Süleýmanyň pähimleri 10

¹Süleýmanyň pähimleri: Akylly ogul atasyna şatlykdyr, akmak ogul enesine gaýgydyr.

²Ýaramazlyk bilen gazanylan baýlygyň peýdasy ýokdur, dogrulyk bolsa ölümden halas edýändir.

³Reb dogruçyly aç goýýan däldir, ýöne ýaramazlaryň arzuwyny ret edýändir.

⁴Ýalta el garyplyk getirýär, işeňňir el baýlyk.

⁵Tomusda ýygnaýan parasatly oguldyr, Orak wagtynda uklaýan – atasyny uýada goýar.

⁶Dogrularyň başyna bereket ýagýar, ýaramazyň dilinde zorluk gizlenýär.

⁷Dogrularyň ýatlanmagy ýalkanyşdyr, ýamanlaryň ady çüýreýändir.

⁸Kalbynda danalyk bolan öwüdi kabul eder, akmagyň dili bolsa bela elter.

⁹Sadyklykda gezen aman gezýändir, egri ýoldan ýörän aýan bolýandyr.

¹⁰Göz gypýan gam-gussa duçar bolar, akmagyň dili başyna bela getirer.

¹¹Dogrularyň agzy ýaşaýyş bulagydyr, ýaramazlaryň agzy zorlugy örtýändir.

¹²Ýigrenç gahar-gazaby oýarýar, söýgi bolsa bar ýazygy bagyşlaýar.

¹³Düşünjeli adamyň dilinden danalyk dökülýär, kemakylyň arkasyna bolsa gamçy garaşýar.

¹⁴Akyllylar bilimi goraýarlar, akmagyň dili bolsa heläkçilige getirýär.

¹⁵Baýyň galasy onuň baýlygydyr, garybyň ýoksullygy onuň heläkçiligidir.

¹⁶Dogrynyň gazanjy ýaşaýşa getirýär, ýaramazlaryň gazanjy günä getirýär.

¹⁷Terbiýäni saklaýan ýaşaýyş ýolundadyr, käýinji ret edýän bolsa ýoldan azaşýandyr.

¹⁸Ýigrenji ýaşyrýan kişi – ýalançy, gybat ýaýradýan bolsa akmakdyr.

¹⁹Gepi köpüň ýazygy bardyr, emma agzyna eýelik edýän adam parasatlydyr.

²⁰Dogruçylyň dili saýlama kümüşdir, ýaramazlaryň ýüregi hiç zada durýar.

²¹Dogruçylyň agzy köpleri bakýar, akmaklar bolsa kemakyllykdan ölýär.

²²Rebbiň berekedi baýlyk getirýär, Ol bu baýlyga dert-alada goşmaz.

²³Akmak ýamanlyga şatlanar, düşünjeli adam danalyga.

²⁴Ýaramazyň gorkusy başyna geler, dogruçyllar myradyna ýeter.

²⁵Tupan geçýär, ýaramazlar ýok bolýar, dogruçyllar bolsa ebedi berkdir.

²⁶Işýakmaza iş buýurmak, diliňe burç degen, gözüňe tüsse dolan ýalydyr.

²⁷Rebden gorkmak ömri uzaldýandyr, ýaramazyň ömri gysgalýar.

²⁸Dogruçylyň umydy şatlyk getirýär, ýaramazyň umydy puja çykýar.

²⁹Rebbiň ýoly dogrulara penadyr, şerlere bolsa gorky-beladyr.

³⁰Dogruçyl hiç haçan ornundan sarsmaz, ýaramazlar ýer-ýüzünde galmaz.

³¹Dogruçylyň dilinden danalyk ýaýraýandyr, ýalan sözleýän dil kesilip taşlanýandyr.

³²Dogruçylyň agzy mynasyp sözi bilýär, ýaramazyň agzyndan egrilik çykýar. ‎