Süleýmanyň pähimleri 1

¹Ysraýyl patyşasy, Dawut ogly Süleýmanyň pähimleri:

²Bu pähimler danalygy we öwüt-nesihaty bilmek, paýhasly sözleriň manysyna düşünmek üçindir.

³Parasatly hem-de dogruçyl bolmak, adyllyk we deňlik, öwüt-nesihaty özleşdirmek,

⁴Sadalara paýhas, ýaşlara bilim we akyl bermek üçindir.

⁵Bu pähimlere hem tymsallara, atalar sözlerine we matallaryna düşünmeklik üçin: Akyldarlar bulary eşidip, bilimini has-da artdyrsyn, düşbi adamlar sagdyn maslahat alsyn.

⁷Bilimiň başlangyjy – Rebden gorkmakdyr; diňe akmaklar danalygy hem öwüt-nesihaty har edýärler.

⁸Diňle, oglum, ataňyň nesihatlaryny, eneňiň öwütlerinden ýüz öwürme.

⁹Ol seniň başyňa ajaýyp täç, boýnuňa monjuk bolar.

¹⁰Eý, oglum, seni günäkärler azdyrjak bolsa ylalaşma.

¹¹Eger olar: «Biziň bilen ýör. Gan dökmek üçin bukuda garaşaly. Sebäpsiz ýere bigünäni öldüreli.

¹²Olary ölüler dünýäsi ýaly diriligine, gabra inenler deý tutuşlaýyn ýuwdalyň.

¹³Her hili baýlyk taparys, öýümizi oljadan doldurarys.

¹⁴Ählimiz üçin horjun bir bolsun; aramyzda şärikligimiz deň bolsun» diýseler,

¹⁵eý, oglum, olar bilen bir ýoldan ýöreme, olaryň ýol-ýodasyna gadam urma.

¹⁶Çünki olar şere kowalaşýarlar, gan dökmäge howlugýarlar.

¹⁷Guşuň gözüniň öňünde oňa tor gurmak puçdur. Ýöne bukuda garaşýanlaryň öz gany döküler, bukuda otyrkalar, olaryň aljak jany öz jany bolar.

¹⁹Olaryň takdyry şeýle bolar, zuluma gyzygyp toplan baýlygy öz janyny alar.

²⁰Danalyk köçede gaty seslenýär, bazar ýerlerinde jar çekýär.

²¹Jemendeli ýerlerde gygyrýar; şäher derwezesiniň agzynda sözleýär:

²²«Eý, nadanlar, haçana çenli nadanlygy söýjeksiňiz? Masgaralaýjylar haçana çenli öz masgaralamagyndan keýp aljakkalar? Akmaklar haçana çenli bilimi ýigrenjekkäler?

²³Meniň käýinjime üns berseňiz, ruhumy üstüňize dökerin. Men sözümi size bildirerin.

²⁴Men sizi çagyrdym, meni ret etdiňiz; elimi uzatdym, hiç kim oňa üns bermedi.

²⁵Gaýtam ähli maslahatymy ret etdiňiz, meniň käýinjimi duýmak islemediňiz.

²⁶Men-parasat betbagtlygyňyza gülýändirin; sizi gorky basanda ýaňsylaryn.

²⁷Sizi gorky gaý kimin basanda, betbagtlyk harasat bolup inende, muşakgat hem gaýgy başyňyza düşende,

²⁸şonda meni çagyrarsyňyz. Ýöne men jogap bermerin. Meni ir ertirden agtararsyňyz, emma tapmarsyňyz.

²⁹Çünki olar bilimi ýigrendiler, Rebden gorkmagy makul bilmediler.

³⁰Meniň maslahatymy kabul etmediler, ähli käýinjimi ýigrendiler.

³¹Munuň üçin olar tutan ýollarynyň miwesini iýerler, öz pällerinden taparlar.

³²Çünki nadanlar ýoldan çykyp ölerler, akmaklary geleňsizlik heläk eder.

³³Meni diňlänler parahat mekan tutarlar, ýamanlykdan gorkman aman bolarlar». ‎