Zebur 71

¹Ýa Reb, men Seni pena edinýän, meni asla utanja goýma.

²Öz dogrulygyňda meni gutar, azat et, maňa gulak goý-da, meni halas et.

³Elmydama meni gizläp biläýjek, mesgen tutunjak mäkäm gaýam bol. Halas bolmagymy Sen emr etdiň, çünki gaýam, berkitmäm Sensiň.

⁴Eý, Hudaýym, meni halas et erbediň elinden, adalatsyz bilen zalymyň penjelerinden.

⁵Çünki, eý, Hökmürowan, umydym Sensiň, Ýa Reb, ýaşlygymdan bil baglanym Sensiň.

⁶Dünýä inenimden Saňa daýandym, Sen ejemiň göwresinden meni dünýä inderdiň; men Saňa dyngysyz alkyş aýdýaryn.

⁷Men köplere täsinlik bolup göründim, emma Sen mäkäm penamsyň.

⁸Saňa bolan alkyş düşmez dilimden, uzakly gün agzym doly şan-şöhratyňdan.

⁹Garrylyk çagymda meni taşlama, kuwwatdan düşenimde meni terk etme.

¹⁰Duşmanlarym men barada gürrüň edişýär, janymy aňtap, özara dil birikdirýär.

¹¹Olar diýýär: «Hudaý ony taşlady, kowalap, tutuň siz ony. Ony halas etjek ýok indi».

¹²Eý, Hudaý, menden daşlaşma, eý, Hudaýym, tiz ýetiş meniň dadyma.

¹³Meniň ýagylarym utansyn, ýok bolup gitsin, maňa ýamanlygy niýet edýänler utanç bilen betnamlyga bürelsin.

¹⁴Men bolsa hemişe umyt baglaryn, Saňa alkyş üstüne alkyş aýdaryn.

¹⁵Dilim uzakly gün sözlär dogrulygyňy hem-de halas etmek üçin edýänleriňi; olaryň sany akyl ýetirerden kän.

¹⁶Men Hökmürowan Rebbiň gudratly güýji bilen gelerin, Seniň, diňe Seniň dogrulygyňy yglan ederin.

¹⁷Eý, Hudaý, ýaşlygymdan maňa terbiýe berdiň, men heniz-de gudratlaryňy beýan edýärin.

¹⁸Jar edýänçäm geljek nesle güýç–kuwwatyňy, indi doguljaklaryň ählisine Seniň güýjüňi, garrasam-da, başym çalarsa-da meni taşlama.

¹⁹Eý, Hudaý, Seniň dogrulygyň göklere ýetýär, Sen berjaý etdiň ägirt işleri. Eý, Hudaý, barmy Sen ýaly?

²⁰Köp görgä, ýaman muşakgatlara meni uçratdyň, ýöne gaýtadan meni ýaşaýşa gowuşdyrarsyň, ýeriň teýinden meni ýene çykararsyň Sen.

²¹Beýgeldersiň meniň at-abraýymy, kalbyma berersiň Sen rahatlygy.

²²Eý, Hudaýym, men arfada wepalylygyňy öwerin. Eý, Ysraýyl Mukaddesi, kinorda Saňa alkyş aýdaryn.

²³Men Saňa nagma aýdanymda, dilim, halas bolan janym şatlyk bilen gygyrar.

²⁴Dilim uzakly gün dogrulygyňy aýdar, çünki maňa ýamanlygy niýet edenler masgara bolup, utanja galdy.