiç kim halas bolmazdy, ýöne saýlananlaryň hatyrasyna ol günler gysgaldylar.

²³Şonda biri size: „Ine, Mesih şu ýerde" ýa-da „Ine, ol ýerde" diýse ynanmaň.

²⁴Çünki ýalan mesihler, ýalan pygamberler döräp, mümkin boldugyça, saýlananlary-da azdyrjak bolup, uly alamatlar, gudratlar görkezerler.

²⁵Ine, Men size öňünden aýtdym.

²⁶Şeýlelikde, size: „Ine, Mesih çölde" diýseler-de çykmaň, „Ine, içki otaglarda" diýseler-de ynanmaň.

²⁷Çünki ýyldyrym nähili gündogardan turup, günbatarda hem görünýän bolsa, Ynsan Oglunyň gelşi hem şeýle bolar.

²⁸Maslyk nirede bolsa, garaguşlar şol ýere üýşüşýändir.

²⁹Ol günleriň muşakgatynyň yzysüre Gün garalar, Aý yşygyny bermez, ýyldyzlar Gökden gaçyp, Gök gudratlary titrär.

³⁰Onsoň Gökde Ynsan Oglunyň alamaty görner, şonda ýer ýüzüniň bütin taýpalary perýat eder, Ynsan Oglunyň Gökdäki bulutlarda gudrat hem uly şöhrat bilen gelýänini görer.

³¹Ol Öz perişdelerini belent surnaý sesi bilen ýollar. Olar-da Onuň saýlananlaryny dört tarapdan, Gögüň bir ujundan ol ujuna çenli ýygnarlar.

³²Injir agajyndan sapak alyň: onuň şahalary ýumşap, ýaprak çykaran mahaly tomsuň golaýdygyny bilýärsiňiz.

³³Şonuň ýaly-da, bu zatlary göreniňizde, Ynsan Oglunyň golaýdygyny, gapynyň agzyndadygyny biliň.

³⁴Men size dogrusyny aýdýaryn, bu zatlar bolýança, bu nesil dünýäden ötmez.

³⁵Gök hem ýer öter, ýöne Meniň sözlerim asla ötmez.

³⁶Emma ol güni hem ol sagady hiç kim, Gökdäki perişdeler-de bilýän däldir, diňe Ata bilýändir.

³⁷Nuhuň günleri nähili bolan bolsa, Ynsan Oglunyň gelşi-de şeýle bolar.

³⁸Çünki adamlar Nuhuň gämä münen gününe çenli, tupandan öňki günlerde iýip, içip, öýlenip, äre çykýardylar.

³⁹Tupan turup, hemmesini äkidýänçä, olar hiç zady bilmeýärdiler. Ynsan Oglunyň gelşi hem şeýle bolar.

⁴⁰Şonda ekin meýdanynda iki adam bolar, biri alnar, biri goýlar.

⁴¹Degirmen başynda galla üweýän iki aýal bolar, biri alnar, biri goýlar.

⁴²Oýa boluň, çünki siz Rebbiňiziň haýsy gün geljegini bilmeýärsiňiz.

⁴³Emma muny biliň: öý eýesi ogrynyň haýsy sagatda geljegini bilsedi, oýa bolardy, öýüni talatmazdy.

⁴⁴Munuň üçin, siz hem taýýar boluň, çünki Ynsan Ogly siziň oslamaýan sagadyňyzda geler.

⁴⁵Hyzmatkärlere wagtly-wagtynda nahar paýlaryny bersin diýip, agasynyň olaryň üstünden goýan sadyk hem akylly hyzmatkäri kim?

⁴⁶Agasy gelende, şeýle edip ýörenini görjek hyzmatkäri nähili bagtlydyr!

⁴⁷Size dogrusyny aýdýaryn, agasy bütin mal-mülküni şoňa ynanar.

⁴⁸Bu ýaramaz hyzmatkär öz içinden: „Agam giç geler" diýip,

⁴⁹ýoldaşlaryny urmaga, serhoşlar bilen iýip-içmäge başlasa,

⁵⁰ol hyzmatkäriň agasy onuň oslamaýan gününde, bilmeýän sagadynda gelip,

⁵¹ony iki bölüp, paýyny ikiýüzlüleriňki bilen deň eder. Ol ýerde agy we diş gyjama bolar».