Süleýmanyň pähimleri 11

¹Rebbiň ýigreneni galp terezidir, dogry ölçegden bolsa göwni hoş bolýandyr.

²Tekepbirlik gelse, masgaraçylyk gelýändir, akyldarlyk bolsa kiçigöwünliler bilendir.

³Dogry adamyň dogruçyllygy oňa ýol görkezýändir, dönügiň hilegärligi bolsa ony heläk edýändir.

⁴Gazap gününde mal-mülk haýyr berýän däldir, dogruçyllyk bolsa ölümden gutarar.

⁵Sadyk adamyň dogrulygy onuň ýoluny gönelder, ýaramazlar bolsa öz ýaramazlygy zerarly ýykylar.

⁶Dogry adamlary dogruçyllygy halas edýär, haýynlar öz nebsine çolaşýarlar.

⁷Ýaramaz adam ölse, onuň umyt-niýetem ölýär, onuň baý bolmak tamasy puja çykýar.

⁸Dogry adam muşakgatdan gutulýar, oňa derek ýaramazlar muşakgata uçraýar.

⁹Imansyz ýakynyny dili bilen heläkleýär, dogruçyl bolsa bilim bilen gutulýar.

¹⁰Dogrularyň işi rowaç alanda, şäher begenýär, ýaramazlar ölende toý-dabara bolýar.

¹¹Dogruçyllaryň dileginden şäher belende galýar, ýaramazlaryň dilinden ol weýran bolýar.

¹²Ýakynyny kemsidýän kemakyldyr, düşünjeli adamyň agzyndan söz çykmaýar.

¹³Gybatkeş başganyň syryny paş edýändir, ynamdar göwün syrdaş bolýandyr.

¹⁴Maslahatsyz millet heläk bolýandyr, maslahatçy köp bolan ýerde ýeňiş bar.

¹⁵Nätanşa kepil bolan köp zyýan çeker, kepil bolmakdan gaçan dynç gezer.

¹⁶Mylakatly aýal hormat, zalymlar baýlyk gazanýandyr.

¹⁷Merhemetli özüne peýda getirýär, zalym bolsa özüne zyýan edýär.

¹⁸Ýaramazyň gazanjy galplykdyr, dogrulyk ekýän hökman hakyny alar.

¹⁹Ýürekden dogruçyl ynsan – ýaşaýşa, ýamanlygy yzlaýan – ölüme barýar.

²⁰Gara ýürekliler Rebbe nejisdir, Reb sadyk ýoldan hoşaldyr.

²¹Men söz berýän, elbetde, ýaman jezasyz galmaz, dogrularyň nesilleri gutular.

²²Salykatlylykdan ýüz öwren görmegeý aýalyň ýagdaýy doňzuň burnuna dakylan altyn ysyrga ýalydyr.

²³Dogrular diňe ýagşylygy arzuwlar, ýaramazlaryň garaşýany gahar-gazap.

²⁴Biri bar – paýlaýandyr, baýlygy bolsa artýar. Biri bar – gaty gysyk, diňe mätäçlige gowuşýar.

²⁵Sahy adamyň berekedi artar, suw berene suw berler.

²⁶Gallasyny gizleýäne halk gargaýar, galla satýanyň başyna bereket ýagýar.

²⁷Ýagşylyk gözleýän merhemet gazanýar, ýamanlyk gözleýän ýamanlyga ýeter.

²⁸Baýlygyna baýrynýan ýykylar, dogrular bolsa täze baldak ýaly öser.

²⁹Hojalygyna betbagtlyk getiren ýel gysymlan ýaly bolar, akmak akylly adamyň hyzmatkäri bolar.

³⁰Dogrynyň miwesi ýaşaýyş daragtydyr, akyldar adam ynsanlary gazanýar.

³¹Dünýäde dogry adam jezalandyrylsa, ýaramaz bilen günäkäriň almyty, gör, näçe esse bolar! ‎