Zebur 69

¹Eý, Hudaý, meni halas et, çünki suwlar boýnuma ýetdi.

²Çuň batgalyga batyp barýaryn, aýagymy diremäge hiç ýer ýok. Çuň suwlara girdim, siller meni öz girdabyna saldy.

³Men öz perýadymdan halys ýadadym, gurap galdy meniň damagym; Hudaýyma garaşa-garaşa gözüm küteldi.

⁴Meni nähak ýere ýigrenýänleriň sany başymyň saçyndan hem köp; janyma kast etmekçi bolup, ýalan ýere maňa günä ýapýan ýagylarym köp. Men ogurlamadyk zadymy gaýtaraýynmy?

⁵Eý, Hudaý, Saňa mälimdir meniň akmaklygym, Senden gizlin däldir meniň günälerim.

⁶Eý, Hökmürowan Reb, Gudratygüýçli! Saňa umyt baglaýanlar men zerarly, goý, utanmasyn; Eý, Ysraýyl Hudaýy, Seni agtarýanlar men zerarly, goý, uýalmasyn.

⁷Men doganlaryma gelmişek boldum, ejemiň ogullaryna keseki boldum.

⁸Seniň öýüňe bolan yhlas meni köýdürdi, Saňa dil ýetirýänleriň gybaty başyma indi.

⁹Agyz bekläp, gözýaş döküp, ruhumy syndyranymda, bularyň bary maňa gyjalat boldy.

¹¹July eşik edinenimde, olaryň agyz-diline düşdüm.

¹²Derwezede oturanlar meniň gybatym edýär, serhoşlar men barada aýdymlar düzýär.

¹³Ýa, Reb hoşamaýlyk et-de, dogamy eşit. Öz söýgiňe görä, halas ediş güýjüňiň wepalylygynda maňa jogap ber.

¹⁴Halas et, men batgalyga batmaýyn; meni ýigrenýänlerden, suwlaryň çuňlugyndan halas bolaýyn.

¹⁵Sil suwlary meni girdabyna salmasyn, çuňluk meni, goý, ýuwutmasyn, gabyr üstümden öz agzyny ýummasyn.

¹⁶Ýa Reb, maňa jogap ber, çünki Seniň wepaly söýgiň ýagşydyr; bolelin merhemetiňe görä, maňa nazar sal.

¹⁷Sen guluňdan Öz ýüzüňi gizleme, ejir çekýärin, tizräk jogap bersene!

¹⁸Maňa ýakynlaş hem-de halas et, duşmanlarymyň elinden meni azat et.

¹⁹Sen bilýärsiň men babatda aýdylýan ýaman gepleri, meniň utanjymy, betnamlygymy. Sen bilýärsiň ähli duşmanlarymy.

²⁰Ryswalyk ýüregimi perişan etdi – men ruhdan düşdüm. Tessellä garaşdym, emma bolmady; göwünlik berjekleri agtardym, emma tapmadym.

²¹Olar nahar ýerine maňa öt berdi, suwsanymda sirke içirdi.

²²Olara öz saçagy, goý, duzak bolsun, myhmanlary üçin bir gapan bolsun.

²³Goý, gözleri garaňkyrasyn, görüp bilmesin, olar elmydama, goý, sandyrasyn.

²⁴Olaryň üstüne Öz gazabyňy dök, gaharyňyň ody olaryň üstüne insin.

²⁵Goý, olaryň öýleri çolaryp galsyn, çadyrlarynda hiç kim mesgen tutmasyn.

²⁶Çünki olar Seniň uranlaryňy yzarlaýarlar, ýaralan adamlaryňyň agyrysy barada gürrüň edýärler.

²⁷Sen olaryň jezasyna jeza goş, olar Sen tarapdan, goý, aklanmasyn.

²⁸Ýaşaýyş kitabyndan olaryň ady bozulsyn, olar dogrular bilen bile, goý, ýazylmasyn.

²⁹Emma men bir mätäç, ejir çekýärin, eý, Hudaý, halas et we gora meni.

³⁰Men nagmada Hudaýyň adyny öwjek, Ony şükürler bilen arşa çykarjak.

³¹Bu has köp ýarar Rebbiň göwnüne şahly, toýnakly öküzden ýa-da bugadan.

³²Pes göwünliler muny görüp begensin, eý, Hudaýy agtarýanlar, ýüregiňiz galkynsyn.

³³Çünki Reb mätäçleri eşidýär, Öz ýesir halkyny gözden salmaýar.

³⁴Goý, Ony şöhratlandyrsyn asman bilen ýer, deňizler we olardaky ähli janly-jandarlar.

³⁵Çünki Hudaý halas eder Siýony, dikelder Ýahudanyň şäherlerini, olar ornaşyp, şol ýere eýelik ederler.

³⁶Bendeleriniň zürýady ol ýeri miras alarlar, Onuň adyny söýýänler şol ýerde mesgen tutarlar.