Zebur 34

¹Men Rebbe hemişe alkyş aýdaryn, Oňa öwgi elmydama agzymda bolar. ב

²Reb bilen meniň janym magtanar, pespäller eşider hem-de şat bolar. ג

³Meniň bilen bile Rebbi öweliň, beýgeldeli bilelikde Onuň adyny. ד

⁴Men Rebbi agtardym, Ol jogap berdi hem-de ähli howplardan meni halas eýledi. ה

⁵Oňa nazar salyň, nurlanarsyňyz, asla utandyrylmaz siziň ýüzüňiz. ז

⁶Men-biçäre Rebbi çagyrdym, Ol hem eşitdi, meni ähli azaplarymdan halas eýledi. ח

⁷Reb perişdesi Ondan gorkýanlary gurşaýar, olary bela-beterden halas eýleýär. ט

⁸Dadyp görüň Reb ýagşylygyny, Ony pena edinýän nähili bagtly! י

⁹Rebden gorkuň, eý, Onuň mukaddesleri, Ondan gorkýanlaryň ýok mätäçligi. כ

¹⁰Hatda ýolbarslar hem çekýär ejir bilen açlygy, Rebbi agtarýanlar bolsa çekmez hiç mätäçligi. ל

¹¹Geliň, eý, ogullarym, diňläň siz meni, öwredeýin size Rebden gorkmagy. מ

¹²Ynsan ýagşylygy göreri ýaly, isleýärmi ýaşamaklygy? Arzuw edýärmi uzak bir ömri? נ

¹³Ýamanlykdan sakla sen öz diliňi we hileli gepden – dodaklaryňy; ס

¹⁴ýamanlykdan aýryl, et sen ýagşylyk, parahatlyk agtar, onuň yzyndan galma. ע

¹⁵Dogry adamlarda Rebbiň gözleri, perýatlaryna açyk Onuň gulagy. פ

¹⁶Rebbiň ýüzi betkärlere garşydyr; olary ýatlamadan ýer ýüzünde nyşan galdyrmaz. צ

¹⁷Reb eşidýär dogrular perýat edende, Ol olary ähli muşakgatlaryndan halas eýleýär. ק

¹⁸Reb kalby synyklara ýakyndyr; ruhdan düşenleri halas edýändir. ר

¹⁹Dogry ynsanyň dertleri köpdür, emma Reb ählisinden ony halas eýleýär. שׁ

²⁰Onuň ähli süňklerini goraýar, olaryň biri hem döwülmez. ת

²¹Ýamanlyk erbet adamy öldürer, dogry adamy ýigrenýän höküm ediler.

²²Reb Öz bendelerini halas edýändir, Ony pena edinýänleriň hiç biri höküm edilmez.