Süleýmanyň pähimleri 12

¹Terbiýäni söýýän bilimi söýýändir, käýinji ýigrenýän bolsa samsykdyr.

²Ýagşy adam Rebbiň merhemetini gazanýandyr, erbet niýetlini bolsa höküm edýändir.

³Adam ýaramazlyk bilen berkäp bilmez, dogrularyň köküni hiç zat goparmaz.

⁴Mynasyp aýal äriniň başynyň täjidir, binamys aýal bolsa süýegiňi çüýreder.

⁵Dogruçylyň pikiri adyldyr, ýaramazlaryň maslahaty haýynlykdyr.

⁶Ýaramazlaryň gep-gürrüňi gan dökmäge teşnedir, dogrularyň dili bolsa olary halas eder.

⁷Ýaramazlar düňderilip ýok bolýandyr, dogrularyň öýi bolsa berk durýandyr.

⁸Ynsan akyl-paýhasyna görä öwülýär, adamda egri hyýal bolsa halanmaýar.

⁹Özüni ulumsy tutup, nana zar bolan adamdan, gününi özi dolaýan garamaýak gowudyr.

¹⁰Dogruçyl kişi malynyň janyny hem gaýgyrýar, ýaramazlaryň rehimi hem zalymlykdyr.

¹¹Ýerini bejerýän adamyň nany bol bolar, boş hyýala eýerýän bolsa kemakyldyr.

¹²Ýaramazlar ýamanlaryň oljasyny isleýär, dogruçyllaryň bolsa köki ösýär.

¹³Ýamanlar ýazykly gürrüňinden duzaga düşýär, dogruçyllar kynçylykdan ýol tapýar.

¹⁴Ynsan diliniň miwesinden ýagşylyk tapar, elleriniň hyzmaty özüne serpaý bolar.

¹⁵Akmagyň ýoly öz gözüne dogrudyr, akyldar adam maslahaty diňleýär.

¹⁶Akmagyň gahary derrew bildirýändir, seresaply kişi göwne deglenini ýaşyrýandyr.

¹⁷Hakykaty aýdýan adyl gepleýändir, galp şaýat bolsa ýalany.

¹⁸Oýlanman gepleýän dil gylyç ýaly sanjylýandyr, akyldaryň dili bolsa şypa berýändir.

¹⁹Çyn dil ebedilikdir, ýalançy dil az salymlykdyr.

²⁰Ýaman niýetliniň ýüreginde hile bardyr, salamatlygy niýetleýän bolsa şatlyk alar.

²¹Dogruçyl adama hiç bela gelmez, ýaramazlaryň başy beladan gutulmaz.

²²Ýalan dil Reb üçin nejislikdir, dogruçyllyk isleýänlerden bolsa Ol hoşaldyr.

²³Seresaplylar bilimi özi üçin saklaýar, akmagyň ýüregi bolsa akmaklygyny äşgär edýändir.

²⁴Janypkeşiň eli höküm sürer, ýalta mejbury işe gider.

²⁵Gaýgyly ýürek adamy çökerýär, ýagşy söz bolsa ony şatlandyrýar.

²⁶Dogruçyl adam ýakynyna ýol görkezýändir, ýaramazlaryň ýoly bolsa azaşdyrýandyr.

²⁷Ýaltanyň eli tutan awuny bişirmez, gaýratly bolsa gymmatly hazyna.

²⁸Dogrulyk ýolunda ýaşaýyş bardyr, ol ýolda ölüm ýokdur. ‎