Mattanyň Hoş Habary 25

¹Şonda Gögüň Patyşalygy çyralaryny alyp, giýewi garşylamaga çykan on gyz ýaly bolar.

²Olaryň bäşisi akylsyz, bäşisi-de akylly eken.

³Akylsyzlar çyralaryny alýarlar, ýöne ýanlaryna ýag almaýarlar.

⁴Akyllylar çyralary bilen birlikde gaplarda ýag äkidýärler.

⁵Giýew gijä galanda, hemmesi irkilip uklaýarlar.

⁶Ýarygije: „Ine, giýew gelýär, garşylamaga çykyň!" diýen batly ses eşidilýär.

⁷Şonda ýaňky gyzlaryň hemmesi turup, çyralaryny taýýarlaýarlar.

⁸Akylsyzlar akyllylara: „Bize ýagyňyzdan biraz beriň, çyralarymyz sönüp barýar" diýýärler.

⁹Emma akyllylar jogap berip: „Bize-de, size-de ýetmezlik edäýmesin, gowusy, satyjylara baryň-da, özüňiz üçin alaýyň" diýýärler.

¹⁰Olar ýag satyn almaga gidenlerinde, giýew gelýär, taýýar bolup duranlar onuň bilen toýhana girýärler welin, gapy ýapylýar.

¹¹Beýleki gyzlar hem soň gelip: „Aga! Aga! Gapyny aç" diýýärler.

¹²Emma ol jogap berip: „Size dogrusyny aýdýaryn, men sizi tanamok" diýýär.

¹³Şeýlelik bilen, oýa boluň, çünki siz Ynsan Oglunyň ne geljek gününi, ne-de sagadyny bilýärsiňiz».

¹⁴Gögüň Patyşalygy uzak ýola çykmakçy bolup, hyzmatkärlerini ýanyna çagyryp, mal-mülküni olara tabşyran adam ýalydyr.

¹⁵Bu adam her haýsynyň başarnygyna laýyk: birine ― bäş, birine ― iki, birine ― bir talant berip, derrew ýola düşýär.

¹⁶Bäş talant alan gidip, bu pul bilen söwda etmäge girişýär, ýene bäş talant gazanýar.

¹⁷Iki talant alan-da şonuň ýaly, ýene iki talant gazanýar.

¹⁸Bir talant alan bolsa baryp, topragy gazýar-da, agasynyň puluny gizleýär.

¹⁹Köp wagtdan soň bu hyzmatkärleriň agasy gelip, olardan hasabat soraýar.

²⁰Bäş talant alan gelip, ýene bäş talant getirip: „Eý aga! Sen maňa bäş talant beripdiň, ine, men ýene bäş talant gazandym" diýýär.

²¹Agasy oňa: „Berekella, ýagşy, sadyk hyzmatkär! Sen az zatda sadyk bolduň, men saňa köp zatlary ynanaryn, agaň şatlygyna şärik bol" diýýär.

²²Iki talant alan hem gelip: „Eý aga! Sen maňa iki talant beripdiň, ine, men ýene iki talant gazandym" diýýär.

²³Agasy oňa: „Berekella, ýagşy we sadyk hyzmatkär! Sen az zatda sadyk bolduň, men seni köp zatlara bellärin, agaň şatlygyna şärik bol" diýýär.

²⁴Bir talant alan hem gelip: „Eý aga, men seniň gaty adamdygyňy bilýärdim. Sen ekmedik ýeriňden orýarsyň, sepmedik ýeriňden ýygýarsyň.

²⁵Şonuň üçin gorkdum, gidip, talantyňy toprakda gizledim, ine, puluňy al!" diýýär.

²⁶Emma agasy oňa şeýle diýýär: „Erbet hem ýalta hyzmatkär! Sen meniň ekmedik ýerimden orýandygymy, sepmedik ýerimden ýygýandygymy bilýärmidiň?

²⁷Onda, pulumy pul işledýänlere bermelidiň, men-de gelip, ony peýdasy bilen alardym.

²⁸Indi bir talanty ondan alyň-da, on talantla beriň.

²⁹Çünki kimde bar bolsa, oňa berler, ondaky bol bolar, kimde ýok bolsa, onuň elindäki hem alnar.

³⁰Peýdasyz hyzmatkäri daşaryk garaňkylyga taşlaň. Ol ýerde agy we diş gyjama bolar"».

³¹Ynsan Ogly öz şöhraty içinde ähli perişdeler bilen gelip, şöhratly tagtynda oturar.

³²Ähli milletler Onuň öňüne ýygnanar, çopanyň goýunlary geçilerden saýlaýşy ýaly, Ol hem olary biri-birinden saýlar.

³³Goýunlary sagynda, geçileri hem solunda goýar.

³⁴Onsoň Patyşa sagyndakylara diýer: „Eý, Atamyň gutlanlary! Geliň, dünýä gurlaly beri siziň üçin taýýarlanan patyşalygy miras alyň.

³⁵Çünki açdym ― iýmäge zat berdiňiz, teşnedim ― suw berdiňiz, ýatdym ― myhman aldyňyz,

³⁶ýalaňaçdym ― geýindirdiňiz, syrkawdym ― idetdiňiz, zyndandadym ― görmäge geldiňiz".

³⁷Şonda dogry adamlar Oňa jogap berip diýerler: „Ýa Reb, biz Seni haçan aç görüp, naharladyk ýa haçan teşne görüp, suw berdik?

³⁸Haçan Seni ýat görüp, myhman aldyk ýa ýalaňaç görüp geýindirdik?

³⁹Haçan Seni syrkaw ýa-da zyndanda görüp, ýanyňa geldik?"

⁴⁰Patyşa jogap berip olara diýer: „Size dogrusyny aýdýaryn, Meniň bu iň kiçi doganlarymdan birine edeniňizi Maňa edensiňiz".

⁴¹Onsoň solundakylara şeýle diýer: „Eý, lagnatlylar, Meniň ýanymdan aýrylyň, iblis bilen onuň perişdelerine taýýarlanan ebedi oda gidiň.

⁴²Çünki açdym ― iýmäge zat bermediňiz, teşnedim ― suw bermediňiz,

⁴³ýatdym ― myhman almadyňyz, ýalaňaçdym ― geýindirmediňiz, syrkawdym we zyndandadym ― ýanyma gelmediňiz".

⁴⁴Şonda olar şeýle jogap bererler: „Ýa Reb, biz Seni haçan aç, teşne, ýat, ýalaňaç, syrkaw ýa zyndanda görüp-de, Saňa hyzmat etmedik?"

⁴⁵Şonda olara şeýle jogap berer: „Size dogrusyny aýdýaryn, bu iň kiçilerden birine etmedigiňizi, Maňa eden dälsiňiz".

⁴⁶Bular ebedi jeza, dogry adamlar bolsa ebedi ýaşaýşa giderler».