Süleýmanyň pähimleri 21

¹Patyşanyň ýüregi Rebbiň elinde akar ýap ýalydyr, ony islän tarapyna öwürýändir.

²Adamyň ähli ýoly öz gözüne dogrudyr, emma ýürekdäkini ölçeýän Rebdir.

³Dogrulyk we adalatlylyk etmek Rebbe gurbanlyk berenden ýakymlydyr.

⁴Ulumsy nazar, tekepbir ýürek, ýaramazlaryň çyrasy – günädir.

⁵Janypkeşiň maksady diňe bolçulyga getirýär, alňasak adamlaryň bary mätäç düşýändir.

⁶Ýalan söz bilen toplanan hazyna ölüme kowalap barýan ümür-dumandyr.

⁷Ýaramazlaryň zorlugy özlerini süpürip äkidýändir, çünki olar adalaty berjaý etmekden boýun gaçyrýandyr.

⁸Ýazyklynyň ýoly egridir, päkleriň bolşy dogrudyr.

⁹Igenjeň aýal bilen öýde ýaşandan, üçegiň bir burçunda ýaşamak ýegdir.

¹⁰Ýaramazyň göwni ýamanlyk küýseýär, ýakyny onuň göwnünden turmaýar.

¹¹Masgaralaýja jeza berlende, nadan akylly bolýandyr, dana adam tälim alanda, bilimini artdyrýandyr.

¹²Dogruçyl ýaramazyň öýüni synlaýar, ýaramazlar heläkçilige barýar.

¹³Garybyň dady-perýadyna gulak asmadygyň öz dady-perýadyna-da jogap berilmez.

¹⁴Gizlin berlen sowgat gahary, goltuga sokulan para güýçli gazaby ýatyrýar.

¹⁵Adalaty berjaý etmek dogruçyl adama şatlykdyr, ýaman iş edýäne heläkçilikdir.

¹⁶Düşünje ýolundan sowlan ölüler toparynda ornaşar.

¹⁷Hezilligi söýýän mätäçdir, şeraby we ýagy söýýän baýamaz.

¹⁸Ýaramazlar dogruçyl üçin, biwepalar hem sadyk üçin töleg bolar.

¹⁹Igenjeň hem gaharjaň aýal bilen ýaşandan, çölde ýaşamak gowudyr.

²⁰Arzyly hazyna hem ýag dananyň jaýyndadyr, akmak bolsa baryny symyşlar.

²¹Dogruçyllyk hem sadyklyk yzlaýan adam ýaşaýyş hem hormat tapar.

²²Akyldar adam güýçlüleriň şäherine baryp, olaryň bil baglaýan berkitmesini ýumurýar.

²³Agzyna we diline berk janyny beladan goraýandyr.

²⁴Çendenaşa bihaýa iş edýän gedem hem tekepbir adamyň ady masgaralaýjydyr.

²⁵Ýaltany öz höwesi öldürýär, çünki onuň elleri işden boýun gaçyrýar.

²⁶Ol uzak gün açgözlük bilen isleýär, dogruçyl bolsa ölçemän berýär we gysganmaýar.

²⁷Ýaramazlaryň gurbanlygy ýigrenjidir, eger ol ýaman niýet bilen getiren bolsa, ondanam beterdir.

²⁸Galp şaýat heläk bolar, diňleýän adamyň sözi dowam eder.

²⁹Ýaramaz adam ýüzüni galňadýandyr, dogruçyl adam bolsa öz ýoluny oýlaýandyr.

³⁰Rebbe garşy durup biljek hiç bir danalyk, düşünje ýa-da maslahat ýokdur.

³¹At söweş güni üçin seýislenýändir, emma ýeňiş Rebdendir. ‎