Zebur 105

¹Rebbe şükür ediň, Ony çagyryň, halklar arasynda Onuň işlerini jar ediň.

²Oňa nagma aýdyň, Ony şöhratlandyryň, ähli gudratly işleri barada siz gürrüň beriň.

³Rebbiň mukaddes ady bilen magtanyň; Ony agtarýanlaryň ýüregi şatlykdan dolsun.

⁴Rebbe, Onuň kuwwatyna sygynyň, dyngysyz Onuň huzuryny agtaryň.

⁵Eý, Rebbiň bendesi Ybraýymyň zürýady, Onuň saýlanlary – Ýakubyň nesli!

⁶Ýatlaň Onuň görkezen gudratlaryny, mugjyzalaryny, agzyndan çykan kararlaryny.

⁷Ol – Hudaýymyz Reb, Ol tutuş ýer ýüzüne kazylyk edýär.

⁸Ol ähtini, müň nesle beren sözüni, Ybraýym bilen eden ähtini,

⁹Yshaga beren Öz wadasyny elmydama ýatda saklaýar.

¹⁰Diýdi: «Men size Kengan ýurduny, mirasyňyza düşen paý hökmünde bererin».

¹¹Muny Ýakuba tassyklady kanun hökmünde, Ysraýyla – müdimi äht hökmünde.

¹²Şonda olar az sanlydylar, gaty az we şol ýerde gelmişekdiler.

¹³Geçýärdiler bir milletden başga millete, bir şalykdan – başga şalyga.

¹⁴Reb olary ezmäge hiç ýol bermedi, şolar sebäpli Ol şalara käýedi.

¹⁵Diýdi: «Saýlap seçenlerime siz el degirmäň, pygamberlerime ýamanlyk etmäň».

¹⁶Şonda Reb ýurda açlyk düşürdi, Onuň ähli azygyny weýran eýledi.

¹⁷Öňlerinden bir adamy ýollady: Ýusup gul edilip satyldy.

¹⁸Onuň aýaklaryna zynjyr uruldy, boýny demir halka salyndy.

¹⁹Rebbiň aýdanlary berjaý bolýança, Onuň sözi Ýusuby synap barlady.

²⁰Patyşa adam iberip, ony boşatdy, halklaryň hökümdary ony azat eýledi.

²¹Oňa emeldarlarynyň üstünden ygytyýar berip, ýaşulularyna paýhas öwretsin diýip,

²²Ýusuby öz öýüne hojaýyn etdi, tutuş mülküne hökümdar goýdy.

²³Onsoň Ysraýyl Müsüre geldi, Ýakup Ham ýurdunda gelmişek bolup ýaşady.

²⁴Reb Öz halkyny juda köpeltdi, olary duşmanlaryndan kuwwatly etdi.

²⁵Hudaý bendeleriniň janyna kast etsinler diýip, duşmanlaryň ýüreginde Öz halkyna ýigrenç döretdi.

²⁶Reb olaryň arasyna bendesi Musany we seçip saýlan Harunyny ýollady.

²⁷Olaryň arasynda görkezdiler Rebbiň alamatlaryny, Ham ýurdunda – gudratlaryny.

²⁸Reb garaňky düşürdi, ýurdy garaňkyratdy, Musa bilen Harun Onuň sözünden çykyp bilmedi.

²⁹Ol olaryň suwuny gana öwürdi. Olaryň balyklaryny gyryp taşlady.

³⁰Müsür ýurdy, hatda şa otaglary-da, gurbagalardan dos-doly boldy.

³¹Reb buýurdy, siňek sürüsi geldi, çirkeýler tutuş ýurtlaryny doldurdy.

³²Ol ýagyş deregine doly ýagdyrdy, tutuş ýurtlaryna ýalynly ýyldyrymlar çakdyrdy.

³³Reb üzüm baglaryny, injir agaçlaryny urdy, ýurtlaryndaky agaçlary çym-pytrak etdi.

³⁴Ol buýurdy: çekitgeler, san-sajaksyz ganat baglamadyk çekirtgeler hüjüm eýledi.

³⁵Olar Müsürdäki ösümlikleriň baryny iýdi, topragynyň hasylyny ýuwutdy.

³⁶Reb öldürdi Müsürdäki nowbaharlary – bar güýç-kuwwatlary bolan ilkinji zürýatlaryny.

³⁷Soňra Ysraýyllary ol ýerden altyn-kümüşli edip çykardy, olaryň tireleriniň arasynda büdrän bolmady.

³⁸Olar çykyp gaýdansoňlar Müsür begendi, çünki olar zerarly üstlerine howp-hatar abandy.

³⁹Reb örtgi hökmünde ýaýdy buludy, gije yşyk bersin diýip – alawy.

⁴⁰Dilediler, Ol bedene iberdi, gögüň çöregini bolelin berdi.

⁴¹Ol gaýany ýardy, suw çogup çykdy, ol çölüstanlykda derýa deý akdy.

⁴²Çünki Öz bendesi Ybraýyma beren mukaddes wadasyny Ol ýada saldy.

⁴³Ol şatlyk bilen çykardy Öz halkyny, nagma bilen – seçip saýlanlaryny.

⁴⁴Olar Hudaýyň parzlaryny saklary ýaly, Onuň kanunlaryny berjaý ederi ýaly, başga milletleriň ýurduny olara berdi.

⁴⁵Olar şol halklaryň ekinleriniň hasylyny ordular. Rebbe şan-şöhrat bolsun!