Süleýmanyň pähimleri 20

¹Şerap biabraý edýändir, içgi dawa-jenjel turuzýandyr. Oňa aldanýanyň ählisi akylsyzdyr.

²Patyşanyň gazaby arslanyň nagrasy kimindir, onuň gaharyny getirýän öz janyna töwekgellik edýändir.

³Dawadan gaçmak adama abraý getirýär, bar akmak jedele taýýar.

⁴Ýalta ýer sürmän, orak wagtynda hasyl gözlär, ýöne tapmaz.

⁵Ynsanyň ýüregindäki pikir çuň suw kimindir, düşünjeli adam ony çekip çykarar.

⁶Köp adam özüne «Men wepaly» diýýändir, ýöne ynamdar birini kim tapyp biler?

⁷Dogruçyl sadyklykda ýöreýär, onuň yzynda çagalary nähili bagtly bolar!

⁸Hökmürowan tagtynda oturýan patyşa ähli ýamanlygy gözleri bilen saýgarýar.

⁹«Ýüregimi tämizledim, günäden päklendim» diýip, kim aýdyp biler?

¹⁰Iki dürli terezi daşynyň, iki dürli ölçegiň ikisi hem Rebbe ýigrenjidir.

¹¹Hatda çaga hem eden işiniň päkdigini ýa dogrudygyny öz hereketi bilen aýan edýär.

¹²Diňleýän gulagy, görýän gözi – ikisinem Reb ýaradandyr.

¹³Garyp bolmazyň ýaly, ukyny söýme, gözüňi aç, nanyň bol bolar.

¹⁴Satyn alýan: «Erbet, erbet» diýýändir, aňyrrak baryp bolsa öwýändir.

¹⁵Altyn bar, jöwherem köpdür, ýöne bilimli dil tapylgysyz zatdyr.

¹⁶Nätanşa kepil bolanyň geýimini al, kesekä kepil bolandan girew al.

¹⁷Hile bilen gazanylan nan süýjüdir, soňra agzy çagyldan dolar.

¹⁸Maksatlar maslahat bilen berkarar bolýandyr; sagdyn maslahatlar bilen urşa git.

¹⁹Gybatkeş syry paş edýändir, agzyboş bilen gatnaşyk açma.

²⁰Ata-enesini näletleýäniň tüm garaňkylykda çyrasy söner.

²¹Başda basym alnan miras soňunda bereketli bolmaz.

²²«Ýamanlygy ýerine salaryn» diýme, Rebbe garaş, Ol seni halas eder.

²³Galp terezi daşy Rebbe ýigrenjidir, hileli terezi hem gowy däldir.

²⁴Adamyň her ätjek ädimi Rebdendir. Şeýle bolansoň, adam öz ýoluna nädip düşünsin?

²⁵Zadyny pähimsiz bagyş edýän adam duzaga düşer, ol äht edenden soň oýlanar.

²⁶Akylly patyşa ýaramazlary sowrup, olaryň üstünde döwek döwýär.

²⁷Adamyň ruhy – Rebbiň çyrasydyr, ol ynsan kalbynyň bütin jümmüşini barlaýar.

²⁸Sadyklyk we ynamdarlyk patyşany goraýar, onuň tagty sadyklykdan berkarar bolýar.

²⁹Ýigitlik kuwwaty – olaryň şöhratydyr, çal saçlar bolsa garrylaryň abraýydyr.

³⁰Yz galdyrýan urgy ýamanlykdan tämizleýär, kötekler bolsa kalbyň jümmüşini päkleýär. ‎