Zebur 106

¹Rebbe şan-şöhrat bolsun! Şükür ediň, çünki Ol – ýagşy, Onuň söýgüsi baky.

²Rebbiň beýik işlerini beýan edip biljek barmyka? Oňa laýyk şan-şöhrat aýdyp biljek barmyka?

³Adalaty goraýanlar, elmydama dogrulyk edýänler neneňsi bagtly!

⁴Ýa Reb, halkyňa merhemet edeniňde, meni ýada sal.

⁵Seniň seçip saýlanlaryň abadanlygyny görüp bilerim ýaly, halkyňyň şatlygyna şatlanyp bilerim ýaly, saýlan halkyň bilen bile magtanyp bilerim ýaly, olary halas edeniňde maňa kömek et.

⁶Biz hem ata-babalarymyz deý günä işleri etdik, ýazykly bolduk, ýamanlyk etdik.

⁷Ata-babalarymyz Müsürde gudratlaryňa düşünmediler, boldan-bol wepaly söýgiňi ýatlamadylar. Gyzyl deňziň ýakasynda baş galdyrdylar.

⁸Emma Ol gudratyny bildirmek üçin, Öz adynyň hatyrasyna olary halas eýledi.

⁹Ol Gyzyl deňze buýurdy, ol hem gurady, olary çuňlukdan gury ýerden kimin geçirdi.

¹⁰Olary duşman elinden halas eýledi, olary ýagynyň penjesinden gutardy.

¹¹Suwlar duşmanlarynyň üstüni örtdi, olardan hiç biri aman galmady.

¹²Şonda Onuň sözlerine olar uýdular, Oňa şöhrat nagmasyny aýtdylar.

¹³Emma olar Onuň işlerini tiz unutdylar, Onuň maslahatyna garaşmadylar.

¹⁴Olar çölde açgözlüge göwün berdiler, çöl-beýewanda Hudaýy synap gördüler.

¹⁵Ol olaryň dileglerini bitirdi, emma üstlerine gyrgyn iberdi.

¹⁶Olar düşelgede Musa, Rebbiň ruhanysy Haruna görip boldular.

¹⁷Ýer ýarylyp Datany ýalmap ýuwutdy, Abyramyň toplanyşygynyň üstüni örtdi.

¹⁸Olaryň toplanyşygynda ot alawlady, erbetleri ýalyn ýandyrdy.

¹⁹Olar Horepde öküziň heýkelini ýasap, guýma buta sežde etdiler.

²⁰Olar Hudaýyň şan-şöhratyny ot iýýän öküziň şekiline çalyşdy.

²¹Olar Hudaýy – Müsürde beýik işleri, Ham ýurdunda gudratlary işleri,

²²Gyzyl deňzinde haýbatly işleri eden Halasgärlerini ýatdan çykardy.

²³Ol olary ýok etmek howpuna saldy, emma Musa, Onuň saýlany, Oňa töwella etdi, Onuň ýandyryjy gazabyn sowdy.

²⁴Olar gözel ýurdy äsgermediler, Onuň beren sözüne ynanmadylar.

²⁵Öz çadyrlarynda hüňürdeşdiler, Rebbiň sesini diňlemediler.

²⁶Şoňa görä, olary çölde ýoklaryn diýip, milletler arasyndan zürýatlaryny ýoklaryn diýip,

²⁷olary ýer ýüzüne dargatjak diýip, elini galdyryp, Reb kasam etdi.

²⁸Soňra Bagalpegora bil bagladylar, ölülere bagyş edilen gurbanlary olar iýdiler.

²⁹Olar edenleri bilen Rebbi gazaplandyrdy, mergi olaryň başyna indi.

³⁰Şonda Pinehas durup töwella etdi, mergi togtady.

³¹Bu oňa dogrulyk hökmünde nesillerboýy baky saýyldy.

³²Olar Meribanyň boýunda Rebbi gazaplandyrdy, Musa olar zerarly oňaýsyz ýagdaýa galdy.

³³Çünki olar onuň ruhuny gaýgylandyrdy, onuň dili oýlanyşyksyz sözleri aýtdy.

³⁴Olar Rebbiň buýranlaryny berjaý etmediler – olar halklary ýoklamadylar.

³⁵Gaýtam milletlere garyşyp, olaryň däp-dessuryna eýerdiler.

³⁶Olaryň butlaryna hyzmat etdiler, butlar hem olara duzak boldular.

³⁷Olar öz ogullaryny we gyzlaryny galp hudaýlara gurban etdiler.

³⁸Olar ogullaryny we gyzlaryny Kengan butlaryna gurban etdiler, olaryň bigünä ganyn dökdüler; ýurdy gan bilen haramladylar.

³⁹Edenleri bilen haram boldular, öz işleri arkaly zyna etdiler.

⁴⁰Reb Öz halkyna garşy gazaba mündi, saýlap seçen halkyny Ol ýigrenç saýdy.

⁴¹Olary milletleriň eline berdi, olary ýigrenýärler üstlerinden agalyk sürdi.

⁴²Duşmanlary olara jebir çekdirdi, olary güýç bilen boýun egdirdi.

⁴³Ol ençeme gezek olary halas eýledi, emma olar pällerinden ýaňa baş galdyrdylar, öz günäleri zerarly kemsidildiler.

⁴⁴Emma Ol dat-perýatlaryny eşiden wagty, olaryň muşakgatlaryna nazar aýlady.

⁴⁵Olaryň hatyrasyna Öz ähtini ýadyna saldy, wepaly söýgüsiniň bollugyna görä rehim eýledi.

⁴⁶Olary ýesir edenleriň kalbyna olar babatda rehim-şepagat saldy.

⁴⁷Eý, Hudaýymyz Reb, bizi halas et! Mukaddes adyňa şükürler eder ýaly, Seniň şöhratyňa buýsanar ýaly, milletleriň arasyndan bizi toplap al.

⁴⁸Ysraýyl Hudaýy Rebbe ezelden ebedä çenli alkyşlar bolsun! Ähli halk, goý, «Omyn!» diýsin. Rebbe şan-şöhrat bolsun!