Süleýmanyň pähimleri 2

¹Oglum, meniň sözümi kabul edip, buýrugymy kalbyňda saklasaň,

²danalyga gulak asyp, düşünjä ýüregiňi berseň,

³hawa, paýhasy çagyrsaň, düşünjä ýalbarsaň,

⁴ony kümüş ýaly gözleseň, hazyna dek agtarsaň,

⁵şonda Rebden gorkmaklyga akyl ýetirip, Hudaýy tanamagy başararsyň.

⁶Çünki danalyk berýän Rebdir, bilim hem düşünje Onuň agzyndan çykýandyr.

⁷Ol dogruçyllara ýardam berýär, sadyklykda gezýänlere galkan bolýar.

⁸Ol adalat ýollaryny goraýar, Özüne sadyklaryň ýoluny goraýar.

⁹Şonda dogruçyllyga we adalata akyl ýetirersiň, adyllyga we ýagşy ýola düşünersiň.

¹⁰Çünki danalyk seniň ýüregiňe girer, bilim kalbyňa hoş ýakar.

¹¹Akyllylyk seni gorar, düşünje saňa sereder.

¹²Danalyk seni ýaman ýoldan, ýaramaz gepleýänlerden halas eder.

¹³Olar dogry ýoly taşlap, garaňkylyk ýolundan ýöreýärler.

¹⁴Ýaman iş edip şatlanýarlar, ýamanyň ýaramazlygyna guwanýarlar.

¹⁵Olaryň ýollary egridir, ýodalary öwrümli.

¹⁶Hudaý bilen ähtini unudandan, başdaşyndan aýrylyşan aýaldan, dili süýji keseki zenandan danalyk seni halas eder.

¹⁸Çünki onuň öýi ölüme eltýär, ýollary zeminiň teýine barýar.

¹⁹Onuň ýanyna giren yzyna dolanyp bilmez, gaýdyp ýaşaýyş ýoluna ýetmez.

²⁰Şonuň üçin ýagşy iş edýäniň ýolundan ýöre, dogruçyllaryň ýoluny tut.

²¹Çünki ýurtda dogruçyllar mekan tutarlar, sadyklar şol ýerde galarlar.

²²Ýöne ýaramazlyk edýänler ir ölerler, haýynlar köki bilen gyrlarlar. ‎